មហន្តរាយភ្លៀងកក់ខែលាយឡំខ្យល់កន្ត្រាក់ លំនៅឋាន សាលារៀនជាង100ខ្នងត្រូវបានបំផ្លាញ
ខេត្តព្រះវិហារ ៖ លំនៅឋានជិត៩០ខ្នង ខ្លះបានដួលរលំ និងខ្លះរបើកដំបូល ដោយសារខ្យល់កន្ត្រាក់ខណៈមានធ្លាក់ភ្លៀងយ៉ាងខ្លាំង នៅស្រុកជាំក្សាន្ត
ខេត្តព្រះវិហារ ៖ លំនៅឋានជិត៩០ខ្នង ខ្លះបានដួលរលំ និងខ្លះរបើកដំបូល ដោយសារខ្យល់កន្ត្រាក់ខណៈមានធ្លាក់ភ្លៀងយ៉ាងខ្លាំង នៅស្រុកជាំក្សាន្ត កាលពីល្ងាចថ្ងៃទី១៤ ខែមីនា ។
តាមប្រភពព័ត៌មានពីអ្នកភូមិឱ្យដឹងថា ផ្ទះដែលរងការខូចខាតនោះ មួយចំនួនធ្វើអំពីឈើប្រក់ក្បឿង និងមួយចំនួនទៀតធ្វើអំពីឈើប្រក់សង្ក័សី ។ គ្រោះធម្មជាតិនេះ ក៏បណ្តាលឲ្យមនុស្សមួយចំនួនរងរបួសធ្ងន់និងស្រាលដែរ តែមិនមានអ្នកណាម្នាក់បាត់បង់អាយុជីវិតឡើយ ប៉ុន្តែទ្រព្យសម្បត្តិផ្សេងទៀតមួយចំនួនក៏រងការខូចខាតដែរ ។
លោកវរសេនីយ៍ឯក ឆយ បូរិន នាយសេនាធិការនៃស្នងការដ្ឋាននគរបាលខេត្តបានឱ្យដឹងថា បាតុភូតខ្យល់កន្ត្រាក់នៅស្រុកជាំក្សាន្ត កាលពីល្ងាចថ្ងៃ១៤ ខែមីនា បានធ្វើឱ្យខូចខាតផ្ទះសម្បែងដែលសង់អំពីឈើប្រក់ក្បឿង និងសង់អំពីឈើប្រក់ស័ង្កសី ដែលផ្ទះខ្លះទ្រេត ខ្លះរបើកដំបូល ខ្លះដួលរលំរាបដល់ដី ព្រមទាំងរងរបួសស្រាល៣នាក់និងធ្ងន់២នាក់ ក្នុងនោះមានស្រី្តម្នាក់និងកុមារម្នាក់ ។
បន្ទាប់ពីមានគ្រោះមហន្តរាយខ្យល់កន្ត្រាក់ បោកបក់បំផ្លាញផ្ទះសម្បែងនៅស្រុកជាំក្សាន្តនេះ លោក អ៊ុន ចាន់ដា អភិបាលខេត្ត បានស្នើឱ្យប្រជាពលរដ្ឋទាំងអស់ត្រូវបង្កើនការប្រុងប្រយ័ត្នជានិច្ច ដើម្បីការពារសុវត្ថិភាពអាយុជីវិត និងទ្រព្យសម្បត្តិផ្សេងៗ ។ ជាពិសេសត្រូវយល់ដឹងចំពោះហានិភ័យនៃគ្រោះធម្មជាតិ ព្រោះថា បច្ចុប្បន្ននេះជារដូវភ្លៀងកក់ខែ និងកៀកចូលរដូវវស្សានាប៉ុន្មានខែខាងមុខនេះ ដូច្នេះហើយបាតុភូតធម្មជាតិខ្យល់កន្ត្រាក់ និងភ្លៀងធ្លាក់អាចនឹងកើតឡើងជាបន្តទៀត ។
