ខេត្តបន្ទាយមានជ័យ ៖ មនុស្ស២នាក់បានរងរបួសធ្ងន់ដោយសារត្រូវរន្ទះបាញ់ កាលពីវេលាម៉ោងប្រមាណ៣រសៀលថ្ងៃទី១០ ខែតុលា ឆ្នាំ២០២២កន្លងទៅ នៅភូមិដូនណូយ ឃុំទ្រាស ស្រុកស្វាយចេក ។
នគរបាលមូលដ្ឋានបានឲ្យដឹងថា ជនរងគ្រោះទាំង២នាក់នេះ ម្នាក់ឈ្មោះ ធួរ ចក់ ភេទប្រុស អាយុ៦៥ឆ្នាំ ជាម្ចាស់ផ្ទះ និងម្នាក់ទៀតឈ្មោះ ឈឺន ឈួយ ភេទប្រុស អាយុ៤១ឆ្នាំ ជាអ្នកមើលក្របី រស់នៅក្នុងភូមិ ឃុំ ខាងលើជាមួយគ្នា ។
ប្រភពដដែលឲ្យដឹងទៀតថា មុនពេលកើតហេតុគឺមានភ្លៀងធ្លាក់ ហើយពេលនោះបុរសឈ្មោះ ធួរ ចក់ បានជ្រកនៅក្រោមដើមស្វាយមុខផ្ទះរបស់ខ្លួនចម្ងាយប្រហែល១០ម៉ែត្រ ។ បន្តិចក្រោយមក បុរសឈ្មោះ ឈឺន ឈួយ ជាអ្នកមើលក្របី ក៏ទៅជ្រកនៅក្រោមដើមស្វាយជាមួយដែរ ហើយក៏ស្រាប់តែមានរន្ទះបាញ់ដើមស្វាយនោះ បណ្តាលឲ្យត្រូវអ្នកទាំង២នាក់រងរបួសធ្ងន់ ។
ជនរងគ្រោះទាំង២នាក់ ត្រូវបានក្រុមគ្រួសារដឹកយកទៅសង្គ្រោះនៅមន្ទីរព្យាបាលរុងរឿង ក្នុងស្រុកស្វាយចេក ហើយមកដល់ថ្ងៃទី១១ ខែតុលា ឆ្នាំ២០២២ គឺបានធូរស្រាលវិញហើយ ។ ជាបម្រាម ចៀសវាងរន្ទះបាញ់ពេលមេឃកំពុងធ្លាក់ភ្លៀង មិនត្រូវជ្រកក្រោមដើមឈើនោះទេ ៕
ចែករំលែកព័តមាននេះ