ថ្លើមពាសមេឃដុតស្នាក់ការធ្វើការរបស់សហគមន៏ឆេះហ្មត់
ខេត្តមណ្ឌលគិរី ៖ ស្នាក់ការបណ្ដោះអាសន្នរបស់សហគមន៍ភូមិពូគង់ ស្ថិតក្នុងភូមិពូគង់ ឃុំស្រែព្រះ ស្រុកកែវសីមា ត្រូវជនមិនស្គាល់មុខប្រមាណជា៦០នាក់នាំគ្នាទៅដុតបំផ្លាញខ្ទេច
ខេត្តមណ្ឌលគិរី ៖ ស្នាក់ការបណ្ដោះអាសន្នរបស់សហគមន៍ភូមិពូគង់ ស្ថិតក្នុងភូមិពូគង់ ឃុំស្រែព្រះ ស្រុកកែវសីមា ត្រូវជនមិនស្គាល់មុខប្រមាណជា៦០នាក់នាំគ្នាទៅដុតបំផ្លាញខ្ទេច កាលពីវេលាម៉ោង១០ព្រឹក ថ្ងៃទី១៦ មីនា ដោយពួកគេជិះម៉ូតូសំដៅទៅស្នាក់ការក្នុងដៃមានកាន់ដបសាំង និងបិទមុខ ហើយបានឡោមព័ទ្ធក្រុមការងារឧទ្យានុរក្ស និងមន្ត្រីរដ្ឋបាលការពារអភិរក្សធម្មជាតិដែលប្រចាំការនៅដែនជម្រកសត្វព្រៃកែវសីមា ខណៈនោះពួកគេបានសុំចូលខាងក្នុងស្នាក់ការដោយទាមទារដើម្បីបានកាប់ព្រៃ ដុតឆ្ការ និងដាំដំឡូង ហើយពួកគេមួយចំនួនផ្សេងទៀតបានលួចដុតស្នាក់ការពីខាងក្រោយ ។
មន្ត្រីបរិស្ថានបានឲ្យដឹងថា ជាវិធានការដើម្បីទប់ស្កាត់ការកាប់រុករានដីព្រៃ និងសកម្មភាពដែលផ្ទុយពីច្បាប់ខាងលើក្នុងដែនជម្រកសត្វព្រៃកែវសីមា ប្រធានគម្រោងដែនជម្រកសត្វព្រៃកែវសីមាបានចាត់តាំងកម្លាំងបន្ថែមឲ្យប្រចាំការនៅទីនោះដើម្បីឃ្លាំមើលពីសកម្មភាពកាប់បំផ្លាញព្រៃ ។ ប៉ុន្តែពួកគេមិនត្រឹមតែមិនយល់ព្រមផ្អាកសកម្មភាពកាប់ឆ្ការ បែរជាបំផ្លាញសម្ភាររបស់មន្ត្រីជំនាញខូចខាតរួមមាន អង្រឹង១, ឯកសណ្ឋានកងរាជអាវុធហត្ថ២កំប្លេ, អាគុយ១, ស្បៀងអាហារ និងសម្ភារផ្សេងៗមួយចំនួនទៀតត្រូវភ្លើងឆេះអស់ ។
ស្នាក់ការនេះសាងសង់ឡើងដោយសហគមន៍ភូមិពូគង់ ដែលមានទំហំ៥គុណ៦ម៉ែត្រ ប្រក់ស័ង្កសី ក្នុងគោលបំណងស្នាក់អាស្រ័យ និងសម្រាកបន្ទាប់ពីចុះដើរល្បាត ។ ទោះយ៉ាងណាក៏ដោយនៅពេលនេះកម្លាំងសមត្ថកិច្ចកំពុងស្វែងរកជនដៃដល់ដែលថ្លើមពាសមេឃដុតស្នាក់ការធ្វើការរបស់សហគមន៏ដើម្បីចាត់ការតាមច្បាប់ ៕
ចែករំលែកព័តមាននេះ