រាជធានីភ្នំពេញ ៖ ដើម្បីចូលរួមលើកកម្ពស់ការប្រើប្រាស់អំបិលអីុយ៉ូតនៅកម្ពុជាឱ្យមានកម្រិតកាន់តែច្រើនថែមទៀត អគ្គនាយកដ្ឋានកាំកុងត្រូល បានប្រកាសចាត់វិធានការក្តៅ ចំពោះសិប្បកម្ម ឬកន្លែងផលិតអំបិលទាំងអស់ ប្រសិនបើ
រាជធានីភ្នំពេញ ៖ ដើម្បីចូលរួមលើកកម្ពស់ការប្រើប្រាស់អំបិលអីុយ៉ូតនៅកម្ពុជាឱ្យមានកម្រិតកាន់តែច្រើនថែមទៀត អគ្គនាយកដ្ឋានកាំកុងត្រូល បានប្រកាសចាត់វិធានការក្តៅ ចំពោះសិប្បកម្ម ឬកន្លែងផលិតអំបិលទាំងអស់ ប្រសិនបើមន្ដ្រីកាំកុងត្រូលរកឃើញថា មិនមានដាក់ជាតិអីុយ៉ូតក្នុងអំបិលតាមកម្រិតស្ដង់ដារទេនោះ នឹងត្រូវដកហូតមិនឱ្យធ្វើអាជីវកម្មតែម្ដង ។
លោក ឌឹម ថេង អគ្គនាយករងនៃអគ្គនាយកដ្ឋានកាំកុងត្រូល ក្រសួងពាណិជ្ជកម្ម បានបញ្ជាក់ថា «ចាប់ពីពេលនេះតទៅ អគ្គនាយកដ្ឋានកាំកុងត្រូល នឹងប្រមូលយកអំបិលទាំងអស់ទាំងនៅតាមសិប្បកម្ម និងការដាក់លក់នៅលើទីផ្សារ មកធ្វើការពិសោធន៍ ដើម្បីស្វែងរកសារធាតុអីុយ៉ូត ហើយអំបិលទាំងអស់មានប៉ុន្មានប្រភេទ និងមានកម្រិតជាតិអីុយ៉ូតក្នុងទំហំប៉ុន្មាន សម្រាប់រៀបចំធ្វើជារបាយការណ៍ និងមានវិធានការកំណត់ឱ្យបានច្បាស់លាស់» ។
លោកអគ្គនាយករងបន្ដថា ជាជំហានបន្ដក្នុងករណីរកឃើញអំបិលដែលមិនមានសារធាតុអីុយ៉ូត មន្ដ្រីកាំកុងត្រូលនឹងតម្រូវឱ្យអ្នកលក់់ប្រមូលអំបិលទាំងអស់ យកទៅដល់កន្លែងទិញមកពីសិប្បកម្ម ឬកន្លែងផលិត ដែលត្រូវមានកិច្ចសន្យារវាងអ្នកទិញនិងអ្នកផលិត ដើម្បីបញ្ជាក់ថា អំបិលនេះពិតជាមានជាតិអីុយ៉ូតពិតប្រាកដមែន ចៀសវាងលក់អំបិលដាក់ស្លាកសញ្ញាថា មានជាតិអីុយ៉ូត ប៉ុន្ដែមិនមានជាតិអីុយ៉ូតទៅវិញ ។
លោកបានអះអាងថា ចំពោះអំបិលក្លែងក្លាយដែលលួចយកអំបិលគ្មានជាតិអីុយ៉ូតទៅដាក់ឬច្រកក្នុងថង់ ឬស្បោងសរសេរថា អំបិលមានជាតិអីុយ៉ូតនោះ កាំកុងត្រូលត្រូវចាត់វិធាន ការរឹបអូសយកតែម្ដង ចំពោះសិប្បកម្ម ឬកន្លែងផលិតដែលក្លែងបន្លំនោះ ។
លោក ឌឹម ថេង គូសបញ្ជាក់ថា «ការប្រើប្រាស់សារធាតុអីុយ៉ូតកំពុងមានការខ្វះខាតច្រើនសម្រាប់ប្រជាជនកម្ពុជា ក្នុងការចូលរួមជួយទ្រទ្រង់ដល់រូបរាងកាយ និងសតិបញ្ញារបស់មនុស្ស ។ អគ្គនាយកដ្ឋានកាំកុងត្រូល ទទួលបានឧបករណ៍ត្រួតពិនិត្យរកសារធាតុអីុយ៉ូតចំនួន៣០គ្រឿងពីអង្គការយូនីសេហ្វ សម្រាប់ចែកជូនដល់សាខាកាំកុងត្រូលរាជធានី-ខេត្ដ ដើម្បីស្វែងរកកម្រិតសារធាតុអីុយ៉ូតនៅក្នុងអំបិល ដែលជាកម្មវិធីអាហារូបត្ថម្ភមួយយ៉ាងសំខាន់ក្នុងការចូលរួមតាមដាន ការបញ្ចូលជាតិអីុយ៉ូតទៅក្នុងអំបិលនៅតាមសិប្បកម្ម ឬកន្លែងផលិតអំបិលនៅក្នុងប្រទេសកម្ពុជា» ។
លោកអគ្គនាយករងបានពន្យល់ថា កម្រិតជាតិអីុយ៉ូតដែលត្រូវដាក់បញ្ចូលក្នុងអំបិលនេះ គឺសម្រាប់សិប្បកម្ម ឬកន្លែងផលិតត្រូវដាក់អីុយ៉ូតប្រមាណ៦០មីល្លីក្រាមក្នុងអំបិល១គីឡូក្រាម ហើយសម្រាប់កន្លែងលក់រាយនៅលើទីផ្សារអាចបញ្ចូលកម្រិតជាតិអីុយ៉ូតប្រមាណ៣០ទៅ៦០មីល្លីក្រាម ក្នុង១គីឡូក្រាមអំបិល ។
ចែករំលែកព័តមាននេះ