នាងក្រមុំរោងចក្រនិងជាមេតុងទីនម្នាក់បាត់ខ្លួន2ថ្ងៃម្តាយពិការដើររក
រាជធានីភ្នំពេញ ៖ នាងក្រមុំម្នាក់ជាកម្មការិនីរោងចក្រផលិតស្បែកជើង និងជាមេតុងទីនផងដែរ បានបាត់ខ្លួនអស់រយៈពេល២ថ្ងៃមកហើយដោយមិនដឹងពីមូលហេតុ
រាជធានីភ្នំពេញ ៖ នាងក្រមុំម្នាក់ជាកម្មការិនីរោងចក្រផលិតស្បែកជើង និងជាមេតុងទីនផងដែរ បានបាត់ខ្លួនអស់រយៈពេល២ថ្ងៃមកហើយដោយមិនដឹងពីមូលហេតុ
រាជធានីភ្នំពេញ ៖ នាងក្រមុំម្នាក់ជាកម្មការិនីរោងចក្រផលិតស្បែកជើង និងជាមេតុងទីនផងដែរ បានបាត់ខ្លួនអស់រយៈពេល២ថ្ងៃមកហើយដោយមិនដឹងពីមូលហេតុ ដោយជាប់ទៅជាមួយនូវលុយជិត១ពាន់ដុល្លារ ដែលជាលុយលេងតុងទីន និងប្រាក់ខែរួមជាមួយគ្រឿងអលង្ការ ខ្សែដៃ ខ្សែក និងក្រវិលផងដែរ មិនដឹងថានាងទៅទីណាឡើយ ជាហេតុធ្វើឱ្យម្ដាយដែលជាជនពិការផងមានការព្រួយបារម្ភយ៉ាងខ្លាំង ។
ដោយសារតែការបាត់ខ្លួនកូនស្រីបែបនេះម្តាយរួមជាមួយកូនផ្សេងទៀត និងសាច់ញាតិផង បានធ្វើដំណើរទៅកាន់ប៉ុស្ដិ៍នគរបាលចោមចៅ កាលពីវេលាម៉ោង៦និង៣០នាទីល្ងាចថ្ងៃទី១៤ ខែមីនា ដាក់ពាក្យបណ្ដឹងសុំឱ្យនគរបាលជួយអន្តរាគមន៍ស្វែងរកនាង ដោយមានកាន់រូបថតកូនស្រីសំណព្វចិត្តម្នាក់នោះទៅជាមួយផងដែរ បង្ហាញនគរបាលងាយស្រួលក្នុងការតាមរក ។
ស្ត្រីជាម្ដាយបានប្រាប់ថា គាត់ឈ្មោះ អ៊ាតធី អាយុ៤៧ឆ្នាំ មានទីលំនៅក្នុងភូមិកោះគ្របបាយ ឃុំកំពង់គ ស្រុកកំពង់ស្វាយ ខេត្តកំពង់ធំ ។
ចំណែកកូនស្រីដែលបាត់ឈ្មោះ ស្រស់ ស្រីគន់ ហៅរស្មី អាយុ២២ឆ្នាំ ជាកម្មការិនីរោងចក្រផលិតស្បែកជើងយីហោយូឌីស្កូ ។ នាងក៏ធ្វើជាមេតុងទីនផងដែរ និងស្នាក់នៅផ្ទះជួលជាមួយមិត្តភក្ដិស្រីម្នាក់នៅម្ដុំរោងចក្រកាត់ដេរ ឃ្យូអឹម អាយ ស្ថិតក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ ។
ប្រភពដដែលបន្តថា ដោយសារតែជីវភាពទីទ័លក្រ ម្យ៉ាងគាត់ជាជនពិការ(ស្វិតជើងស្ដាំ)ផង មិនអាចរកស៊ីធ្វើការរឹងមាំកើតនោះ កូនស្រីគាត់រូបនេះបានចាកចេញពីស្រុកកំណើតនៅខេត្តកំពង់ធំ មកធ្វើជាកម្មការិនីរោងចក្រខាងលើអស់រយៈពេល៥ឆ្នាំមកហើយ ។ ចាប់តាំងពីនាងមកធ្វើការកាលណាមក នៅពេលបើកប្រាក់ខែម្តងៗតែងតែផ្ញើប្រាក់តាមវីងឱ្យគាត់ដើម្បីបានចាយវាយមិនដែលអាក់ខានឡើយ ហើយនៅពេលទំនេរចំពេលឈប់សម្រាក តែងតែទៅលេងផ្ទះរហូត ។ គាត់មិនបានដឹងថាកូនស្រីមានទំនាក់ទំនងជាមួយអ្នកណា ឬក៏អត់នោះដែរ ព្រោះគាត់នៅឆ្ងាយពីនាង ។
