កក្តាគ្រោះធម្មជាតិបានបំផ្លិចបំផ្លាញលំនៅឋានប្រជាពលរដ្ឋ ផ្លូវថ្នល់ដីស្រែចំការ រួមទាំងផលដំណាំគ្រប់ប្រភេទ ត្រូវបានទទួលរងការខូចខាតយ៉ាងដំណំ ក្រោយពីទឹកជំនន់ជន់លិចកាលពីក្នុងអំឡុងរដូវខែវស្សា ខណៈពេលទឹកភ្លៀងធ្លាក់ជោកជាំកន្លងទៅនេះ
ខេត្តឧត្តរមានជ័យ ៖ កក្តាគ្រោះធម្មជាតិបានបំផ្លិចបំផ្លាញលំនៅឋានប្រជាពលរដ្ឋ ផ្លូវថ្នល់ដីស្រែចំការ រួមទាំងផលដំណាំគ្រប់ប្រភេទ ត្រូវបានទទួលរងការខូចខាតយ៉ាងដំណំ ក្រោយពីទឹកជំនន់ជន់លិចកាលពីក្នុងអំឡុងរដូវខែវស្សា ខណៈពេលទឹកភ្លៀងធ្លាក់ជោកជាំកន្លងទៅនេះ ស្ថិតក្នុងស្រុកអន្លង់វែង ខេត្តឧត្តរមានជ័យ។
ប្រជាពលរដ្ឋដែលជាកសិករប្រកបមុខរបរផ្នែកកសិកម្ម នៅក្នុងស្រុកអន្លង់វែង បានរៀបរាប់ឲ្យដឹងនៅព្រឹកថ្ងៃទី១៦ ខែតុលា ឆ្នាំ២០២២ នេះថា ក្នុងរដូវវខែស្សានេះ ទឹកភ្លៀងបានធ្លាក់ជារៀងរាល់ថ្ងៃ បានបង្កឲ្យទឹកហូរធ្លាក់ពីលើកំពូលភ្នំដងរ៉ែក រួចហូរបុកចូលតាមអាង ប្រឡាយ បឹងប៊ួ ធ្វើឱ្យទឹកហក់ឡើងជន់លិចលំនៅឋាន ផ្លូវថ្នល់ និងស្រែចំការរបស់ពួកគាត់។ ហើយខណៈពេលទឹកបានថយស្រកទៅវិញនោះ ពួកគាត់បានខកចិត្តយ៉ាងខ្លាំងនៅពេលដែលឃើញផលដំណាំគ្រប់ប្រភេទ បានទទួលរងការខូចខាតជាច្រើន ហើយក៏អស់ក្តីសង្ឃឹមទៅលើផ្នែកជីវភាពនាពេលខាងមុខទៀតផង។
ទាក់ទិនទៅនឹងកក្តាគ្រោះធម្មជាតិបំផ្លិចបំផ្លាញផ្ទះសម្បែង ចំការស្រែ ផលដំណាំរបស់ប្រជាពលរដ្ឋ ផ្លូវថ្នល់ កន្លងទៅ នៅក្នុងរដូវខែវស្សា ជាមួយគ្នានេះដែរ លោក ងួន ទ្ធីរិទ្ធ អភិបាលស្រុកអន្លង់វែង បានដឹងថា ទំហំផលប៉ះពាល់នៃការខូចខាតនៅក្នុងស្រុកអន្លង់វែង គឺមានដូចជា ៖ ខូចលូចំនួន៥០កង់ ស្ពានចំនួន១៥កន្លែង ផ្លូវចំនួន៦៦កន្លែង ដែលមានប្រវែង១១២,៩៦៦ម៉ែត្រ ដំណាំស្រូវចំនួន១,១១៣ហិកតា ដំឡូងមីចំនួន៩,៤៨៤ហិកតា ដំណាំរួមផ្សំចំនួន២៦ហិកតា និងផលប៉ះពាល់ទឹកជំនន់ជន់លិចផ្ទះរបស់ប្រជាពលរដ្ឋចំនួន៥,៣៤៥ខ្នងផ្ទះ។
លោកអភិបាលស្រុកបានបញ្ជាក់ថា ក្រោយពីទឹកជំនន់បានថយស្រកទៅវិញ លោកបានដឹកនាំក្រុមប្រឹក្សាឃុំ កម្លាំងនគរបាលប៉ុស្តិ៍ ប្រជាការពារ ដោយមានការចូលរួមពីក្រុមការងារយុវជនបក្សស្រុក បក្សឃុំ សរុបចំនួនប្រមាណជាង៣០នាក់ បាននាំយកពូជស្រូវ IR៣៦ ចំនួន ៥៥០គីឡូក្រាម ដែលជាអំណោយឯកឧត្តមទេសរដ្ឋមន្ត្រី គន់ គីម សមាជិកអចិន្ត្រៃយ៍ គណៈកម្មាធិការកណ្តាល និងជាប្រធានក្រុមការងារគណបក្សចុះជួយខេត្តឧត្តរមានជ័យ និងអំណោយក្រុមការងារយុវជនបក្សស្រុក យកទៅជួយព្រោះស្រូវនៅលើដីស្រែប្រជាពលរដ្ឋដែលរងការខូចខាត ដោយសារគ្រោះទឹកជំនន់កន្លងមក ស្ថិតនៅភូមិអូរតាម៉េង ឃុំអន្លង់វែង ស្រុកអន្លង់វែង ហើយនឹងចុះជួយព្រោះស្រូវតាមស្រែនីមួយៗរបស់បងប្អូនប្រជាពលឋដ្ធចំនួន៥គ្រួសារ ក្នុងផ្ទៃដីចំនួន៦ហិចតា បានរួចរាល់ផងដែរ។
លើសពីនេះ កន្លងទៅ លោកតែងតែបានចុះជួយព្រោះស្រូវជូនប្រជាពលរដ្ឋ និងជួយសាងសង់លំនៅឋានដែលទទួលរងការខូចខាតដោយសារគ្រោះធម្មជាតិ ជួសជុលផ្លូវថ្នល់ ស្ពានជូនប្រជាពលរដ្ឋធ្វើចរាចរណ៍បណ្តោះអាសន្នសិនផងដែរ និងបន្តចុះជួយដល់ផលដំណាំស្រូវប្រជាពលរដ្ឋជាបន្តបន្ទាប់ទៀត៕
ចែករំលែកព័តមាននេះ