ខេត្តរតនគិរី ៖ សេចក្តីរាយការណ៍បានអោយដឹងជាបឋមថា លោក សុខ វុឌ្ឍី សមាជិកក្រុមប្រឹក្សាខេត្ត និងជាសមាជិកគណៈកម្មាធិការគណបក្សខេត្តរតនគិរី បានទទួលមរណភាពហើយ នៅវេលាម៉ោងជាង៧យប់ថ្ងៃទី០៦ តុលា ២០២២នេះ ក្រោយពីជួបគ្រោះថ្នាក់ចរាចណ៍ ត្រូវម៉ូតូមួយគ្រឿងបើកបុកពេញទំហឹង ខណៈលោកដើរឆ្លងផ្លូវ ដើម្បីចូលហាងសាច់គោអាំងមួយកន្លែងនៅក្រុងបានលុង ។
ករណីគ្រោះថ្នាក់ចរាចរណ៍ខាងលើនេះ កើតឡើងនាវេលាម៉ោង០៧យប់ នៅថ្ងៃទី៦ ខែតុលា ឆ្នាំ២០២២ នៅចំណុចមុខសាលាបឋមសិក្សាឡាបានសៀក ក្នុងភូមិអូរកន្ទិល សង្កាត់បឹងកន្សែង ក្រុងបានលុង ខេត្តរតនគិរី ។
បើតាមអ្នកនៅកន្លែងកើតហេតុ បានអោយដឹងថា លោក សុខ វុឌ្ឍី បានចតរថយន្តនៅត្រើយម្ខាងផ្លូវ បំណងចូលហូបសាច់អាំង រួចហើយក៏ដើរឆ្លងផ្លូវ សំដៅមកហាងសាច់អាំងមួយកន្លែងនៅចំណុចកើតហេតុខាងលើ ក៏ស្រាប់តែមានម៉ូតូប្រភេទកែច្នៃដឹកឈើ ០១គ្រឿង បានបើកបរយ៉ាងលឿន លុះមកដល់ ក៏បុកលោក សុខ វុឌ្ឍី ពេញទំហឹងបណ្ដាលអោយដួលដេកនៅហ្នឹងកន្លែងលើដងផ្លូវ ជាអកុសល លោកបាត់បង់ជីវិត នៅពេលគេបញ្ជូនទៅដល់មន្ទីរពេទ្យ ។
បច្ចុប្បន្ន សមត្ថកិច្ចជំនាញ កំពុងធ្វើកំណត់ហេតុ រួចហើយដឹកសាកសពលោក សុខ វុឌ្ឍី បញ្ជូនទៅគេហដ្ឋាន ដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