ក្រសួងអប់រំបង្កើតក្លឹបយុវជនមិត្តអប់រំមិត្ត
រាជធានីភ្នំពេញ៖ រដ្ឋលេខាធិការក្រសួងអប់រំ យុវជន និងកីឡាលោក ពិត ចំណាន បានជំរុញឲ្យវិទ្យាល័យនានាបង្កើតក្លឹបយុវជនមិត្តអប់រំមិត្ត អ្នកចេះច្រើនបង្រៀន អ្នក ចេះតិច ។
រាជធានីភ្នំពេញ៖ រដ្ឋលេខាធិការក្រសួងអប់រំ យុវជន និងកីឡាលោក ពិត ចំណាន បានជំរុញឲ្យវិទ្យាល័យនានាបង្កើតក្លឹបយុវជនមិត្តអប់រំមិត្ត អ្នកចេះច្រើនបង្រៀន អ្នក ចេះតិច ។
ការថ្លែងអំពាវនាវនេះធ្វើឡើងក្នុងពិធីបំពាក់កន្សែងដល់យុវជនកាកបាទក្រហមកម្ពុជាថ្មី ប្រចាំសាកលវិទ្យាល័យន័រតុន (NU) កាលពីថ្ងៃទី១៨ មីនា ២០១៧ ។ លោករដ្ឋលេខាធិការក្រសួងអប់រំក៍បានក្រើនរំឭកដល់យុវជននៅកម្ពុជា ត្រូវកសាងអនុស្សាវរីយ៍ដ៏ល្អនៅក្នុងសាលារៀន និងជាមួយមិត្ត កុំឲ្យមិត្តមួយចំនួនធ្លាក់ចូលក្នុងគ្រឿងញៀន ។ លោក ពិត ចំណានបន្តថា នេះជាភារកិច្ចសម្រាប់យុវជនកាកបាទក្រហមកម្ពុជានៅគ្រប់សាលាទាំងអស់ ត្រូវអប់រំគ្នាទៅវិញទៅមក ទើបសង្គមកម្ពុជា មានការរីកចម្រើនកាន់តែខ្លាំង ។
សាកលវិទ្យាធិការនៃសាកលវិទ្យាល័យន័រតុន លោក ចាន់ សុខឃាង បានឲ្យដឹងថា បច្ចុប្បន្នសាកលវិទ្យាល័យន័រតុន បានយកចិត្តទុកដាក់ពង្រឹង និងពង្រីកកម្លាំង ព្រមទាំងបណ្ដាញយុវជនកាកបាទក្រហមកម្ពុជា ស្របតាមទិសដៅយុទ្ធសាស្ដ្រនៃវិស័យស្នូលទី៤ គឺអភិវឌ្ឍន៍ស្ថាប័ន និងអភិវឌ្ឍន៍ធនធាន របស់កាកបាទក្រហមកម្ពុជា ។
ដោយឡែកណោក្នុងឱកាសនោះដែរ ប្រធានក្លឹមយុវជនកាកបាទក្រហមកម្ពុជាប្រចាំសាកលវិទ្យាល័យន័រតុន លោក ណាំ ហុង បានបញ្ជាក់ថា «យុវជននៅកម្ពុជាចងចាំ មិនភ្លេចនូវគំនិត និងប្រកាន់ភ្ជាប់នូវវប្បធម៌ចែករំលែក ដោយដើរស្របតាមគំនិតដ៏ខ្ពង់ខ្ពស់ ប្រកបដោយព្រហ្មវិហាធម៌ បេះដូងមនុស្សធម៌ របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ផ្ដោតទៅលើការស្វែងរកមូលនិធិសម្រាប់ទ្រទ្រង់ក្លឹបយុវជនកាកបាទក្រហមកម្ពុជា ដើម្បីទុកជាទុនសម្រាប់ដោះស្រាយ រាល់បញ្ហាលំបាកនានារបស់និស្សិតនៅកម្ពុជាផងដែរ»។
សូមរំលឹកថា សាកលវិទ្យាល័យន័រតុន បានបណ្ដុះបណ្ដាលធនធានយុវជនកាកបាទក្រហមកម្ពុជា និងជាមូលដ្ឋានចំនួន៤លើក ៖ លើកទី១នៅឆ្នាំ២០១០ មានយុវជនសរុបចំនួន១១០នាក់ ,លើកទី២ នៅឆ្នាំ២០១៤ មានយុវជនសរុបចំនួន១៣២ នាក់ ,លើកទី៣ នៅឆ្នាំ២០១៥ មានយុវជនសរុបចំនួន២២នាក់ ,និងវគ្គបណ្ដុះបណ្ដាលលើកទី៤ គឺមានយុវជនសរុបចំនួន ១៥៣នាក់៕
ចែករំលែកព័តមាននេះ