បុណ្យសពសម្តេចវិបុលបញ្ញា ថ្ងៃ19 ខែមីនា បូជាសពនៅទីលានឈាបនដ្ឋានមុខវត្តបទុមវតី
រាជធានីភ្នំពេញ ៖ សពសម្តេចវិបុលបញ្ញា សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីបានមកដល់អាកាសយានដ្ឋានអន្តរជាតិភ្នំពេញ
រាជធានីភ្នំពេញ ៖ សពសម្តេចវិបុលបញ្ញា សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីបានមកដល់អាកាសយានដ្ឋានអន្តរជាតិភ្នំពេញ
រាជធានីភ្នំពេញ ៖ សពសម្តេចវិបុលបញ្ញា សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីបានមកដល់អាកាសយានដ្ឋានអន្តរជាតិភ្នំពេញនៅម៉ោងប្រមាណ៥ព្រឹក ថ្ងៃព្រហស្បតិ៍ និងបានដង្ហែទៅភូមិគ្រឹះនៅវេលាម៉ោង៦ព្រឹក ថ្ងៃទី១៦ ខែមីនា ឆ្នាំ២០១៧ ស្ថិតនៅភូមិគ្រឹះលេខ៧០ ផ្លូវ២១៤ សង្កាត់បឹងរាំង ខណ្ឌដូនពេញ ។
កាលពីល្ងាចថ្ងៃ១៥ មីនា រាជរដ្ឋាភិបាលបានធ្វើការប្រកាសជាសាធារណៈពីការទទួលមរណភាពកាលវេលាម៉ោង១៨ និង៣២នាទី ថ្ងៃទី១៥ មីនា នៅមន្ទីរពេទ្យទីក្រុងប៉េកាំងនៃសាធារណរដ្ឋប្រជាមានិតចិនក្នុងជន្មាយុ៦៦ឆ្នាំ ដោយរោគាពាធ ។
កម្មវិធីបុណ្យសពសម្ដេចវិបុលបញ្ញា សុខ អាន ត្រូវបានប្រកាសឱ្យដឹងថា នឹងប្រារព្ធធ្វើឡើងក្នុងរយៈពេល៤ថ្ងៃ នឹងត្រូវធ្វើពិធីបូជានៅទីលានឈាបនដ្ឋានមុខវត្តបទុមវត្តី នៅព្រឹកថ្ងៃទី១៩ ខែមីនាខាងមុខ ។
ក្នុងពិធីទទួលសពមានវត្តមានសម្តេចតេជោ ហ៊ុន សែន នាយករដ្ឋមន្ត្រី និងមន្ត្រីជាន់ខ្ពស់មួយចំនួន របស់រាជរដ្ឋាភិបាលប្រកបដោយទឹកមុខស្រងូតស្រងាត់ និងក្រៀមក្រំបំផុត បានរួមដំណើរតាមជើងយន្តហោះជាមួយគ្នានេះ ពីទីក្រុងប៉េកាំង សាធារណរដ្ឋប្រជាមានិតចិនមកដល់មាតុភូមិ ។
ក្រុមគ្រួសារសពសម្តេចវិបុលបញ្ញា សុខ អាន ឧបនាយករដ្ឋមន្ត្រី ត្រូវបានថ្នាក់ដឹកនាំ និងមន្ត្រីជាន់ខ្ពស់រាជរដ្ឋាភិបាលជាច្រើនរូបបានទៅទទួលនៅព្រលានយន្តហោះអន្តរជាតិជាមួយនឹងអារម្មណ៍ក្តុកក្តួល គោរពដឹងគុណ និងសោកស្តាយស្រណោះ អាឡោះអាល័យជាទីបំផុត ដោយការបាត់បង់សម្តេចវិបុលបញ្ញា សុខ អាន ឧបនាយករដ្ឋមន្ត្រី ដែលជាថ្នាក់ដឹកនាំ ដ៏ឆ្នើមមួយរូប ជាកុលបុត្រ ជាបញ្ញវន្ត និងជាធនធានមនុស្សដ៏សំខាន់មួយរូបរបស់កម្ពុជា ។
