ខេត្តមណ្ឌលគិរី ៖ ដំរីព្រៃមួយហ្វូងបានរអិលធ្លាក់ចូលរណ្តៅដីមួយកន្លែង ជម្រៅប្រមាណ៣ម៉ែត្រ បង្កការភ្ញាក់ផ្អើលជាខ្លាំងដល់ប្រជាពលរដ្ឋស្ទើរពេញផ្ទៃប្រទេស កាលពីថ្ងៃទី២៥ ខែមីនា ឆ្នាំ២០១៧ ខណៈពួកវាកប់
ខេត្តមណ្ឌលគិរី ៖ ដំរីព្រៃមួយហ្វូងបានរអិលធ្លាក់ចូលរណ្តៅដីមួយកន្លែង ជម្រៅប្រមាណ៣ម៉ែត្រ បង្កការភ្ញាក់ផ្អើលជាខ្លាំងដល់ប្រជាពលរដ្ឋស្ទើរពេញផ្ទៃប្រទេស កាលពីថ្ងៃទី២៥ ខែមីនា ឆ្នាំ២០១៧ ខណៈពួកវាកប់ក្នុងភក់ល្បាប់អស់ជាច្រើនម៉ោង ទើបមន្ត្រីបរិស្ថាន និងប្រជាពលរដ្ឋរស់នៅជិតកន្លែងកើតហេតុអាចជួយសង្គ្រោះពួកវាឲ្យងើបចេញពីរណ្តៅភក់ល្បាប់នោះបាន។
ប្រតិបត្តិការដែលបានប្រើពេលវេលាអស់ជិត១០ម៉ោង និងជាប្រតិបត្តិការលើកទីមួយសម្រាប់មន្ត្រីជំនាញលើវិស័យព្រៃឈើ-សត្វព្រៃ ក្នុងប្រទេសកម្ពុជា ដែលកម្រកើតមានជាទីបំផុត បានជួយស្រោចស្រង់ជីវិតសត្វដំរីចំនួន១១ក្បាល ទាំងធំ និងតូចពីរណ្តៅមរណៈ។ នៅកន្លែងកើតហេតុគេសង្កេតឃើញមានមនុស្សប្រុសស្រី ក្មេងចាស់ រាប់សិបនាក់ឈរត្រៀមត្រាជុំវិញមាត់រណ្តៅបេ (តាមអ្នកភូមិនិយាយថា ជារណ្តៅដែលអាមេរិកបានទម្លាក់គ្រាប់ពីយន្តហោះ) ដើម្បីតាមដានពីសកម្មភាពជួយសង្គ្រោះសត្វដ៏កម្រដែលកំពុងរស់នៅទាំងភិតភ័យក្នុងព្រៃដែនជម្រកសត្វព្រៃកែវសីមា។
បន្ទាប់ពីទទួលព័ត៌មានថា មានហ្វូងដំរីដើរធ្លាក់ក្នុងរណ្តៅដីរួចមក មន្ត្រីជំនាញបរិស្ថានដែលទទួលភារកិច្ចបន្តការងារពីរដ្ឋបាលព្រៃឈើ ដើម្បីការពារ ថែរក្សា និងអភិរក្ស ព្រៃឈើ-សត្វព្រៃ ក្នុងខេត្តមណ្ឌលគិរី បានរូតរះចេញដំណើរពីស្នាក់ការធ្វើការ ដោយក្នុងដៃប្រដាប់ដោយ ចប ប៉ែល និងដែកត្បែងជាច្រើនដើម ដើម្បីសហការជាមួយប្រជាពលរដ្ឋជួយកកាយដីមាត់រណ្តៅឲ្យទាបងាយស្រួលដល់សត្វដំរីវាឡើងគោក។
