រាជធានីភ្នំពេញ ៖ កម្មការិនីចំនួន៧៣នាក់ និងកម្មករម្នាក់ ខណៈកំពុងធ្វើការងារនៅក្នុងរោងចក្រកាត់ដេរសម្លៀកបំពាក់ «ធៀន
ស៊ុង» ស្ថិតនៅក្នុងបុរី ប៊ុន ហួរ ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ស្រាប់តែដួលសន្លប់ជាបន្តបន្ទាប់កាលពីវេលាម៉ោង៨ និង២០នាទីព្រឹកថ្ងៃទី១៨ មីនា ហើយត្រូវបានខាងតំណាងរោងចក្រដឹកបញ្ជូនទៅកាន់គ្លីនិកឯកជន ដើម្បីសង្គ្រោះបន្ទាន់ភ្លាមៗ ។
តាមប្រភពព័ត៌មានបានឲ្យដឹងថា ការដួលសន្លប់នោះមិនទាន់ត្រូវបានដឹងពីមូលហេតុច្បាស់លាស់នៅឡើយទេ ដោយអ្នកខ្លះមានការសង្ស័យថា បណ្ដាលមកពីការភ្ញាក់ផ្អើល ពេលមានទុស្សេឆេះកាប៊ីនភ្លើង នៅក្នុងរោងចក្រនោះកាលពី១ថ្ងៃមុន ពេលនៃការដួលសន្លប់នេះ ព្រោះនៅក្នុងពេលនោះបានធ្វើឲ្យកម្មការិនីមានការភិតភ័យយ៉ាងខ្លាំង ហើយក៏មានកម្មការិនីចំនួន៥នាក់ ដួលសន្លប់ទៀតផង ។
ចំណែកអ្នកខ្លះទៀត បានដាក់ការសង្ស័យថា បណ្ដាលមកពីបញ្ហាអាកាសធាតុ និងបរិស្ថាននៅក្នុងរោងចក្រអាប់អួ គួបផ្សំនឹងកម្មករធ្វើការហួសកម្លាំង មានសុខភាពខ្សោយ ទ្រាំនឹងក្លិនគីមីក្នុងក្រណាត់មិនបាន ទើបដួលសន្លប់តែម្ដង ។ ប៉ុន្តែទោះជាបែបណា កំពុងស្ថិតនៅក្នុងការស្រាវជ្រាវរបស់មន្ត្រីជំនាញពាក់ព័ន្ធនៅឡើយ ។
ចំណែករោងចក្រត្រូវបានបិទទ្វារជាបណ្ដោះអាសន្ន រង់ចាំការស្រាវជ្រាវរកមូលហេតុពិតប្រាកដ ។ប្រភពខាងលើបានបន្តថា អ្នកដែលសន្លប់ត្រូវបានគេដឹកទៅកាន់គ្លីនិកឯកជនដើម្បីសង្គ្រោះបន្ទាន់ ដោយឡែកអ្នកដែលមិនដួលសន្លប់ត្រូវបានថៅកែរារាំងឲ្យនៅបន្តធ្វើការមិនឲ្យសម្រាកឡើយ ។
ប៉ុន្តែពួកគេទាំងនោះមិនព្រមឡើយ ហើយនាំគ្នាសម្រុករត់ចេញក្រៅរោងចក្រប្រសេចប្រសាចត្រឡប់ទៅផ្ទះរៀងៗខ្លួន ដែលធ្វើឲ្យស្ថានភាពពេលនោះរញ៉េរញ៉ៃយ៉ាងខ្លាំង ។ ចំណែករោងចក្រក៏បានបិទទ្វារជាបណ្ដោះអាសន្នដែរ និងមិនដឹងថាត្រូវបើកទ្វារវិញនៅពេល ណានោះទេ ដោយរង់ចាំការស្រាវជ្រាវរកមូលហេតុនៃការដួលសន្លប់នោះពីសំណាក់មន្ត្រីជំនាញរួចរាល់សិន ៕
ចែករំលែកព័តមាននេះ