ខណៈពេលសពសម្តេចវិបុលបញ្ញា សុខ អាន ឧបនាយករដ្ឋមន្ត្រីបានមកដល់ក៏ត្រូវបានធ្វើពិធីសាសនានៅពេលយន្តហោះចុះមកដល់ដីភ្លាម ដោយមានសម្តេចព្រះសង្ឃរាជ សម្តេចព្រះសង្ឃនាយកសូត្រធម៌ បង្សុកូល និងហែរហមដោយក្បួនរថយន្ត និងម៉ូតូកិត្តិយសប្រកបដោយភាពស្រងូតស្រងាត់ឆ្ពោះទៅកាន់កន្លែងប្រារព្ធពិធីបុណ្យ ស្ថិតនៅគេហដ្ឋានរបស់សម្តេចវិបុលបញ្ញា សុខ អាន នៅផ្លូវសម្តេចប៉ាន ក្នុងរាជធានីភ្នំពេញ ។
គួរបញ្ជាក់ផងដែរថា រាជរដ្ឋាភិបាលកម្ពុជា ក៏បានចេញសេចក្តីសម្រេចក្នុងការបង្កើតគណៈកម្មការ និងអនុគណៈកម្មការរៀបចំពិធីបុណ្យសព គឺជាការគោរព និងតបស្នងនូវគុណបំណាច់ដ៏ធំធេងកាត់ថ្លៃមិនបានដែលសម្តេចវិបុលបញ្ញាឧបនាយករដ្ឋមន្ត្រី បានតស៊ូ លះបង់ទាំងកម្លាំងកាយ កម្លាំងចិត្ត បញ្ញាញាណក្នុងបុព្វហេតុបំរើផលប្រយោជន៍ជាតិមាតុភូមិទាំងមូលនាពេលកន្លងមកនេះ ។
គួរំលឹកផងដែរថា គុណសម្បត្តិ និងស្នាដៃជាច្រើនរបស់សម្តេចវិបុលបញ្ញា សុខ អាន ឧបនាយករដ្ឋមន្ត្រី ជាពិសេសទេពកោសលដ៏ប៉ិនប្រសប់ផ្នែកការទូត បាននាំឲ្យកម្ពុជាមានឈ្មោះល្បីរន្ទឺលើឆាកអន្តរជាតិដូចជា ការដាក់បញ្ចូលប្រាសាទព្រះវិហារ និងប្រាសាទអង្គរវត្តចូលជាសម្បត្តិបេតិកភណ្ឌពិភពលោក និងការងារ
លេចធ្លោជាច្រើនទៀត ដូចជាការដណ្តើមបានជោគជ័យលើរឿងក្តីប្រាសាទព្រះវិហារ ទប់ទប់ជាមួយនឹងប្រទេសជិតខាងដែលរំលោភទន្ទ្រានលើអធិបតេយ្យកម្ពុជាជាដើម ។
ហើយសំខាន់ជាងនេះទៀតនោះ សម្តេចវិបុលបញ្ញា សុខ អាន ក្នុងមួយជីវិតបានឲ្យតម្លៃខ្ពស់បំផុត លើការងារវប្បធម៌ និងលើកកម្ពស់កិត្យានុភាពខ្មែររហូតដល់ជីវិតចុងក្រោយ ។
សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញសេចក្តីសម្រេចមួយ ដោយបង្កើតគណៈកម្មការ ដើម្បីរៀបចំបុណ្យសព ។ គណៈកម្មការរៀបចំបុណ្យសពនេះដឹកនាំដោយ លោកឧបនាយករដ្ឋមន្ត្រី ប៊ិន ឈិន ជាប្រធាន និងសម្តេចព្រះពោធិវង្ស អំ លឹមហេង ព្រះសង្ឃនាយករងទី២ នៃព្រះរាជាណាកចក្រកម្ពុជា ជាអនុប្រធាន រួមទាំងសមាជិកជាច្រើនទៀត ។
មរណភាពសម្តេចវិបុលបញ្ញា សុខ អាន ជាការបាត់បង់ដ៏ធំធេងបំផុត
ការទទួលមរណភាពរបស់សម្តេចវិបុលបញ្ញា សុខ អាន គឺតែ២ថ្ងៃប៉ុណ្ណោះ បន្ទាប់ពីព្រះករុណាព្រះមហាក្សត្រ សម្តេចព្រះបរមនាថ នរោត្តម សីហមុនី បានប្រោសព្រះរាជទានគោរមងារជា «សម្តេចវិបុលបញ្ញា សុខ អាន » ។