យោងតាមរបាយការណ៍របស់ស្នងការដ្ឋាននគរបាលខេត្ត បង្ហាញថា គ្រោះធម្មជាតិខ្យល់កន្ត្រាក់ បានបំផ្លាញផ្ទះសម្បែងនៅក្នុងឃុំចំនួន៤នៃស្រុកជាំក្សាន្ត ក្នុងនោះមាន ឃុំទឹកក្រហម ឃុំជាំក្សាន្ត ឃុំយាង និងឃុំមរកត ប៉ះពាល់ផ្ទះចំនួន៨៩ខ្នង ក្នុងនោះប៉ះពាល់ធ្ងន់ចំនួន១៦ខ្នង ប៉ះពាល់មធ្យម៣៣ខ្នង និងស្រាល៤០ខ្នង ។
នៅព្រឹកថ្ងៃទី១៥ ខែមីនា ក្រុមការងារសាខាកាកបាទក្រហមកម្ពុជាខេត្ត បាននាំយកអំណោយទៅចែកជូនដល់គ្រួសាររងគ្រោះដោយមហន្តរាយគ្រោះធម្មជាតិនេះ ដែលក្នុង១គ្រួសារៗទទួលបានអង្ករ២៥គីឡូក្រាម ទឹកស៊ីអុីវ១យួរត្រីខ១យួរ តង់១ និងប្រាក់២០ម៉ឺនរៀល។ ដោយឡែក អំណោយផ្ទាល់ខ្លួនបន្ថែមរបស់លោកជំទាវ ចាន់ សាម៉ី ស្រី ឌឹក ក្នុង១គ្រួសារ១០ម៉ឺនរៀលបន្ថែមទៀត ។
សូមបញ្ជាក់ថា ចំពោះផ្ទះសម្បែងដែលរងការខូចខាតទាំងអស់ លោកឧត្តមសេនីយ៍ឯក ស្រី ឌឹក នាយរងសេនាធិការចម្រុះ និងមេបញ្ជាការកងពលធំអន្តរាគមន៍លេខ៣ និងលោកជំទាវជាភរិយា បានសម្រេចដឹកនាំមន្ត្រីក្រោមឱវាទជួយជួសជុលនិងសាងសង់ឡើងវិញផងដែរ ។
ខ្យល់កន្ត្រាក់បំផ្លាញលំនៅឋាន៦ខ្នងនៅក្នុងស្រុកវើនសៃ
ខេត្តរតនគិរី ៖ របាយការណ៍បឋមរបស់អាជ្ញាធរខេត្តនិងស្រុកបានឱ្យដឹងថា លំនៅឋានសាលារៀន និងស្លាកគណបក្សនយោបាយ បានរងការខូចខាតយ៉ាងដំណំដោយសារខ្យល់កន្ត្រាក់កាលពីថ្ងៃទី១៤ ខែមីនា វេលាម៉ោង៧និង៣០នាទីយប់ ក្នុងនោះស្ត្រីម្នាក់បានរងគ្រោះដោយពស់មានពិសចឹកទៀតផង ។
របាយការណ៍បានឱ្យដឹងទៀតថា ឃុំចំនួន៣នៅក្នុងស្រុកវើនសៃ ត្រូវខ្យល់កួចដំបូលផ្ទះអស់សរុបចំនួន៦ខ្នង ក្នុងនោះឃុំប៉ាកាឡាន់ចំនួន៤ខ្នង ឃុំភ្នំកុកចំនួន១ខ្នង និងឃុំកាចូនចំនួន១ខ្នង ក្រៅពីនោះស្លាកសាលារៀន១បានធ្លាក់ចុះមកដី ។ ដោយឡែក នៅឃុំវើនសៃ ស្លាកគណបក្សនយោបាយចំនួន២ក៏ត្រូវខ្យល់កួចបាក់ធ្លាក់ដល់ដីដែរ ។
