ល្បែងភ្នាល់បាល់តាមអនឡាញ រាប់ស្ទើរមិនអស់នៅក្រុងប៉ោយប៉ែត
ខេត្តបន្ទាយមានជ័យ៖ បនល្បែងប្រភេទភ្នាល់បាល់ និង អនឡាញជាច្រើនកន្លែងរាប់ស្ទើរមិនអស់ បានកើតមានយ៉ាងពេញបន្ទុកនៅក្នុងតំបន់ជាយដែនខ្មែរ-សៀម ក្រុង
ខេត្តបន្ទាយមានជ័យ៖ បនល្បែងប្រភេទភ្នាល់បាល់ និង អនឡាញជាច្រើនកន្លែងរាប់ស្ទើរមិនអស់ បានកើតមានយ៉ាងពេញបន្ទុកនៅក្នុងតំបន់ជាយដែនខ្មែរ-សៀម ក្រុងប៉ោយប៉ែត ដោយបើកឲ្យពលរដ្ឋខ្មែរចូលលេងម៉ាសេរីយ៉ាងអនាធិបតេយ្យបំផុត ដោយគេពុំដែលឃើញអស់លោកអាជ្ញាធរ មានសមត្ថកិច្ចជំនាញណាមួយចាត់វិធានការទប់ស្កាត់ ឬ ក៏បង្ក្រាបឲ្យស្របទៅតាមគោលនយោបាយភូមិ ឃុំ មានសុវត្ថិភាព និងបទបញ្ជារបស់សម្តេចតេជោហ៊ុន សែន នោះឡើយ ។
តាមប្រភពបានឲ្យដឹងថា បនល្បែងភ្នាល់បាល់ និង អនឡាញ កើតមានច្រើនកន្លែងស្ទើររាប់មិនអស់នោះ គឺនៅប្លុកកាស៊ីណូផ្កាយ៥ ស្ថិតក្នុងភូមិក្បាលស្ពាន១ សង្កាត់-ក្រុងប៉ោយប៉ែត និងមានរហូតមកដល់ខាងក្រៅបរិវេណកាស៊ីណូផងដែរក្នុងទីប្រជុំជនក្រុងប៉ោយប៉ែត ដោយបើកឲ្យពលរដ្ឋខ្មែរចូលលេងយ៉ាងអនាធិបតេយ្យបំផុត ។
បើតាមសមត្ថកិច្ចមួយរូបសុំមិនបញ្ចេញឈ្មោះបានបង្ហើបឲ្យដឹងថា បនល្បែងទាំងអស់នោះមិនមានច្បាប់អនុញាតឡើយ ដោយម្ចាស់ទីតាំងបនល្បែងភាគច្រើនគឺជាសមត្ថកិច្ចអ្នកមានអំណាចនិង ជាអ្នកកាង ហើយពួកគេបានជួលទីតាំង នៅប្លុកកាស៊ីណូផ្កាយ៥នោះ បើកដោយសំអាងថា គេមានច្បាប់ចេញពីកាស៊ីណូ ។
ប្រពភបានបញ្ជាក់ទៀតថា តាមពិតកាស៊ីណូធំៗទាំងនោះ ទើបមានច្បាប់ ក៏ប៉ុន្តែពួកគេនៅតែប្រព្រឹត្តខុសខ្លះៗដែរ ត្រង់ចំណុចគេបើកឲ្យពលរដ្ឋខ្មែរចូលលេងដោយសេរីទាំងថ្ងៃទាំងយប់ ពោលគឺ២៤ម៉ោងលើ២៤ម៉ោងតែម្តង ប្រឆាំងទៅនឹងបទបញ្ជារបស់សម្តេចប្រមុខរាជរដ្ឋាភិបាល ដែលបានហាមពលរដ្ឋខ្មែរចូលលេងនៅក្នុងកាស៊ីណូ ។
ប្រជាពរដ្ឋនៅតំបន់ជាយដែនខ្មែរ-សៀម ក្រុងប៉ោយប៉ែត បានអំពាវនាវដល់ស្ថាប័នអាជ្ញាធរ ក្រសួងជំនាញមានសមត្ថកិច្ចពាក់ពន្ឋ័ ជួយចាត់វិធានការទប់ស្កាត់និងបង្ក្រាប ឲ្យបានទាន់ពេលវេលា ចៀសវាងកុំឲ្យកើតមានអំពើប្លន់ ចោរកម្ម និងអំពើហិង្សាក្នុងគ្រួសារដែលកើតឡើង ដោយសារតែល្បែងស៊ីសងភ្នាល់បាល់កំពុងពេញនិយមនេះ ៕
ចែករំលែកព័តមាននេះ