មន្ត្រីជាន់ខ្ពស់គណបក្សប្រជាជនកម្ពុជា ថ្លែងថា សម្តេចវិបុលបញ្ញា បានធ្លាក់ខ្លួនឈឺជាច្រើនខែមកហើយ និងបានទៅទទួលការព្យាបាលនៅក្រៅប្រទេស ។ នេះជាការបាត់បង់ដ៏ធំមួយរបស់គណបក្សប្រជាជនកម្ពុជា ដែលជាឥស្សរជនដ៏ឆ្នើមមួយរូប ។
មន្ត្រីដដែលបន្តថា នេះមិនមែនជារឿងធម្មតាទេ តែជាការបាត់បង់ធំធេងណាស់ចំពោះគណបក្សប្រជាជនកម្ពុជា ដែលជាប្រភពធនធានមនុស្សសំខាន់ ប៉ុន្តែការស្លាប់គឺជាក្រឹត្យក្រមធម្មជាតិទៅហើយ គ្មាននរណាម្នាក់គេចផុតបានឡើយ ។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី មានប្រសាសន៍ថា សម្តេចវិបុលបញ្ញា សុខ អាន ជាអតីតអ្នកការទូតដ៏ចំណានមួយរូប និងជាឥស្សរជនខ្មែរ
នាំមុខគេក្នុងកិច្ចការវប្បធម៌ ដោយលោកបានធ្វើឲ្យបេតិកភណ្ឌជាតិខ្មែរ ក្លាយជាបេតិកភណ្ឌពិភពលោក ក្នុងនោះមានប្រាង្គប្រាសាទព្រះវិហារ ។
«លោកបានដាក់ប្រាសាទព្រះវិហារទៅក្នុងបញ្ជីបេតិកភណ្ឌពិភពលោកដោយជោគជ័យ ទោះជាមានឧបសគ្គយ៉ាងណាក៏ដោយ ដែលទូតអាមេរិកាំងបាននិយាយថា លោកមានភាពជំនាញវៃឆ្លាត ប្រកបដោយវិជ្ជាជីវៈខ្ពស់ក្នុងការងារទូត ដែលធ្វើឲ្យប្រាសាទព្រះវិហារទទួលស្គាល់ដោយមិនចាំបាច់បោះឆ្នោត គឺទទួលស្គាល់ដោយឯកច្ឆន្ទនៅឆ្នាំ២០០៨» ។
លោក ផៃ ស៊ីផាន បន្តថា សម្តេចវិបុលបញ្ញា បានបំពេញការងារជាច្រើនផ្សេងទៀតទាក់ទងនឹងបញ្ហាព្រំដែន និងទំនាក់ទំនងខ្មែរ-ថៃ ក៏ដូចជាកិច្ចការរដ្ឋបាលក្នុងវិស័យនយោបាយរបស់ប្រទេសកម្ពុជា ។
សម្តេចវិបុលបញ្ញា ក៏ជាដន្លងរបស់សម្តេចតេជោ ហ៊ុន សែន ផងដែរ រវាងកូនស្រីពៅសម្តេច និងកូនប្រុសរបស់សម្តេចវិបុលបញ្ញា ។
កូនប្រុសច្បងរបស់សម្តេចវិបុលបញ្ញា សុខ អាន គឺលោក សុខ ពុទ្ធិវុធ ត្រូវគេដឹងថា ជាប្រធានសហព័ន្ធផលិតស្រូវអង្ករកម្ពុជា ។ ចំណែកកូនប្រុស៣នាក់ផ្សេងទៀត គឺលោក សុខ សូកេន ត្រូវបានព្រះមហាក្សត្រតែងតាំងជាអនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ។ លោក សុខ សង្វារ គឺជាអគ្គនាយករងអាជ្ញាធរជាតិអប្សរា និងលោក សុខ សូកាន ត្រូវបានជ្រើសរើសឲ្យធ្វើជាតំណាងរាស្ត្រមណ្ឌលតាកែវរបស់គណបក្សប្រជាជនកម្ពុជាជំនួសលោក សូរ ឃុន អតីតតំណាងរាស្ត្រ និងជាអតីតរដ្ឋមន្ត្រីក្រសួងប្រៃសណីយ៍ និងទូរគមនាគមន៍ ដែលបានទទួលមរណភាព ។
