រាជធានីភ្នំពេញ ៖ គិតពីថ្ងៃចាប់ផ្តើមរហូតដល់ពេលនេះ ប្រជាពលរដ្ឋបានទទួលសេវាប្តូរ និងពន្យាប័ណ្ណបើកបរនៅផ្សារទំនើប AEON MALL ជិត៣ម៉ឺននាក់។ អង្គភាពផ្តល់ប័ណ្ណបើកបរ រាជធានីភ្នំពេញ អំពាវនាវឲ្យពលរដ្ឋ ណាដែលមានប័ណ្ណបើកបរហួសសុពលភាព ឬបាត់ប័ណ្ណបើកបរសូមឲ្យនាំគ្នារួសរាន់ទៅប្តូរ ឬពន្យា នៅផ្សារទំនើប AEON MALL រាជធានីភ្នំពេញ ដោយមន្ត្រីជំនាញនៅរង់ចាំទទួលធ្វើជូន គ្រប់ពេលដែលផ្សារទំនើបនេះបើកទ្វារ។
លោក មាស ចន្ថា ប្រធានអង្គភាពផ្តល់ប័ណ្ណបើកបរ និងសុវត្ថិភាពចរាចរណ៍ផ្លូវគោក នៃមន្ទីរសាធារណៈការ និងដឹកជញ្ជូនរាជធានីភ្នំពេញបានឲ្យកោះសន្តិភាពដឹងតាមរយៈទូរស័ព្ទនៅព្រឹកថ្ងៃទី១៧ មីនា ២០១៧នេះថា ជាលទ្ធផលក្នុងរយៈពេល៩ខែគិតចាប់ពីថ្ងៃចាប់ផ្តើម ថ្ងៃទី១៥ មិថុនា ដល់ថ្ងៃទី១៦ មីនា ២០១៧នេះ ក្រុមការងារទទួលធ្វើប័ណ្ណបើកបរ នៅផ្សារទំនើប AEON MALL បានចំនួន២៨.៣៣២ ប័ណ្ណក្នុងនោះ ប្តូរចំនួន២.៦៣០៤ ប័ណ្ណ ទុតិយតា បានចំនួន១.៩៩៤ប័ណ្ណ តតិយតា ៧ប័ណ្ណ និងប្រឡងថ្មីចំនួន១៤ប័ណ្ណផងដែរ ។
លោកបន្តថា ចំណែកការងារផ្តល់ប័ណ្ណបើកបរ នៅអង្គភាពផ្តល់ប័ណ្ណបើកបរ និងសុវត្ថិភាពចរាចរណ៍ផ្លូវគោក នៃមន្ទីរសាធារណៈការ និងដឹកជញ្ជូនរាជធានីភ្នំពេញឯណោះវិញ ក្រុមការងារបានខិតខំធ្វើជូនប្រជាពលរដ្ឋ បានចំនួន២.៥៤១ប័ណ្ណ គិតចាប់ថ្ងៃទី៩កុម្ភៈ ដល់ថ្ងៃទី១៦មីនា នេះ។ លោក មាស ចន្ថា បានបញ្ជាក់ថា បើតាមលទ្ធភាពក្រុមការងារធ្វើបានរាប់រយក្នុងមួយថ្ងៃ ដោយហេតុថា ការធ្វើប័ណ្ណបើកបរដែលរៀបចំឡើងដោយក្រសួងសាធារណៈការនេះ មានលក្ខណៈទំនើប គឺបម្រើសេវារហ័សទាន់ចិត្ត ប្រើរយៈពេលតែ២០នាទីប៉ុណ្ណោះសម្រាប់មនុស្សម្នាក់។
នេះប្រសិនបើមានឯកសារគ្រប់គ្រាន់ តែពេលនេះប្រជាពលរដ្ឋនៅមិនទាន់ទទួលបានព័ត៌មាន ដែលធ្វើនៅផ្សារទំនើប AEON MALL នេះឲ្យបានស៊ីជម្រៅនោះទេ ចំពោះការផ្តល់សេវា ធ្វើជារៀងរាល់ថ្ងៃ ចាប់ពីផ្សារបើក និងបិទទៅវិញ និងទទួលសម្រាប់២៥រាជធានី ខេត្ត ឬទូទាំងប្រទេសតែម្តង។
សូមបញ្ជាក់ថា ការរៀបចំឲ្យមាន មណ្ឌលប្តូរ និងពន្យាប័ណ្ណបើកបរ នៅផ្សារទំនើប AEON Mall នេះ ធ្វើឡើងក្នុងគោលបំណង ដើម្បីបង្ខិតសេវាឲ្យទៅជិតប្រជាពលរដ្ឋ បង្កភាពងាយស្រួល ចំណេញពេលវេលា កាត់បន្ថយការចំណាយ ប្រកប ដោយប្រសិទ្ធភាព និងតម្លាភាព ដែលអនុញ្ញាតឲ្យប្រជាជនខ្មែរទូទាំង២៥រាជធានីខេត្ត អាចទៅទទួលសេវាប្តូរ និងពន្យាប័ណ្ណបើកបរយានយន្ត រៀងរាល់ថ្ងៃ ចាប់ពីម៉ោង០៩ព្រឹក រហូតដល់ម៉ោង១០យប់ផងដែរ ៕
ចែករំលែកព័តមាននេះ