រាជធានីភ្នំពេញ ៖ កិច្ចប្រជុំក្រុមឧត្តមមន្ត្រីនៃគណៈកម្មការចម្រុះព្រំដែនកម្ពុជា-វៀតណាម និងមន្ត្រីតាមបណ្តាខេត្តជាប់ព្រំដែនប្រទេសទាំងពីរ
រាជធានីភ្នំពេញ ៖ កិច្ចប្រជុំក្រុមឧត្តមមន្ត្រីនៃគណៈកម្មការចម្រុះព្រំដែនកម្ពុជា-វៀតណាម និងមន្ត្រីតាមបណ្តាខេត្តជាប់ព្រំដែនប្រទេសទាំងពីរ គ្រោងបញ្ចប់នៅថ្ងៃទី១៥ ខែមីនានេះ។ កិច្ចប្រជុំដែលមានរយៈពេល៣ថ្ងៃ ចាប់ពីថ្ងៃទី១៣ ដល់ទី១៥ ខែមីនា ធ្វើឡើងនៅទីស្តីការក្រសួងការបរទេសនិងសហប្រតិបត្តិការអន្តរជាតិ ដែលភាគីវៀតណាមដឹកនាំដោយលោក ផាម ប៊ិញមិញ ឧបនាយករដ្ឋមន្ត្រី រដ្ឋមន្ត្រីក្រសួងការបរទេស ។ ចំណែកភាគីកម្ពុជា ដឹកនាំដោយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ ។
ភាគីទាំងពីរ បានចំណាយពេល២ថ្ងៃពិភាក្សាលើកឯកសារមួយចំនួន ដែលត្រូវចុះហត្ថលេខាដោយរដ្ឋមន្ត្រីក្រសួងការបរទេសនៃប្រទេសទាំង២ នៅថ្ងៃទី១៥ ខែមីនា នេះ ។
មន្ត្រីក្រសួងការបរទេសនិងសហប្រតិបត្តិការអន្តរជាតិបានឲ្យដឹងថា កិច្ចប្រជុំពីថ្ងៃទី១៣ដល់ទី១៥ ខែមីនានេះ ចែកជា២ផ្នែកគឺ ៖
ផ្នែកទី១-កិច្ចប្រជុំថ្នាក់រដ្ឋមន្ត្រី ប្រព្រឹត្តទៅនៅទីស្តីការក្រសួងការបរទេស ដោយមានការចូលរួមពីលោក ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស ស្តីពីកិច្ច
សហប្រតិបត្តិការសេដ្ឋកិច្ច វប្បធម៌ វិទ្យាសាស្ត្រ និងបច្ចេកវិទ្យា ។
ផ្នែកទី២-ប្រជុំថ្នាក់មន្ត្រីតាមបណ្តាខេត្តជាប់ព្រំដែននៃប្រទេសទាំងពីរ ហើយកិច្ចប្រជុំនេះមានលក្ខណៈចង្អៀត(បិទទ្វារ)ផងដែរ ។
លោក ជុំ សន្ទរី អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិ ថ្លែងប្រាប់កោះសន្តិភាពតាមទូរស័ព្ទកាលពីល្ងាចថ្ងៃទី១៤ ខែមីនា ថា កិច្ចប្រជុំពីរថ្ងៃនេះភាគីទាំង២នៅមិនទាន់សម្រេចអ្វីនៅឡើយទេ គឺគ្រាន់តែប្រជុំដើម្បីរៀបចំឯកសារនានា សម្រាប់កិច្ចប្រជុំកំពូលរវាងឧត្តមមន្ត្រីនៅថ្ងៃទី១៥ ខែមីនា ដែលមានការចូលរួមពីលោក ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេសកម្ពុជា និងលោកផាម ប៊ិញមិញ ឧបនាយករដ្ឋមន្ត្រី រដ្ឋមន្ត្រីក្រសួងការបរទេសវៀតណាម ។
