ក្រោយពីឮអ្នកជិតខាងនិយាយទើបភ្ញាក់ខ្លួនដូចខ្មោច៧ថ្ងៃ(មានវីដេអូ)
រាជធានីភ្នំពេញ ៖ ស្ត្រីម្នាក់បានសម្ដែងការហួសចិត្ត និងសោកស្ដាយថវិការបស់គាត់ដែលបាត់បង់ទៅទទេរៗ ព្រោះតែ
រាជធានីភ្នំពេញ ៖ ស្ត្រីម្នាក់បានសម្ដែងការហួសចិត្ត និងសោកស្ដាយថវិការបស់គាត់ដែលបាត់បង់ទៅទទេរៗ ព្រោះតែចាញ់ល្បិចកលជនមិនស្គាល់មុខម្នាក់ ដែលបានខលចូលទៅគាត់ដោយអះអាងថា ត្រូវជាក្មួយប្រុសរបស់នាង និងបានប្រាប់ថា គេបានជួបឧប្បត្តិហេតុគ្រោះថ្នាក់ចរាចរដោយបានជិះម៉ូតូបុកគ្នា នៅម្ដុំខាងកើតស្ពានអ្នកលឿង ហើយភាគីម្ខាងទៀតរងរបួសបាក់ចង្កេះធ្ងន់ធ្ងរ ។ ឥឡូវភាគីអ្នករងគ្រោះនោះបានទាមទារសំណង១.៥០០ដុល្លារ ហើយគេគ្មានលុយសងគេទេ និងបានសុំលុយពីរូបគាត់ ខណៈនោះដោយសារតែសម្លេងជននោះដូចគ្នាបេះបិទទៅនឹងសម្លេងក្មួយរបស់នាង ហើយដោយមានក្តីអាណិតក្មួយទើបយកលុយចំនួន៣០០ដុល្លារ ផ្ញើរទៅឲ្យតាមរយៈវីង(Wing) ។ លុះក្រោយមកទើបដឹងថា ចាញ់បោកគេក៏បានធ្វើដំណើរទៅកាន់ប៉ុស្ដិ៍នគរបាលកន្ទោកដាក់ពាក្យបណ្ដឹងសុំឲ្យជួយអន្តរាគមន៏តែម្ដង ។
ស្ត្រីរងគ្រោះខាងលើឈ្មោះ គង់ សុខា អាយុ៣៤ឆ្នាំ ជាកម្មការិនីរោងចក្រកាត់ដេរ នាងបានទៅដាក់ពាក្យបណ្ដឹងសុំឲ្យនគរបាលប៉ុស្ដិ៍កន្ទោក ខណ្ឌពោធិ៍សែនជ័យ ជួយកាលពីវេលាម៉ោង២និង៣០នាទី រសៀលថ្ងៃទី១២ មីនា ។ នាងរងគ្រោះបានប្រាប់ឲ្យនគរបាលដឹងថា នៅវេលាម៉ោងប្រហែលជាង១២ថ្ងៃត្រង់ថ្ងៃកើតហេតុមានទូរស័ព្ទមួយខ្សែខលចូលទូរស័ព្ទរបស់នាង ហើយនៅពេលដែលនាងលើកនិយាយភ្លាម បានឮសម្លេងអ្នកនិយាយនោះដូចជាសម្លេងក្មួយប្រុសរបស់នាងម្នាក់ឈ្មោះ ខួច ដែលកំពុងរស់នៅឯខេត្តព្រៃវែងបេះបិទ ។ ប៉ុន្តែទោះបីបែបណានាងមិនបានចាំលេខទូរស័ព្ទក្មួយប្រុសឡើយ ពេលនោះអ្នកខលចូលបានហៅនាងថា មីងៗពេញមាត់ និងបានប្រាប់ថា ខ្លួនគេកំពុងជួបគ្រោះថ្នាក់ចរាចរនៅឯម្ដុំខាងកើតស្ពានអ្នកលឿង ដោយបានជិះម៉ូតូទៅបុកគ្នាហើយភាគីម្ខាងទៀតបានរងរបួសបាក់ចង្កេះ ហើយឥឡូវអ្នករងគ្រោះបានទាមទារសំណងចំនួន១.៥០០ដុល្លារ មិនតែប៉ុណ្ណោះក៏បានសុំឲ្យនាងជួយផ្ញើរលុយតាមវីងឲ្យផងព្រោះរូបគេអត់មានលុយជាប់ខ្លួនសូម្បីតែ១រៀលឡើយ ។
ស្ត្រីខាងលើបានបន្តថា ខណៈនោះបានធ្វើឲ្យនាងមានការព្រួយបារម្ភខ្លាំងណាស់ និងបានប្រាប់ត្រឡប់ទៅ វិញថា មីងអត់លុយដែរ បន្ទាប់មកបានយកលុយចំនួន៣០០ដុល្លារផ្ញើរទៅឲ្យជននោះតាមរយៈវីង បន្ទាប់ពីបានលុយដល់ដៃជននោះក៏បានស្ងប់ស្ងាត់ ហើយមួយសន្ទុះក្រោយមកបានខលរកនាងម្ដងទៀតដោយបានប្រាប់ថា ភាគីដែលគេជិះម៉ូតូបុកបាក់ចង្កេះនោះ ពេលនេះបានស្លាប់ហើយ និងត្រូវបានគ្រួសារអ្នកស្លាប់នោះទាមទារសំណង១.០០០ដុល្លារ ។ ពេលនោះនាងប្រាប់ថា អត់មានលុយទេ និងបានបង្គាប់ទៅជននោះថា ក្មួយឯងលុតជង្គង់អង្វរគេទៅចាំមីងទៅរកខ្ចីគេ៣០០ដុល្លារឲ្យទៀតជននោះក៏បានឆ្លើយថាបាទប៉ុណ្ណឹងក៏បានដែរ និងបានបិទទូរស័ព្ទ ។
ប្រភពដដែលបានបន្តថា ក្រោយពេលបិទទូរស័ព្ទនាងបានម្នីម្នារទៅរកខ្ចីលុយអ្នកជិតខាងដើម្បីវេរទៅឲ្យជននោះទៀតប៉ុន្តែពេលទៅដល់អ្នកជិតខាងមានការសង្ស័យមិនបានឲ្យលុយខ្ចីនោះទេ ហើយនិយាយថា បុកគេងាប់ប៉ុណ្ណឹងហើយនរណាយកលុយ៣០០ដុល្លារនោះដូចជាមិនគួរឱ្យជឿទេ ។ បន្ទាប់ពីឮអ្នកជិតខាងនិយាយបែបនេះទើបនាងភ្លឺភ្នែក និងឲ្យក្មួយម្នាក់ទៀតដែលជាប្អូនរបស់ក្មួយប្រុសឈ្មោះ ខួច នោះខលទៅបងរបស់គេ និងផ្ទៀងលេខទូរស័ព្ទមើលទើបដឹងថា ចាញ់បោកគេ ។ ព្រោះក្មួយប្រុសឈ្មោះ ខួច នោះមិនបានដឹងរឿងអ្វីទាល់តែសោះ ហើយក៏កំពុងនៅផ្ទះឯខេត្តព្រៃវែងព្រមទាំងមានក្តីសុខធម្មតា មិនមានគ្រោះថ្នាក់ចរាចរអ្វីឡើយបន្ទាប់មកនាងបានធ្វើដំណើរទៅកាន់ប៉ុស្ដិ៍នគរបាលដាក់ពាក្យបណ្ដឹងសុំអន្តរាគមន៏ ៕
ចែករំលែកព័តមាននេះ