ដោយសារស្ថានភាពទឹកជំនន់ឆ្នាំនេះ ខ្ពស់ជាងឆ្នាំងចាស់ ធ្វើឱ្យស្រូវស្រាលបង្កើនរដូវ របស់ប្រជាពលរដ្ឋ ក្នុងស្រុកចំនួន៣ បានរងការប៉ះពាល់ចំនួនប្រមាណ៨០០ហិកតា ហើយបើសិនជាក្នុងរយៈពេល១សប្តាហ៍ ស្ថានភាពទឹកមិនស្រកចុះ ឬស្រកយឺតនោះ ស្រូវជាច្រើនហិកតានឹង
ខេត្តកំពង់ឆ្នាំង ៖ ដោយសារស្ថានភាពទឹកជំនន់ឆ្នាំនេះ ខ្ពស់ជាងឆ្នាំងចាស់ ធ្វើឱ្យស្រូវស្រាលបង្កើនរដូវ របស់ប្រជាពលរដ្ឋ ក្នុងស្រុកចំនួន៣ បានរងការប៉ះពាល់ចំនួនប្រមាណ៨០០ហិកតា ហើយបើសិនជាក្នុងរយៈពេល១សប្តាហ៍ ស្ថានភាពទឹកមិនស្រកចុះ ឬស្រកយឺតនោះ ស្រូវជាច្រើនហិកតានឹងត្រូវខូចខាតទាំងស្រុងតែម្តង។ នេះជាកាបញ្ជាក់របស់លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង ដែលបានបញ្ជាក់ប្រាប់ភ្នាក់ងារយើងនៅសៀលថ្ងៃទី១១ ខែតុលា ឆ្នាំ២០២២នេះ ។
លោក ងិន ហ៊ុន បានបញ្ជាក់ថា នៅថ្ងៃម្សិលម៉ិញ (គឺថ្ងៃទី១០ ខែតុលា ឆ្នាំ២០២២) រូបលោក និងមន្ត្រីនៃមន្ទីរកសិកម្ម បានអមដំណើរ ឯកឧត្តម ឱម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ រួមនឹងក្រុមការងារក្រសួង ចុះពិនិត្យវា.យតម្លៃផលប៉ះពាល់ដោយសារទឹកជំនន់ ចំពោះដំណាំស្រូវស្រាលបង្កើនរដូវ និងដំណាំរួមផ្សំ ស្ថិតក្នុងភូមិសាស្ត្រ ឃុំសែប ស្រុកកំពង់ត្រឡាច, ឃុំគោកបន្ទាយ ស្រុករលាប្អៀរ និងឃុំខុនរ៉ង ឃុំពន្លៃ ស្រុកបរិបូណ៌។
លោក ងិន ហ៊ុន បានបញ្ជាក់បន្តថា ជាលទ្ធផលនៃការចុះពិនិត្យឃើញថា ដោយស្ថានភាពទឹកទន្លេឆ្នាំនេះឡើងខ្ពស់ជាងឆ្នាំចាស់ កម្ពស់២,៦០ម៉ែត្រ (កំពស់ទឹកនៅស្ថានីយផ្សារក្រោមមានកំពស់ ៩,៨០ម៉ែត្រ គិតត្រឹមថ្ងៃទី១០ ខែតុលា) បានធ្វើឲ្យដំណាំស្រូវស្រាលបង្កើនរដូវ ចំនួន ៧៩៩,២០ ហិកតា ទទួលរងនូវផលប៉ះពាល់ដោយសារជំនន់ទឹកទន្លេ។ ប្រសិនបើទឹកទន្លេ មិនស្រក ឬស្រកយឺតក្នុងរយៈពេល១សប្តាហ៍ ស្រូវនឹងទទួលការខូចខាតទាំងស្រុង ហើយផ្ទៃដីខូចខាតទាំងអស់នោះ អាចនឹងត្រូវស្តារឡើងវិញនៅពេលទឹកស្រកផុត។
សូមរំលឹកដែរថា ជារៀងរាល់ឆ្នាំ នៅពេលមានទឹកជំនន់ជន់ឡើងខ្ពស់បង្កការខូចខាតដំណាំស្រូវរបស់ប្រជាពលរដ្ឋ ក្រសួងកសិកម្មតាមរយៈមន្ទីរកសិកម្មខេត្តកំពង់ឆ្នាំង តែងតែនាំយកស្រូវពូជមកផ្តល់ជូនប្រជាពលរដ្ឋ ដែលរងការខូចខាត ដើម្បីពួកគាត់មានលទ្ធភាពស្តារឡើងវិញ នៅពេលទឹកទន្លេស្រកចុះ៕
ចែករំលែកព័តមាននេះ