នាវាទេសចរណ៍ខ្នាតយក្សនាំភ្ញៀវជិត4.000នាក់មកទស្សនាកម្ពុជា
ខេត្តព្រះសីហនុ ៖ នាវាទេសចរណ៍ DIAMOND PRENCESS ជានាវាប្រភេទយក្សបាននាំភ្ញៀវទេសចរចម្រុះជាតិសាសន៍ជិត ៤.០០០នាក់
ខេត្តព្រះសីហនុ ៖ នាវាទេសចរណ៍ DIAMOND PRENCESS ជានាវាប្រភេទយក្សបាននាំភ្ញៀវទេសចរចម្រុះជាតិសាសន៍ជិត ៤.០០០នាក់
ខេត្តព្រះសីហនុ ៖ នាវាទេសចរណ៍ DIAMOND PRENCESS ជានាវាប្រភេទយក្សបាននាំភ្ញៀវទេសចរចម្រុះជាតិសាសន៍ជិត ៤.០០០នាក់ ចូលមកទស្សនកិច្ចនៅកម្ពុជាតាមច្រកកំពង់ផែសមុទ្រក្រុងព្រះសីហនុ ។
នៅព្រឹកថ្ងៃទី២៣ មីនា នាវាទេសចរណ៍បរទេសធុនយក្សមួយគ្រឿងនេះ បានបោះយុថ្កាក្នុងលម្ហសមុទ្រចម្ងាយប្រមាណជា២ម៉ាយពីកំពង់ផែអន្តជាតិក្រុងព្រះសីហនុ ក្នុងគោល បំណងធ្វើទស្សនកិច្ចនៅព្រះរាជាណាចក្រកម្ពុជារយៈពេលមួយថ្ងៃ មុននឹងចាកចេញទៅកាន់ប្រទេសថៃ ។
លោកវរសេនីយ៍ទោ ង៉ុយ ជៀន ប្រធាននគរបាលប៉ុស្តិ៍ច្រកទ្វារកំពង់ផែអន្តរជាតិក្រុងព្រះសីហនុ បានឱ្យដឹងថា នាវាទេសចរណ៍ DIAMOND PRENCESS សញ្ជាតិ British មានបណ្តោយ២៨៨,៣៣ម៉ែត្រ ទទឹង ៤១,៥០ ម៉ែត្រ និងជម្រៅទឹក៨,៥៧ម៉ែត្រ ។ នាវានេះបានដឹកភ្ញៀវទេសចរបរទេសចម្រុះជាតិសាសន៍មានចំនួន២.៧៦០នាក់ ស្រី១.៤៩៤នាក់ មាន ៤២សញ្ជាតិ និងមាននាវិកសរុបចំនួន១.០៨៤នាក់ ស្រី២០០នាក់ មាន៤៩សញ្ជាតិ ។
នាវា DIAMOND PRENCESS នេះបានចាកចេញពីប្រទេសវៀតណាម ចូលចតកំពង់ផែអន្តជាតិក្រុងព្រះសីហនុ នៅវេលាម៉ោង៦និង ៤០នាទីព្រឹកថ្ងៃទី២៣ មីនា និងមានគម្រោងចាកចេញពីលម្ហសមុទ្រកំពង់ផែអន្តរជាតិក្រុងព្រះសីហនុ ឆ្ពោះទៅកាន់ប្រទេសថៃ នៅវេលាម៉ោង៤រសៀលថ្ងៃដដែល ។
ភ្ញៀវទេសចរដែលធ្វើដំណើរតាមនាវា DIAMOND PRENCESS ភាគច្រើនមានវ័យចំណាស់ច្រើនជានិវត្តជន ហើយភ្ញៀវដែលមានសញ្ជាតិច្រើនជាងគេនៅលើនាវានោះមានដូចជា ជនជាតិអូស្ត្រាលី ចំនួន១.០៣៨នាក់ អង់គ្លេស ៦៨៣នាក់ អាមេរិក ៣២៤នាក់ និងក្រៅពីនោះមានភ្ញៀវទេសចរសញ្ជាតិផ្សេងៗជាច្រើនទៀត ។
នៅក្នុងការចូលចតនាវាខាងលើ ភ្ញៀវទេសចរបរទេស បានធ្វើដំណើរទស្សនាកម្សាន្តតាមតំបន់រមណីយដ្ឋានវប្បធម៌ ទីប្រជុំជនក្នុងក្រុងព្រះសីហនុ តំបន់ឆ្នេរសមុទ្រ ភូមិនេសាទ (ទំនប់រលក) ។ ប្រភពខាងលើបានឲ្យដឹងទៀតថា ការកើនឡើងនៃភ្ញៀវទេសចរតាមនាវា នៅដើមឆ្នាំ២០១៧នេះ ដោយសារឆ្នេរសមុទ្រកម្ពុជា ត្រូវបានដាក់បញ្ចូលជាសមាជិកក្លិបឆ្នេរស្អាតជាងគេលើសកលលោក ធ្វើឱ្យមានការទាក់ទាញភ្ញៀវទេសចរបរទេសមកលេងកម្សាន្តនៅប្រទេសកម្ពុជា មានការកើនឡើងពីមួយឆ្នាំទៅមួយឆ្នាំគួរឲ្យកត់សម្គាល់ ។
ម្យ៉ាងទៀតដោយសារខេត្តព្រះសីហនុ ធានាបាននូវសន្តិសុខ សុវត្ថិភាពសម្រាប់ភ្ញៀវទេសចរ ជាពិសេសខេត្ត មានការអភិវឌ្ឍរីកចម្រើនលើគ្រប់វិស័យនូវហេដ្ឋារចនាសម្ពន្ធ័នានាជាបន្តបន្ទាប់ ពិសេសកោះទាំង៣២កំពុងត្រូវបានកែលម្អក្លាយជាតំបន់ទេសចរណ៍បែបធម្មជាតិ ដ៏ស្រស់ត្រកាលមានដូច ជាតំបន់កោះតូច-កោះរ៉ុងសន្លឹម សុខសាន្ត កោះឫស្សី និងមានកោះមួយចំនួនទៀត ។
គួរបញ្ជាក់ឲ្យដឹងផងដែរថា ភ្ញៀវទេសចរដែលធ្វើដំណើរតាមនាវាទេសចរណ៍ DIAMOND PRENCESS បានបន្តដំណើរទៅទស្សនានៅក្រុងអង្គរ ខេត្តសៀមរាបចំនួន៤នាក់ ស្រី២នាក់ មាន១សញ្ជាតិ និងមានភ្ញៀវទេសចរបរទេសមកពីខេត្តសៀមរាប ចំនួន២៧នាក់ ស្រី ១២នាក់ មាន៦សញ្ជាតិមកបន្តដំណើរតាមនាវាខាងលើចេញតាមច្រកកំពង់ផែសមុទ្រអន្តរជាតិ ក្រុងព្រះសីហនុ ឆ្ពោះទៅកាន់ប្រទេសថៃ ៕
ចែករំលែកព័តមាននេះ