លោក ជុំ សុន្ទរី ថ្លែងទៀតថា ភាគីកម្ពុជា-វៀតណាម បានដំណើរការពិភាក្សាគ្នាលើការងាររៀបចំឯកសារសម្រាប់ឧត្តមមន្ត្រី និងគ្មានខ្លឹមសារសំខាន់អ្វីជាដុំកំភួនសម្រាប់ជូនព័ត៌មានដល់អ្នកសារព័ត៌មាននៅថ្ងៃនេះទេ(១៤មីនា) ។ លោកបានលើកឡើងថា ៖ «ឯកសារទាំងនោះនឹងសម្រេចចុះហត្ថលេខាដោយឧត្តមមន្ត្រីនៃប្រទេសទាំងពីរ នៅថ្ងៃទី១៥ ខែមីនា» ។
គួរបញ្ជាក់ថា ក្រសួងការបរទេសនិងសហប្រតិបត្តិការអន្តរជាតិ បានជូនព័ត៌មានថា តាមការអញ្ជើញរបស់សម្តេចក្រឡាហោមស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោក ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិនៃព្រះរាជាណាចក្រកម្ពុជា លោកផាមប៊ិញមិញ ឧបនាយករដ្ឋមន្ត្រី រដ្ឋមន្ត្រីក្រសួងការបរទេសវៀតណាម បានដឹកនាំគណៈប្រតិភូមកចូលរួមកិច្ចប្រជុំលើកទី៩ស្តីពីកិច្ចសហប្រតិបត្តិការនិងអភិវឌ្ឍន៍រវាងបណ្តាខេត្តជាប់
ព្រំដែនកម្ពុជា-វៀតណាម និងកិច្ចប្រជុំគណៈកម្មការចម្រុះកម្ពុជា-វៀតណាមលើកទី១៥ ស្តីពីកិច្ចសហប្រតិបត្តិការសេដ្ឋកិច្ច វប្បធម៌ វិទ្យាសាស្ត្រ និងបច្ចេកវិទ្យា ចាប់ពីថ្ងៃទី១៣ដល់១៥ ខែមីនា ។
ក្រសួងការបរទេសបានបញ្ជាក់ថា ជំនួបគ្នានេះបានធ្វើឡើងស្របពេលជាមួយនឹងខួប៥០ឆ្នាំនៃទំនាក់ទំនងការទូតរវាងប្រទេសទាំងពីរដែលបានផ្តល់ឱកាសឡើងវិញ រំឭកដល់សមិទ្ធផលសម្រេចបាននានាពេលកន្លងមក ព្រមទាំងរៀបចំផែនការទិសដៅសម្រាប់អនាគត ក្នុងកិច្ចខិតខំប្រឹងប្រែងដើម្បីពង្រឹងបន្ថែមទៀតនូវចំណងមិត្តភាពជាប្រពៃណីអ្នកជិតខាងល្អ និងកិច្ចសហការគ្រប់ជ្រុងជ្រោយរវាងប្រទេសទាំងពីរដែលមានស្រាប់ ។
ក្នុងពេលបើកកិច្ចប្រជុំនោះ លោក ផាម ប៊ិញមិញ បានថ្លែងថា លោកសូមថ្លែងអំណរគុណដល់ភាគីកម្ពុជា ដែលបានរៀបចំកិច្ចប្រជុំនេះដែលនឹងពិភាក្សាលើកិច្ចសហប្រតិបត្តិការរវាងប្រទេសទាំងពីរ ។
លោករដ្ឋមន្ត្រីការបរទេសវៀតណាមបានបញ្ជាក់ថា៖ «មានសមិទ្ធផលជាច្រើនដែលទទួលបានពីកិច្ចសហប្រតិបត្តិការ មានកិច្ចការងារជាច្រើនដែលលោកលើកយកមកពិភាក្សានៅក្នុងកិច្ចប្រជុំនេះ ទាក់ទននឹងប្រពៃណីនៃសហប្រតិបត្តិការដែលផ្អែកលើសេចក្តីសម្រេចរបស់ថ្នាក់ដឹកនាំនៃប្រទេសទាំង២នាពេលថ្មីៗនេះ» ។ កិច្ចការទាំងនោះនឹងលើកយកមកពិភាក្សាក្នុងកិច្ចប្រជុំនេះ ៕
ចែករំលែកព័តមាននេះ