រាជធានីភ្នំពេញ ៖ បន្ទាប់ពីទទួលបានព័ត៌មានពីការតវ៉ារបស់ប្រជាពលរដ្ឋសម្តេចតេជោ ហ៊ុន សែន នាយករដ្ឋមន្ត្រីបានស្នើដល់ប្រជាពល រដ្ឋស្ងប់ចិត្តពីព្រោះរាជរដ្ឋាភិបាលមិនទាន់មានគម្រោងរុះរើឃុំព្រះដាក់នោះទេ។
សម្តេចតេជោ បានថ្លែងបើកសន្និសីទ«ចក្ខុវិស័យកម្ពុជាឆ្នាំ២០២២» ក្រោមមូលបទ «ការស្តារកម្ពុជាឡើងវិញ ៖ ការអភិវឌ្ឍប្រកបដោយនិរន្តរភាពបន្ទាប់ពីវិបត្តិជំងឺកូវីដ១៩»នៅសណ្ឋាគារសុខារាជធានីភ្នំពេញនាព្រឹកថ្ងៃទី៦ ខែតុលា ឆ្នាំ២០២២ថា៖«ម្សិលមិញមានការប្រមូលផ្តុំពីសំណាក់ប្រជាពលរដ្ឋទូតាំងឃុំតែម្តង។អំពីការរើចេញពីឃុំព្រះដាក់មកកាន់រុនតាឯក ខ្ញុំគួរតែត្រូវនិយាយថា យើងមិនទាន់មានការប៉ះពាល់ណាមួយលើប្រជាជននៅឃុំព្រះដាក់នោះទេ យើងគ្រាន់តែគិតគូរអំពីហេដ្ឋរចនាសម្ព័ន្ធរបស់អង្គដែលមុននេះមានបារាយខាងកើត ដែលអាចមានទឹករហូតដល់៣០លានម៉ែត្រគូប ប៉ុន្តែជាមួយនឹងការគិតគូរបែបនេះយើងក៏បានដឹងដែរឃុំព្រះដាក់ត្រូវបានកសាងឡើងប្រមាណ៣០០ទៅ៤០០ឆ្នាំមកហើយ ហើយឃុំនេះស្ថិតជាឃុំមួយដែលទាក់ទង និងផ្នែករដ្ឋបាលដែនដីទៀតផង។ ប៉ុន្តែយ៉ាងដូច្នេះបានជាប្រជាជនចាប់ផ្តើមព្រួយបារម្ភរឿងនេះ?»។
សម្តេចក៏បានលើកឡើងថា៖«ខ្ញុំសូមបញ្ជូនសារនេះទៅកាន់ប្រជាពលរដ្ឋ នៅទីនោះសុំស្ងប់ស្ងាត់ យើងនឹងគិតគូរយ៉ាងម៉ត់ចត់ដោយបញ្ជូនឯកឧត្តម ឧបកនាយករដ្ឋមន្ត្រីជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងលោក ជំទាវភឿង សកុណាទៅជួបបងប្អូននៅថ្ងៃស្អែក ដើម្បីពន្យល់»។
សម្តេចលើកឡើងថា នៅតំបន់បើនិយាយពីផ្នែកហេដ្ឋរចនាសម្ព័ន្ធអង្គ មានបារាយខាងលិច និងបារាយការកើត តែបារាយការលិចអត់មានបញ្ហានោះទេ គឺបារាយកើតមានបញ្ហា និងបារាយមួយទៀត គឺបារាយរលីង។យើងកំពុងសិក្សាថា អាចដាក់ទឹកបានប៉ុន្មាន ដើម្បីទ្រទ្រង់ឲ្យអង្គរ។