ក្រោមការខិតខំប្រឹងជីកកកាយដីពីសំណាក់មន្ត្រីឧទ្យានុរក្ស និងប្រជាពលរដ្ឋតាំងពីវេលាថ្ងៃត្រង់ ថ្ងៃទី២៥ រហូតដល់វេលាម៉ោង៣និង៣០នាទីរសៀល ដើម្បីឱ្យមានច្រកផ្លូវដ៏សមល្មមមួយសម្រាប់ដំរីវារដើរឡើងគោកវិញ ។ ក្រោយពេលដែលជីករួចរាល់ហើយ សត្វដំរីចំនួន១០ក្បាលក៏បានវាចេញពីរណ្តៅភក់មរណៈដោយមានគ្នីគ្នា(ដំរីដូចគ្នា) ជួយរុញគូទពីក្រោយ ទើបអាចឡើងគោករួច ព្រោះតែពួកវាបានជាប់ក្នុងរណ្តៅយូរពេក បណ្តាលឲ្យមានការហេវហត់ខ្វះកម្លាំង។ បើកុំតែមានមនុស្សជួយបាញ់ទឹកឲ្យ ម្ល៉េះពួកវាអាចនឹងមានគ្រោះថ្នាក់ដល់ជិវីតទាំងហ្វូងផងក៏មិនដឹង។
យ៉ាងណាក៏ដោយ ប្រតិបត្តិការជួយសង្គ្រោះសត្វដំរីនេះមិនបានបញ្ចប់ត្រឹមម៉ោង៣រសៀលទេ ព្រោះកូនដំរីតូចជាងគេមួយក្បាលមិនអាចឡើងច្រាំងរួច ដូច្នេះអ្នកចូលរួមហេតុការណ៍ខាងលើ ក៏បានបន្តកាយដីធ្វើផ្លូវម្តងទៀតរហូតដល់ម៉ោង៦ល្ងាចថ្ងៃដដែល ដើម្បីឲ្យកូនដំរីកំសត់អាចងើបចេញពីរណ្តៅភក់ចង្រៃបាន ហើយប្រតិបត្តិជួយសង្គ្រោះគ្រួសារដំរីនេះក៏ត្រូវបានបញ្ចាប់ជាស្ថាពរ។
សូមរំឮកថា ដំរីចំនួន១១ក្បាលនៅក្នុងដែនជម្រកសត្វព្រៃកែវសីមា បានដើររអិលធ្លាក់ចូលក្នុងរណ្ដៅភក់ កាលពីវេលាម៉ោង៩ព្រឹក ថ្ងៃទី២៥ ខែមីនា ឆ្នាំ២០១៧ ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី។ ក្រោយមានហេតុការណ៍នេះ លោកកែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបា នដឹកនាំកម្លាំងមន្ត្រីឧទ្យានុរក្សដែនជម្រកសត្វព្រៃកែវសីមា ដើម្បីចុះជួយសង្គ្រោះសត្វដំរីទាំង១១ក្បាលនោះ។ រហូតមកដល់ល្ងាច ថ្ងៃទី២៥ មីនា ក្រុមការងារមន្ទីរបរិស្ថានខេត្ត ដឹកនាំដោយលោក កែវ សុភគ៌ ប្រធានមន្ទីរបរិស្ថានខេត្ត បានជីករណ្ដៅដីដើម្បីជួយសង្គ្រោះសត្វដំរីទាំង១១ក្បាលនោះបានដោយសុវត្ថិភាព ហើយដំរីទាំងអស់នោះក្រោយពីសង្គ្រោះបានហើយ ក៏នាំរត់ចូលទៅក្នុងព្រៃវិញអស់ទៅ ។
សូមបញ្ជាក់ថា តំបន់ដែលមានសត្វព្រៃក្នុងខេត្តមណ្ឌលគិរី បានរងការកាប់ទន្ទ្រានយកដីពីជនខិលខូចអស់ជាច្រើនម៉ឺនហិចតានាមួយទស្សវត៍ចុងក្រោយនេះ។ ក្នុងនោះតំបន់សំខាន់ៗដែលកំពុងរងគ្រោះមានតំបន់ដែនជម្រកសត្វព្រៃកែវសីមា តំបន់ដែនជម្រកសត្វព្រៃស្រែពក តំបន់ដែនជម្រកសត្វព្រៃភ្នំព្រេច និងដែនជម្រកសត្វព្រៃណាំលៀជាដើម៕
ចែករំលែកព័តមាននេះ