ខេត្តមណ្ឌលគិរី ៖ ក្រោយក្រុមគ្រួសារបញ្ជូនជនរងគ្រោះក្នុងករណីសង្ស័យថា ពុលស្រា.សនៅខេត្តមណ្ឌលគិរីហើយបានជួយសង្គ្រោះនៅក្នុងមន្ទីរពេទ្យមណ្ឌលគិរី និងខេត្តកំពង់ចាម
ខេត្តមណ្ឌលគិរី ៖ ក្រោយក្រុមគ្រួសារបញ្ជូនជនរងគ្រោះក្នុងករណីសង្ស័យថា ពុលស្រា.សនៅខេត្តមណ្ឌលគិរីហើយបានជួយសង្គ្រោះនៅក្នុងមន្ទីរពេទ្យមណ្ឌលគិរី និងខេត្តកំពង់ចាមបានចាកចេញពីមន្ទីរពេទ្យវិញហើយនៅថ្ងៃទី២០ ខែមីនា ឆ្នាំ២០១៧ បន្ទាប់ពីអាការមានភាពធូរស្រាលឡើងវិញ ។ ចំណែកស្រា.សដែលសេសសល់ពីជនរងគ្រោះផឹកត្រូវបានបញ្ជួនទៅត្រួតពិនិត្យនៅរាជធានីភ្នំពេញដើម្បីស្វែងរកការពិត ។
លោក ប៊ុន សួរ ប្រធានមន្ទីរសុខាភិបាលខេត្តមណ្ឌលគិរីនាថ្ងៃច័ន្ទនេះបានថ្លែងឲ្យដឹងថា កាលពីថ្ងៃទី១៨ ខែមីនា ឆ្នាំ២០១៧ក្រោយផ្ទុះករណីសង្ស័យពុលស្រាក្រុមកាងារបានចុះដល់គោលដៅភ្លាមដើម្បីត្រួតពិនិត្យ ។ លោកថា លទ្ធផលពិសោធនៅមិនទាន់ទទួលបានលទ្ធផលនៅឡើយគ្រាដែលលោកបានផ្ញើរទៅមន្ទីរពិសោធន៍កាលពីថ្ងៃអាទិត្យ ។ លោកប្រធានមន្ទីរបានបញ្ជាក់ថា ករណីនេះជាជំហានដំបូងក្រុមកាងារបានចុះសិក្សានៅកន្លែងចែកចាយ និងកន្លែងផលិតនៅក្នុងភូមិសាស្ត្រកើតហេតុហើយបានណែនាំដល់អាជីវករ និងពលរដ្ឋត្រូវតែបញ្ឈប់ការលក់ ឬហូបស្រា.សណាដែលគ្មានលិខិតអនុញ្ញាតត្រឹមត្រូវពីមន្ទីរជំនាញជាបន្ទាន់ចៀសវាងដូចករណីសង្ស័យខាងលើ ។
លោក តូច យ៉ុន ស្នងការនគរបាលខេត្តមណ្ឌលគិរីបញ្ជាក់ថា ករណីខាងលើមន្ត្រីជំនាញកំពុងតែបន្តការស្រាវជ្រាវលើស្រា.ស ដែលសង្ស័យនោះហើយ ចំពោះលទ្ធផលនៅមិនទាន់មានការបញ្ជាក់ពីថ្នាក់លើនៅឡើយ ។ ដូចគ្នានេះដែរលោក ចាន់ វាសនា ប្រធានសាខាកាំកុងត្រូលខេត្តមណ្ឌលគិរីបានឲ្យដឹងថា លទ្ធផលគឺនៅមិនទាន់ដឹងនៅឡើយព្រោះលោកកំពុងយកគំរូស្រា.ស ចូលក្នុងឡាបូពិសោធន៍នៅថ្ងៃច័ន្ទ ។ លោកថា ករណីប្រសិនបើស្រា.សមិនបានរកឃើញថា មានជាតិពុលហួសកម្រិតនោះគេអាចវិនិច្ឆ័យទៅលើសាច់ ឬគ្រឿងក្លែមដែលពួកគេហូបដូច្នេះប្រសិនបើរកមិនឃើញពិតមែននោះជំនាញពិបាកក្នុងការស្រាវជ្រាវហើយដោយមិនដឹងថា ជនរងគ្រោះហូបអ្វីខ្លះនោះ ។
មុនពេលបញ្ជួនដល់មន្ទីរពេទ្យកំពង់ចាមជនរងគ្រោះឈ្មោះ ឌៀប តាក់ បានដាច់ខ្យល់ស្លាប់បន្តទៀត ។ ដូច្នេះករណីខាងលើសមត្ថកិច្ចសន្និដ្ឋានជំហានដំបូងគឺមានមនុស្សស្លាប់ទាក់ទិន និងការផឹកស្រា.សចំនួនបីនាក់ដោយនៅថ្ងៃទី១៥ ខែមីនា ឆ្នាំ២០១៧ ឈ្មោះ ភួង ភាក់ ស្លាប់ក្រោយផឹកស្រា នៅថ្ងៃទី១៦ ខែមីនា ឆ្នាំ២០១៧ ឈ្មោះ ញឹប ម៉ិច បានស្លាប់ក្រោយទៅផឹកស្រាបុណ្យសព ភួង ភាក់ នៅថ្ងៃទី១៧ ខែមីនា ឆ្នាំ២០១៧ មានមនុស្ស១០នាក់ត្រូវបញ្ជូនទៅមន្ទីរពេទ្យក្រោយមានអាការមិនស្រួលខ្លួនក្រោយផឹកស្រាក្នុងកម្មវិធីបុណ្យសពឈ្មោះ ញឹប ម៉ិច ហើយនៅព្រឹកថ្ងៃទី១៨ ខែមីនា ឆ្នាំ២០១៧ ឈ្មោះ ឌៀប តាក់ បានស្លាប់ជាបន្តក្រោយពីបញ្ជូនទៅសង្គ្រោះបន្ទាន់បានមួយយប់បន្ទាប់ពីផឹកស្រានៅផ្ទះសពឈ្មោះ ញឹប ម៉ិច ។ ទោះយ៉ាងណាមន្ត្រីជំនាញកំពុងដុតដៃដុតជើងចុះស្រាវជ្រាវលំអិតពីករណីស្លាប់ដ៏អាថ៌កំបាំងនេះ ។ ចំណែកប្រភពស្រា.សត្រូវគេអះអាងថាបិទនៅក្នុងមូលដ្ឋាននោះផ្ទាល់តែម្តងហើយអ្នកលក់គេមិនបានទទួលព័ត៌មានអំពីការឃាត់ខ្លួននៅឡើយ ៕
ចែករំលែកព័តមាននេះ