សម្តេចថា អ្វីដែលនៅ គឺត្រូវតែប្រុងប្រយ័ត្ន ហើយបញ្ហាសំខាន់ គឺមិនទាមទារដាក់ទឹករហូតដល់មានផ្ទៃដល់៣០លានម៉ែត្រគូបនោះទេ ហើយទាញយកប្រជាជនទាំងអស់ចេញពីឃុំព្រះដាក់ក៏អត់ដែរ។យើងត្រូវគិតគូឲ្យម៉ត់ចត់ ហើយប្រហែលសិក្សាទាក់ទង និងរឿងបាត់អាងបារាយតែប៉ុណ្ណោះថា អាចដាក់ទឹកបានប៉ុន្មាន ហើយដោះស្រាយប្រជាពលរដ្ឋកំពុងទទួលផលនៅទីនោះយ៉ាងម៉េច ដើម្បីម្ខាងការពារប្រជា ជនរស់នៅទីនោះ និងម្ខាងទៀត គឺដើម្បីដោះស្រាយការពារអង្គរ។
សម្តេចបញ្ជាក់ថា៖«អ្វីដែលជាកិច្ចការបន្ទាន់ គឺអ្នកដែលរស់នៅក្រោយឆ្នាំ១៩៧៩ ដែលរស់នៅព័ទ្ធជុំប្រាសាទដែលតាំងពីរលំនៅដោយខុសច្បាប់ ឬអាចថាតាំងលំនៅមិនស្របនឹងលក្ខខណ្ឌអង្គការយូណេស្កូសម្រាប់បេតិកភ័ណ្ឌ»។
សម្តេចបន្តថា រាជរដ្ឋាភិបាលបន្តធ្វើការចាប់ឆ្នោតសម្រាប់ប្រជាពលរដ្ឋជាបន្តបន្ទាប់ ហើយដីនៅរុកតាឯកដែលនៅសល់២០០ឡូ ដោយចំនួននេះបម្រុងទុកដោយត្រូវរៀបចំតំបន់ពាក់ស្នែង ដើម្បីរៀបចំហេដ្ឋរចនាសម្ព័ន្ធមានផ្លូវ ទឹក ភ្លើង សាលារៀន មន្ទីរពេទ្យ។ដោយឡែកនៅរុកតាឯកក៏ឲ្យសាងសង់វត្តសមល្មម ដើម្បីឲ្យប្រជាពលរដ្ឋប្រារព្ធផងដែរ។
ជាមួយគ្នានោះដែរ សម្តេចតេជោ បានស្នើឲ្យប្រជាពលរដ្ឋនៅឃុំព្រះដាក់មានការស្ងប់ចិត្តដោយសាររដ្ឋាភិបាលមិនអាចធ្វើដោយទទឹងទិសដោយរុះរើប្រជាពលរដ្ឋកំពុងរស់នៅនោះទេ។ប៉ុន្តែបើសិនជាធ្វើការរុះរើមែននោះ គឺរើទាំងសាលាឃុំតែម្តង។សម្តេចបញ្ជាក់ថា ៖«ខ្ញុំឃើញតាមវីដេអូប្រជាជនតវ៉ានៅសាលាឃុំ អីចឹងបើដូរទៅ គឺដូរទាំងសាលាឃុំតែម្តង ហើយខាងរដ្ឋបាលយើងមានតែលុបចោលតែនេះមិនមែនជាគោលដៅសម្រាប់យើងធ្វើនោះទេ។ក៏ប៉ុន្តែមិនដឹងអ្នកណាទៅបង្កើតរឿងរ៉ាវនេះ»។
សម្តេចក៏បានគូសបញ្ជាក់ទៀតថា ការរើរហូតដល់មួយឃុំនេះមិនអាចធ្វើបាននោះទេ ហើយមិនមានគោលការណ៍របស់អង្គការយូណេស្កូណានោះទេ។ហើយអង្គការយូណេស្កូមិនបានដាក់លក្ខខណ្ឌឲ្យរុះរើប្រជាជនរហូតដល់មួយឃុំនោះទេ គ្រាន់តែតំបន់គេតម្រូវមិនឲ្យមានសំណង់ច្រើនពេកតែប៉ុណ្ណោះ៕
ចែករំលែកព័តមាននេះ