សូមបញ្ជាក់ថា ថ្មីៗកន្លងទៅ ក្រសួងធនធានទឹកនិងឧតុនិយមបានចេញសេចក្តីជូនព័ត៌មានថា ចាប់ពីថ្ងៃទី១២ ឬថ្ងៃទី១៣ ខែមីនា អាចនឹងមានភ្លៀងកក់ខែស្ទើរទូទាំងប្រទេស ហើយភ្លៀងកក់ខែអាចនឹងអូសបន្លាយច្រើនថ្ងៃទៀត ។
បើតាមប្រជាពលរដ្ឋដែលរងគ្រោះបានឱ្យដឹងថា នៅមុនពេលកើតហេតុគឺមេឃចាប់ផ្តើមងងឹតនិងមានភ្លៀងធ្លាក់ស្រិចៗ បន្តិចក្រោយមកស្រាប់តែមេឃងងឹតឈឹង និងធ្វើឱ្យពួកគាត់ភិតភ័យយ៉ាងខ្លាំងព្រោះមានសំឡេងខ្យល់កន្ត្រាក់។ គាត់បន្តថា បាតុភូតធម្មជាតិដែលកើតមាននេះកន្លងមកនៅស្រុកភូមិរបស់គាត់មិនដែលជួបប្រទះទេ នេះគឺជាលើកទី១ហើយ ។
ភ្លៀងលាយខ្យល់កន្ត្រាក់២ថ្ងៃលំនៅឋាន១៧ខ្នងរងការខូចខាត
ខេត្តប៉ៃលិន ៖ បន្ទាប់ពីអាកាសធាតុក្តៅខ្លាំងស្ទើររលាកស្បែកអស់មួយរយៈពេលមក នៅរសៀលថ្ងៃទី១៣ ខែមីនា ផ្ទៃមេឃចាប់ផ្តើមខ្មៅអួអាប់ បង្កជាភ្លៀងលាយឡំដោយខ្យល់កន្ត្រាក់ប៉ើងដំបូលផ្ទះនៅភូមិសំបូរ ឃុំសាលាក្រៅ ស្រុកសាលាក្រៅ អស់ចំនួន១២ខ្នង ក្នុងនោះរងការខូចខាតធ្ងន់៣ខ្នង ។ រីឯនៅរសៀលថ្ងៃទី១៤ ខែមីនា ភ្លៀងលាយខ្យល់កន្ត្រាក់បន្តបំប៉ើងដំបូលផ្ទះនៅភូមិថ្មី សង្កាត់ទួលល្វា ក្រុងប៉ៃលិនអស់ចំនួន៥ខ្នង និងរងការខូចខាតធ្ងន់១ខ្នង ។
ប្រភពព័ត៌មានពីលោក សូ កង នាយកប្រតិបត្តិសាខាកាកបាទក្រហមកម្ពុជាខេត្តបានឱ្យដឹងថា គ្រោះធម្មជាតិនេះមិនបណ្តាលឱ្យមនុស្ស សត្វ រងគ្រោះថ្នាក់ដល់អាយុជីវិតទេ
ប៉ុន្តែអំបែងដំបូលផ្ទះបានប៉ើងធ្លាក់ទៅត្រូវស្ត្រីម្នាក់នៅភូមិថ្មីរងរបួសស្រាល ។ ចំណែកឯដើមស្វាយ ត្រូវខ្យល់បុកប៉ើងបាក់អស់ជាច្រើន ដើម និងដួលសង្កត់ទៅលើផ្ទះអ្នកភូមិផងដែរ ។
លោក សូ កង បានអំពាវនាវសូមឲ្យបងប្អូនប្រជាពលរដ្ឋមានការប្រុងប្រយ័ត្នខ្ពស់ ខណៈមានភ្លៀងឬខ្យល់ខ្លាំង សូមរកកន្លែងជ្រកឱ្យបានស្រួលបួល ហើយត្រូវដកឌុយទូរទស្សន៍ចេញផងដែរ ដើម្បីចៀសវាងរងការខូចខាតដោយសាររន្ទះបាញ់ ៕
ចែករំលែកព័តមាននេះ