ស្ត្រីជាម្តាយរៀបរាប់ទៀតថា លុះនៅវេលាម៉ោង៧ព្រឹកថ្ងៃទី១៣ ខែមីនា កូនស្រីគាត់បានប្រាប់មិត្តភក្ដិដែលស្នាក់នៅជាមួយគ្នាថា ទៅធ្វើការហើយក៏បានចេញពីបន្ទប់ជួលបាត់រហូត តែមិនឃើញទៅធ្វើការឡើយ ។ រហូតដល់វេលាល្ងាចថ្ងៃដដែល ដោយមិនឃើញត្រឡប់មកផ្ទះជួលវិញ ហើយទូរស័ព្ទនាងក៏បានបិទហៅមិនចូលទៀត ទើបមិត្តភក្ដិនាងទូរស័ព្ទប្រាប់គាត់ថា កូនស្រីគាត់បាត់ខ្លួនទើបគាត់បានដឹង ។
បន្ទាប់ពីទទួលបានដំណឹងដ៏ភ្ញាក់ផ្អើលនេះ គាត់បានធ្វើដំណើរចាកចេញពីផ្ទះមកភ្នំពេញទាំងទុក្ខព្រួយ ដើម្បីស្វែងរកកូនស្រី ប៉ុន្តែរកមិនឃើញឡើយ ទើបសម្រេចចិត្តប្ដឹងសុំឱ្យនគរបាលជួយស្វែងរកកូនស្រីគាត់ផង ។
គាត់បានរៀបរាប់បន្តថា កូនស្រីគាត់បានធ្វើជាមេតុងទីនផងដែរ ហើយនៅមុនពេលបាត់ខ្លួន នាងបានប្រមូលលុយពីកូនក្រុមបានចំនួន៥០០ដុល្លារ និងនៅថ្ងៃទី១០ ខែមីនា បើកប្រាក់ខែបានចំនួន១៨០ដុល្លារ ។ ជាមួយនេះ នៅមានប្រាក់ធ្វើការថែមម៉ោងមួយចំនួនទៀត ហើយនាងបានក៏បានទូរស័ព្ទប្រាប់គាត់ថានាងបើកលុយដែរ ប៉ុន្តែមិនទាន់បានផ្ញើឱ្យគាត់នៅឡើយទេ ។
លុះក្រោយមក ស្រាប់តែទទួលដំណឹងថា នាងបានបាត់ខ្លួនដោយជាប់ទៅជាមួយនូវលុយខាងលើ រួមជាមួយខ្សែក ខ្សែដៃ និងក្រវិលផង ដែលគាត់មិនបានដឹងថានាងទៅណា មានសេចក្ដីសុខឬទុក្ខយ៉ាងណាឡើយ ។ ពេលនេះប្រសិនបើនាងបានដឹងថាគាត់តាមរក សូមវិលត្រឡប់មកផ្ទះវិញជាបន្ទាន់ ព្រោះគាត់មានការព្រួយបារម្ភខ្លាំងណាស់ ឬមានបងប្អូនណាបានឃើញ សូមជួយប្រាប់ឱ្យនាងវិលវិញផង ។
គួរបញ្ជាក់ថា នេះមិនមែនជាលើកទីមួយទេ សម្រាប់អ្នកដែលបាត់កូនស្រី ហើយបានតាមរកនិងប្តឹងដល់ប៉ុស្ដិ៍នគរបាលចោមចៅបែបនេះ គឺកន្លងមកមានច្រើនមកហើយ ។ មិនតែប៉ុណ្ណោះមិនមែនមានតែអ្នកបាត់កូនស្រីនោះទេ មានទាំងអ្នកបាត់ប្រពន្ធថែមទៀតផង ហើយក៏មិនដែលឃើញអ្នកបាត់ខ្លួនទាំងនោះជួបគ្រោះអកុសលធ្ងន់ធ្ងរឡើយ គឺ៩០ភាគរយច្រើនតែលង់ខ្លួនទៅតាមការលួងលោមរបស់សង្សារឬក៏ប្រុសស្នេហ៍តែប៉ុណ្ណោះ ។
ដោយឡែក នាងក្រមុំដែលបាត់ខ្លួននៅពេលនេះនៅមិនទាន់ដឹងថាមានមូលហេតុអ្វីនៅឡើយទេ ។ ឯស្ត្រីជាម្ដាយមានការព្រួយបារម្ភខ្លាចនាងមានគ្រោះថ្នាក់ ព្រោះនៅជាប់ខ្លួននាងមានលុយ និងគ្រឿងអលង្ការផង ខ្លាចគេនាំទៅសម្លាប់យកលុយ និងគ្រឿងអលង្ការទាំងនោះ ៕
ចែករំលែកព័តមាននេះ