រាជធានីភ្នំពេញ ៖ ប្រភពពីសមត្ថកិច្ចបានបង្ហើបនៅព្រឹកថ្ងៃទី១៨ មីនា នេះ ពាក់ព័ន្ធករណីបំផ្ទុះគ្រាប់នៅក្នុងទូ ATM របស់ធនាគារមួយមុខមន្ទីរពេទ្យកុមារជាតិ ដែលបណ្តាលឱ្យរងការខូចខាតស្ទើរទាំងស្រុងនោះបានឱ្យដឹងថា គឺមានជនសង្ស័យម្នាក់ចូលទៅទូនោះ មុនពេលផ្ទុះ តែមិនទាន់កំណត់ថា គឺជាជនដៃដល់ឬយ៉ាងណានោះទេ ។ នេះបើយោងតាមកាមេរ៉ាសុវត្ថិភាព ។
ទោះបីជាយ៉ាងណា នៅព្រឹកថ្ងៃដដែល គេឃើញកម្លាំងមន្ត្រីជំនាញ, មន្ត្រីស៊ីម៉ាក់ និងមានព្រះរាជអាជ្ញាធររងលោកសៀង សុខ បានធ្វើការបន្តត្រួតពិនិត្យ និងស្រាវជ្រាវនៅកន្លែងកើតហេតុនោះ ។
គួររំលឹកថា ទូម៉ាស៊ីន ATM របស់ធនាគារមួយកន្លែងត្រូវបានផ្ទុះ ដោយសង្ស័យមានមនុស្សលួចដាក់គ្រាប់បែកបំផ្ទុះ បណ្តាលឱ្យខូចខាតស្ទើរទាំងស្រុង ហេតុការណ៍នេះបានបង្កឱ្យភ្ញាក់ផ្អើលទាំងកណ្តាលអធ្រាត្រ នៅវេលាម៉ោង១២ និង៤៥នាទីចូលថ្ងៃទី១៨ មីនា ស្ថិតនៅចំណុចមុខមន្ទីរពេទ្យកុមារជាតិ តាមបណ្តោយផ្លូវសហព័ន្ធរុស្សី ក្នុងសង្កាត់ទឹកល្អក់១ ខណ្ឌទួលគោក។
តាមប្រភពពីសន្តិសុខក្នុងមន្ទីរពេទ្យកុមារជាតិថា នៅមុនពេលកើតហេតុ វេលាម៉ោងខាងលើ មិនមាននរណាម្នាក់ឃើញហេតុការណ៍នេះច្បាស់ទេ ដោយគ្រាន់តែឮសូរលាន់ផ្ទុះដូចគ្រាប់បែក ហើយសង្ស័យថា រថយន្តបែកកង់ ព្រោះកន្លងមកតែងតែមានរថយន្តបែកកង់ជាញឹកញាប់ ។ ស្របពេលនោះ បាននាំគ្នាចេញទៅមើល ស្រាប់តែឃើញម៉ាស៊ីន ATMខ្ទេច ដោយផ្ទុះកញ្ចក់ប៉ើងចេញមកក្រៅខូចខាតស្ទើរទាំងស្រុង តែមិនទាន់ផ្ទុះដល់ទូដែកដាក់លុយនោះទេ ។
ប្រភពឱ្យដឹងទៀតថា ដោយសារតែអ្នកឯកទេសគ្រប់គ្រងទូ ATM ទទួលសញ្ញាប្រកាសអាសន្នពីទូ ATM ក៏នាំគ្នាមកពិនិត្យមើលទូដកប្រាក់ដែលមានបញ្ហានោះ ពេលមកដល់កន្លែងកើតហេតុបានឃើញកញ្ចក់ទូដកប្រាក់បែកកញ្ចក់ពាសពេញលើផ្លូវ ។
បើតាមការបញ្ជាក់ពីអ្នកជំនាញទូATMថា កន្លងមកទូ ATM គ្រប់សាខា គឺមិនដែលមានបញ្ហាដូចករណីខាងលើនោះទេ ហើយមិនពាក់ព័ន្ធនឹងករណីទុស្សេខ្សែភ្លើងទេ ព្រោះការតភ្ជាប់ប្រព័ន្ធភ្លើងកម្រិតស្តង់ដារត្រឹមត្រូវ ។ ដោយឡែក នៅជាប់នឹងទូ ATM មាន បំពាក់កាំមេរ៉ាសុវត្ថិភាព ប៉ុន្តែពេលដែលផ្ទុះភ្លាមៗនេះ កាមេរ៉ាសុវត្ថិភាពមានបញ្ហាមិនទាន់អាចឆែកបាននៅឡើយទេ ។
ក្រោយកើតហេតុ សមត្ថកិច្ចខណ្ឌបានចុះទៅ និងយកខ្សែហ៊ុមព័ទ្ធការពារកន្លែង ដើម្បីរង់ចាំផ្នែកជំនាញពិនិត្យកោសល្យវិច័យ ។ បន្ទាប់ពីពិនិត្យរួចហើយ សមត្ថកិច្ចមិនទាន់អះអាងថា ជាករណីអ្វីពិតប្រាកដនៅឡើយ ។
ចែករំលែកព័តមាននេះ