ខេត្តបន្ទាយមានជ័យ ៖ កងកម្លាំងអាវុធហត្ថក្រុងប៉ោយប៉ែតដឹកនាំដោយលោក ជា ដា ធ្វើការឃាត់ខ្លួនក្រុមថៅកែផ្ទះល្វែង៤នាក់កាលពីព្រឹកថ្ងៃទី១៨ មីនា បន្ទាប់ពីធ្វើសកម្មភាពយកកាំបិតខ្វែវ
ខេត្តបន្ទាយមានជ័យ ៖ កងកម្លាំងអាវុធហត្ថក្រុងប៉ោយប៉ែតដឹកនាំដោយលោក ជា ដា ធ្វើការឃាត់ខ្លួនក្រុមថៅកែផ្ទះល្វែង៤នាក់កាលពីព្រឹកថ្ងៃទី១៨ មីនា បន្ទាប់ពីធ្វើសកម្មភាពយកកាំបិតខ្វែវដេញកាប់ប្រជាពលរដ្ឋ ខណៈកំពុងធ្វើផ្លូវចាក់បេតុងក្នុងភូមិសាមគ្គីមានជ័យ សង្កាត់-ក្រុងប៉ោយប៉ែត ។
លោក ជា ដា មេបញ្ជាការអាវុធហត្ថក្រុងប៉ោយប៉ែតបានឱ្យដឹងថា ជនសង្ស័យដែលត្រូវសមត្ថកិច្ចឃាត់ខ្លូនមានឈ្មោះ អ៊ុង ម៉ាប់ ភេទប្រុស អាយុ៥៩ឆ្នាំ ជាឪពុក ជាថៅកែសំណង់ផ្ទះល្វែង, ទី២-ឈ្មោះ អ៊ុង សុខណា ភេទប្រុស អាយុ១៧ឆ្នាំ, ទី៣-ឈ្មោះ អ៊ុង សុខយី ភេទប្រុស អាយុ២៦ឆ្នាំ ពួកគេទាំង២នាក់ជាកូន និងទី៤-ឈ្មោះ មុំ រតនា ភេទប្រុស អាយុ២៧ឆ្នាំ ជាអ្នកនៅជាមួយពួកគេមានមុខរបរលក់ដូរនៅផ្សាររោងក្លឿ ។ ចំណែកឯជនរងគ្រោះដែលត្រូវជនសង្ស័យដេញកាប់មានឈ្មោះ កៅ សេងអាន ភេទប្រុស អាយុ៣៦ឆ្នាំ ជាអាជីវករ, ទី២-ឈ្មោះ អ៊ិន តារាវុធ ភេទប្រុស អាយុ៣៨ឆ្នាំ ជាអាជីវករ, និងទី៣-ឈ្មោះ នួន នីគីដា ភេទប្រុស អាយុ៣៨ឆ្នាំ ជាអាជីវករផ្សារថៃ ។
តំណាងពលរដ្ឋរងគ្រោះម្នាក់ឈ្មោះ អ៊ិន តាវុធ បានអះអាងថា មុនពេលកើតហេតុរូបគាត់ និងពលរដ្ធដ៏ទៃ សរុបមានគ្នា៣០គ្រួសារ រស់នៅតាមបណ្តោយផ្លូវ បានរៃលុយគ្នាចាក់បេតុងកាត់ភូមិក្នុងប្រយោជន៍រួម ដើម្បីឱ្យពលរដ្ឋបានធ្វើដំណើរងាយស្រួលទាំងអស់គ្នាតែត្រូវបានជនសង្ស័យម្នាក់ឈ្មោះ អ៊ុង ម៉ាប់ បានលើកគ្នាមករារាំង និងយកកាំបិតខ្វែវដេញកាប់ប្រជាពលរដ្ឋមិនឱ្យធ្វើផ្លូវឡើយ ដោយជនសង្ស័យបានអះអាងថា ដីនេះ ជារបស់ខ្លួនបានកាន់កាប់ជាយូរឆ្នាំមកហើយក្រោយពីមានការតវ៉ាគ្នារហូតដល់តឹងសរសៃ.កក៏ផ្ទុះជាហិង្សា ។
រឿងហេតុដែលកើតឡើងនេះគឺកាលពីជាង១០ឆ្នាំមុនជនសង្ស័យ អ៊ុង ម៉ាប់ បានទិញដីចំការពុះល្វែងលក់ឱ្យពលរដ្ឋ ហើយក្នុងលិខិតស្នាមទិញលក់ព្រំដីក៏ទល់ផ្លូវ ហើយទីតាំងនេះក៏ជាគម្រោងផ្លូវចាស់ដែលអ្នកស្រុកប្រើប្រាស់រាប់សិបឆ្នាំមកផងដែរ ស្រាប់តែនៅពេលដីឡើងថ្លៃ ជនសង្ស័យបានព្យាយាមយកដីផ្លូវនេះដើម្បីសាងសង់ផ្ទះល្វែងលក់ តែត្រូវបានអ្នកស្រុកលើកគ្នាមកតវ៉ាជាច្រើនលើក តែលើកចុងក្រោយនេះជនសង្ស័យបានយកកាំបិតខ្វែវដេញកាប់ពួកគាត់ពេលកំពុងឈូសឆាយធ្វើផ្លូវបេតុង ។
លោក នួន នីណារ៉ូ មេបញ្ជាការរងកងរាជអាវុធហត្ថក្រុងប៉ោយប៉ែតបានឱ្យដឹងដែលថា ការប្រើហិង្សារហូតឈានដល់ការយកកាំបិតដេញកាប់ចាក់គ្នាជាអំពើរខុសច្បាប់ ហើយដីដែលជនសង្ស័យចេញមុខមកកាងក៏មិនមែនជាដីរបស់ឯកជនដែរ នរណាក៏គេដឹងដែរថា ជាដីផ្លូវ ហើយក៏មិនមែនផ្លូវថ្មីដែរ គឺផ្លូវចាស់កាត់ភូមិដែលស្ថិតក្នុងគម្រោងអភវិឌ្ឍន៍ក្រុងផងដែរ ៕
ចែករំលែកព័តមាននេះ