តវ៉ាសុំបិទអាជីវកម្មបូមខ្សាច់របស់វៀតណាម
ខេត្តកំពង់ឆ្នាំង ៖ ប្រជាពលរដ្ឋរស់នៅក្នុងភូមិស្រងាំទេ ឃុំប្រស្នឹប ស្រុករលាប្អៀរ ជាច្រើនគ្រួសារកាលពីព្រឹកថ្ងៃទី១៨ ខែមីនា ឆ្នាំ២០១៧ បានលើកគ្នាតវ៉ាសុំអាជ្ញាធរខេត្ត
ខេត្តកំពង់ឆ្នាំង ៖ ប្រជាពលរដ្ឋរស់នៅក្នុងភូមិស្រងាំទេ ឃុំប្រស្នឹប ស្រុករលាប្អៀរ ជាច្រើនគ្រួសារកាលពីព្រឹកថ្ងៃទី១៨ ខែមីនា ឆ្នាំ២០១៧ បានលើកគ្នាតវ៉ាសុំអាជ្ញាធរខេត្ត និងមន្ទីរជំនាញ ឱ្យបញ្ឈប់អាជីវកម្មបូមខ្សាច់មួយកន្លែងដែលកំពុងធ្វើសកម្មភាពបូមខ្សាច់តាមដងអូរក្នុងភូមិបង្កការប៉ះពាល់ដល់អ្នកភូមិ ។
ប្រជាពលរដ្ឋបានលើកឡើងថា ក្រុមហ៊ុនបូមខ្សាច់ខាងលើមិនដឹងថាមាន ឬអត់ច្បាប់នោះទេតែបានធ្វើសកម្មភាពបូមខ្សាច់ក្នុងភូមិប្រមាណជិត១ឆ្នាំហើយការបូមខ្សាច់ដែលដឹងថា មានថៅកែឈ្មោះ ទ្រី ជនជាតិវៀតណាមខាងលើនេះបានបង្កឱ្យខូចខាតផ្លូវមួយខ្សែដែលទើបកសាងបានយ៉ាងស្អាតក្រោមប្រាក់បដិភាគឃុំ ។
ចំណុចនេះពួកគាត់បានបញ្ជាក់ថា តាំងពីដើមមកការធ្វើដំណើរជួបការលំបាករាប់ឆ្នាំណាស់មកហើយប៉ុន្តែ២ឆ្នាំចុងក្រោយនេះផ្លូវក្នុងភូមិបានកសាងយ៉ាងស្អាតពួកគាត់មានចិត្តសប្បាយរីករាយព្រោះបានផ្លូវធ្វើដំណើរបានស្រួល និងឆាប់រហ័ស ប៉ុន្តែគួរសោកស្តាយរយៈពេលចុងក្រោយនេះបន្ទាប់ពីមានក្រុមហ៊ុនដឹកខ្សាច់ខាងលើមកធ្វើសកម្មភាពមក បានបង្កឱ្យខូចផ្លូវខាងលើនេះខូចខាតអស់ជាច្រើនកន្លែង។ ម្យ៉ាងវិញទៀតការបូមខ្សាច់ខាងលើក៏បានធ្វើឱ្យប៉ះពាល់ក្បាលដីស្រែរបស់ប្រជាពលរដ្ឋបាក់ចូលអូរផងដែរ ។ ក្រៅពីបញ្ហាទាំងនេះ ពួកគាត់ជាប្រជាពលរដ្ឋក៏ស្នើទុកខ្សាច់នៅក្នុងភូមិសម្រាប់ប្រជាពលរដ្ឋកសាងលំនៅដ្ឋាន និងកសាងហេដ្ឋារចនាសម្ព័ន្ធក្នុងភូមិមាន វត្តអារាម និងសាលារៀនជាដើម ។
ជុំវិញបញ្ហានេះលោក អ៊ុក រស់ ប្រធានមន្ទីររ៉ែ និងថាមពលបានប្រាប់តាមទូរស័ព្ទថា អាជីវកម្មខាងលើមានច្បាប់អនុញ្ញាតត្រឹមខេត្តព្រោះទំហំខ្នាតតូច ត្រឹម១ហិកតាចុះក្រោម ប៉ុន្តែទោះមានការអនុញ្ញាតក្តីបើមានផលប៉ះពាល់ដល់ប្រជាពលរដ្ឋក៏មិនអាចធ្វើបានដែរ ហើយបើមានការតវ៉ាមែននឹងមានអន្តរមន្ទីរ ពិសេសមន្ទីរបរិដ្ឋានចុះទៅពិនិត្យដល់កន្លែងទីតាំងអាជីវកម្មពិនិត្យថា តើផលប៉ះពាល់នោះដល់កំរិតណា? ប៉ុន្តែមកដល់ពេលនេះលោកមិនទាន់ឃើញលិខិតស្នាមតវ៉ាអ្វីនៅឡើយ ។
ទោះយ៉ាងនេះក្តីប្រជាពលរដ្ឋមានពាក្យបណ្តឹងសុំបញ្ឈប់អាជីវកម្មបូមខ្សាច់នេះដោយមានស្នាមមេដៃប្រជាពលរដ្ឋជាង១០០នាក់រួចហើយ និងបានដាក់ជូនអាជ្ញាធរមូលដ្ឋានដែរតែមិនឃើញមានដំណោះស្រាយពួកគាត់ប្រាប់ថា នៅថ្ងៃចន្ទដើមសប្តាហ៍នេះ និងយកពាក្យបណ្តឹងទាំងនោះដាក់ជូនមន្ទីរដើម្បីសុំជួយអន្តរាគមន៍ ៕
ចែករំលែកព័តមាននេះ