អ្នកទោសជិត800នាក់ត្រូវផ្ទេរទៅកាន់ពន្ធនាគារថ្មី នៅទូទាំងប្រទេសចំនួនអ្នកទោសកើនឡើង
ខេត្តព្រះសីហនុ ៖ រថយន្តកងទ័ពជាច្រើនគ្រឿង និងមានរថយន្តស៊ីរ៉ែនផងបាននាំក្បួនការពារសន្តិសុខមុខក្រោយ រួមនឹងមន្ត្រីអនុរក្ស មន្ត្រីប៉ូលិស
ខេត្តព្រះសីហនុ ៖ រថយន្តកងទ័ពជាច្រើនគ្រឿង និងមានរថយន្តស៊ីរ៉ែនផងបាននាំក្បួនការពារសន្តិសុខមុខក្រោយ រួមនឹងមន្ត្រីអនុរក្ស មន្ត្រីប៉ូលិស មន្ត្រីកងរាជអាវុធហត្ថ និងមន្ត្រីកងទ័ពជាច្រើន នាក់ផង នៅម៉ោង៧ព្រឹកថ្ងៃទី១៦ មីនា បានរៀបចំក្បួនរថយន្តដើម្បីដឹកបញ្ជូនក្រុមអ្នកទោសមានទណ្ឌិត និងពិរុទ្ធជនប្រុសស្រីជិត៨០០នាក់ ចេញពីអគារពន្ធនាគារចាស់ដែលស្ថិតនៅក្នុងសង្កាត់លេខ៣ ក្រុងព្រះសីហនុឆ្ពោះទៅកាន់អគារពន្ធនាគារថ្មី ដែលទើបនឹងសាងសង់រួចមានចំនួន៣អគារ លើទំហំផ្ទៃដីសរុប៣ម៉ឺនម៉ែត្រការ៉េ ស្មើនឹង៣ហិកតានៅដីតំបន់ក្បាលឆាយក្បែរទីបញ្ជាការតំបន់ប្រតិបត្តិការសឹករងខេត្តព្រះសីហនុ ។
មន្ត្រីអនុរក្សពន្ធនាគារខេត្តបានឱ្យដឹងថា ដោយសារតែអគារពន្ធនាគារចាស់មានសភាពតូចចង្អៀតដែលមានផ្ទៃដីសរុបជិត១ម៉ឺនម៉ែត្រការ៉េ(ជិត១ហិកតា) ហើយអ្នកទោសមានការកើនឡើងជាបន្តបន្ទាប់ផងនោះ ទើបថ្នាក់ដឹកនាំបានសម្រេចសាងសង់អគារពន្ធនាគាថ្មីដែលមានផ្ទៃដីធំទូលាយសម្រាប់ឱ្យក្រុមអ្នកទោសដែលជិតរួចទោសនាំគ្នាធ្វើពលកម្ម ហាត់ប្រាណ និងការបណ្តុះបណ្តាលជំនាញក្នុងការធ្វើកសិកម្ម និងឧស្សាហកម្ម រួមនឹងកែច្នៃសម្ភារប្រើប្រាស់ផ្សេងទៀត ។ ម្យ៉ាងទៀតទីតាំងថ្មីនេះមានបរិយាកាសល្អ ខ្យល់បរិសុទ្ធសម្រាប់អ្នកជាប់ទោសក្នុងពន្ធនាគារ ។
មន្ត្រីដដែលបានឱ្យដឹងទៀតថា តាមផែនការដែលបានគ្រោងទុកក្រុមទណ្ឌិត និងពិរុទ្ធជនទាំងជិត៨០០នាក់នេះត្រូវបានផ្ទេរដឹកទៅដាក់នៅទីតាំងថ្មីដោយប្រើរយៈពេលចំនួន២ថ្ងៃទើបចប់។ ទណ្ឌិតនិងពិរុទ្ធជនដែលបានជាប់ឃុំនៅក្នុងពន្ធនាគារពេលនេះ គិតទាំងស្រី-ប្រុសមានចំនួនសរុប៧៩២នាក់ ។
គួរបញ្ជាក់ផងដែរថា ពន្ធនាគារថ្មីនេះមានចម្ងាយពីទីតាំងអគារពន្ធនាគារចាស់ប្រមាណ៨គីឡូម៉ែត្រ ៕
ចែករំលែកព័តមាននេះ