ខេត្ដកំពង់ចាម ៖ ក្រោមការយកចិត្តទុកដាក់ពីអាជ្ញាធរខេត្ត សម្រាប់ពិធីបុណ្យចូលឆ្នាំថ្មីប្រពៃណីជាតិរយៈពេល៣ថ្ងៃ ទី១៤ ទី១៥ និង១៦ ខែមេសា ឆ្នាំ២០១៧ នឹងរៀបចំកម្មវិធីកម្សាន្ដជាច្រើន មានដូចជាសម្ដែងរបាំប្រជាប្រិយជា នៅទីលានមុខសាលាខេត្តដើម ។
លោកប៊ិន គឹមស្រាង អាយុ៤៥ឆ្នាំ នៅភូមិស្តៅលើ ឃុំស្តៅ ស្រុកកងមាស ឲ្យដឹងនៅរសៀលថ្ងៃទី២២ ខែមីនា ឆ្នាំ២០១៧ ថា ឲ្យតែដល់រដូវបុណ្យចូលឆ្នាំថ្មីប្រពៃណីជាតិខ្មែរ ម្តងៗ នៅតាមបណ្តាវត្តជាច្រើនក្នុងស្រុកកងមាស មានរៀបចំលេងល្បែងប្រជាប្រិយ ក្នុងនោះមានវ៉ៃក្អម ចោលឈូងជាដើម ។ ចំណែករូបលោកតែងតែចូលរួមរាំវង់ សារ៉ាវ៉ាន់ រាំក្បាច់ ដែលបង្ហាញពីអត្តសញ្ញាណរបស់ជាតិខ្មែរ ។
ចំពោះការរៀបចំរបស់អាជ្ញាធរខេត្ត ឲ្យមានកម្មវិធី សប្បាយៗចំនួន៣ថ្ងៃនៅក្រុងកំពង់ចាម លោកយល់ថា ជាការយកចិត្ដទុកដាក់របស់ថ្នាក់ដឹកនាំខេត្ត ក៏ដូចជាអង្គភាពនៅជុំវិញខេត្ត ។ ការធ្វើបែបនេះដើម្បីឲ្យយុវជនយុវនារីជំនាន់ក្រោយបានស្គាល់ពីរបាំប្រពៃណីរបស់ដូនតា ដែលត្រូវតែចងចាំ គ្រប់ៗគ្នាទៅអនាគត ។
យុវសិស្សវន់ សុខា អាយុ១៩ឆ្នាំ រៀនថ្នាក់ទី១២ នៅនៃវិទ្យាល័យព្រះសីហនុក្រុងកំពង់ចាម និយាយថា នៅពេលដឹងព្រឹត្តិការណ៍ សប្បាយៗ ដែលលោកអភិបាលខេត្តរៀបចំឡើងនេះ រូបគេមានក្តីរំភើបរីករាយ ព្រោះមិនដែលមានទេនាពេលកន្លងមក ។ ដូច្នេះហើយរូបគេមិនធ្វើដំណើរទៅណាទេ គឺសុខចិត្តចូលរួមកម្មវិធីលេងល្បែងប្រជាប្រិយជាមួយនឹងគេដែរ ។ របាំប្រជាប្រិយធ្លាប់តែមើលគេលេងនៅកន្លែង ផ្សេងៗ ។
លោកជួន សុផាត ប្រធានមន្ទីរវប្បធម៌និងវិចិត្រសិល្បៈខេត្ត ឲ្យដឹងនៅរសៀលថ្ងៃទី២២ មីនា ថា តាមការណែនាំរបស់លោកលន់ លឹមថៃ អភិបាលខេត្ត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនោះ នឹងរៀបចំសម្ដែង របាំត្រដ៌ ឆៃយ៉ាំ ចាប៉ីដងវែង តន្ត្រីសម័យ ចោលឈូង ទាញព្រ័ត្រ រត់ប្រណាំង និងកម្មវិធី ផ្សេងៗទៀតជាច្រើន ។
ទើបតែលើកទី១ទេ នៅក្រុងកំពង់ចាម ដែលរៀបចំកម្មវិធីកម្សាន្ដ ហើយបើទទួលបានជោគជ័យនឹងធ្វើបន្តទៀតនៅឆ្នាំខាងមុខ ៕
ចែករំលែកព័តមាននេះ