សម្តេចវិបុលបញ្ញា សុខ អាន បានបញ្ចប់ការសិក្សាកម្រិតបរិញ្ញាបត្រភូមិសាស្ត្រ ប្រវត្តិសាស្ត្រ និងសង្គមសាស្ត្រ និងបន្តយកសញ្ញាបត្រផ្នែកគរុវិជ្ជាជាន់ខ្ពស់ ព្រមទាំងបានបន្តការសិក្សានៅសាលាជាតិរដ្ឋបាលជាន់ខ្ពស់ ផ្នែកការទូត នៅមុនពេលលោកចូលបម្រើក្នុងកិច្ចការងាររដ្ឋចាប់ពីសម័យរដ្ឋកម្ពុជា រហូតមកដល់រាជរដ្ឋាភិបាលសព្វថ្ងៃ ។
ស្របពេលនឹងការទទួលមរណភាពរបស់សម្តេចវិបុលបញ្ញា សុខ អាន តាមរយៈលិខិតមួយដែលផ្សព្វផ្សាយតាមហ្វេសប៊ុក លោក ប៊ុន អ៊ុយ ក្នុងលិខិតផ្ញើទៅកាន់ក្រសួងសេដ្ឋកិច្ចនិងហិរញ្ញវត្ថុ នៅល្ងាចថ្ងៃទី១៥ ខែមីនា ដោយយោងតាមសំណើ របស់សម្តេចតេជោនាយករដ្ឋមន្ត្រី ហ៊ុន សែន ស្នើសុំប្រាក់ចំនួន៣ពាន់លានរៀលស្មើនឹង៧៥ម៉ឺនដុល្លារ ពីក្រសួងសេដ្ឋកិច្ច និងហិរញ្ញវត្ថុ «សម្រាប់ចំណាយរៀបចំពិធីបុណ្យសព» ។
អ្នកនាំពាក្យទីស្តីការគណៈរដ្ឋមន្ត្រី លោក ផៃ សុផាន មានប្រសាសន៍ថា តួលេខចំណាយនេះមិនអាចគណនាទូទាត់និងសមិទ្ធផលដែលសម្តេចវិបុលបញ្ញាបានបន្សល់ទុកសម្រាប់ប្រទេសកម្ពុជាឡើយ ។
សម្តេចមានគុណវុឌ្ឍិសំខាន់ៗជាច្រើន រាប់ចាប់ពីការចូលរួមបង្កើតគណៈកម្មាធិការកសាងសន្តិភាពនាទសវត្សរ៍ឆ្នាំ៨០ ការចរចាជាមួយអន្តរជាតិក្នុងការរៀបចំសាលាក្តីខ្មែរក្រហម ការអភិរក្សនិងអភិវឌ្ឍន៍អង្គរ ព្រមទាំងការដាក់ប្រាសាទព្រះវិហារចូលក្នុងបញ្ជីបេតិកភណ្ឌពិភពលោកជាដើម ។
លោក ផៃ ស៊ីផាន បន្ថែមថា តួលេខនេះមិនខ្ជះខ្ជាយពេកទេ ព្រោះរួមបញ្ចូលការចំណាយថ្លៃយន្តហោះ ដឹកសពពីប្រទេសចិនមកកម្ពុជាវិញ និងការរៀបចំពិធីឱ្យបានសមរម្យតាមទំនៀមទម្លាប់ប្រពៃណី ស័ក្តិសមនឹងកិត្តិយសរបស់សព ។
ទាក់ទងនឹងការបង្ហាញក្នុងបណ្តាញសង្គមនូវលិខិតដែលចុះហត្ថលេខាដោយលោក ប៊ុន អ៊ុយ លោក ផៃ ស៊ីផាន បញ្ជាក់ថា ការប្រកាសខ្ទង់ចំណាយនេះ គឺជាចេតនាបង្ហាញតម្លាភាពរបស់គណៈរដ្ឋមន្ត្រី ហើយក៏ជាកម្រិតស្តង់ដារមួយដែលរាជរដ្ឋាភិបាលធ្លាប់ចំណាយរៀបចំបុណ្យសពកន្លងមក សម្រាប់គោរមងារជា «សម្តេច» ៕
ការិយាល័យនិពន្ធ
ចែករំលែកព័តមាននេះ