រាជធានីភ្នំពេញ ៖ ស្ត្រីមានផ្ទៃពោះជាងមួយខែម្នាក់ បានធ្វើដំណើរទៅកាន់ប៉ុស្ដិ៍ចោមចៅ ដាក់ពាក់ពាក្យបណ្ដឹងសុំឲ្យជួយអន្តរាគមន៍ និងចាត់ការទៅលើប្ដីនាង ដោយសារតែទ្រាំលែងបាននឹង
រាជធានីភ្នំពេញ ៖ ស្ត្រីមានផ្ទៃពោះជាងមួយខែម្នាក់ បានធ្វើដំណើរទៅកាន់ប៉ុស្ដិ៍ចោមចៅ ដាក់ពាក់ពាក្យបណ្ដឹងសុំឲ្យជួយអន្តរាគមន៍ និងចាត់ការទៅលើប្ដីនាង ដោយនាងបានរៀបរាប់ប្រាប់នគរបាលថា ប្ដីរបស់នាងបានផឹកស៊ី អួទីនួគ្មានថ្ងៃស្វាង ហើយពេលស្រវឹងម្ដងៗមិនដឹងជាយ៉ាងម៉េចទេ តែងតែវាយធ្វើបាបនាងរហូត ទោះបីជាដឹងថា នាងមានផ្ទៃពោះក៏ដោយ។ ដោយអត់ទ្រាំងលែងបាន ហើយខ្លាចមានគ្រោះថ្នាក់ដល់ខ្លួន ព្រោះតែអំពើហិង្សារាល់ថ្ងៃបែបនេះ ទើបនាងសម្រេចចិត្តរត់រកឲ្យនគរបាលជួយអន្តរាគមន៍ និងបានដាក់ពាក្យបណ្តឹងនៅប៉ុស្តិ៍នគរបាលចោមចៅខណ្ឌពោធិ៍សែនជ័យ កាលពីវេលាម៉ោង១និង៥០នាទីរសៀល ថ្ងៃទី១០ ខែមីនា ឆ្នាំ២០១៧ បើមិនដូច្នេះទេ នាងប្រាកដជាស្លាប់មិនខានឡើយ។
ស្ត្រីខាងលើឈ្មោះ ភា សារឿង អាយុ២៧ឆ្នាំ មុខរបរកម្មការិនីរោងចក្រកាត់ដេរ ស្នាក់នៅក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅភូមិស្ពឺលិច ឃុំស្ពឺក ស្រុកបាភ្នំ ខេត្តព្រៃវែង។ នាងបានរងរបួសជាំមុខ ពកក្បាល និងហើមម្រាមដៃ ចំណែកបុរសជាប្តីដែលបង្កហិង្សាលើប្រពន្ធខ្លួននោះឈ្មោះផាន សម្ភស្ស អាយុ២៨ឆ្នាំ មុខរបរកម្មករសំណង់ ស្នាក់នៅជាមួយគ្នា។
ស្ត្រីរងគ្រោះខាងលើ បានរៀបរាប់ប្រាប់នគរបាលថា នាងឆ្ងល់ណាស់ នាងមានចិត្តស្មោះត្រង់ជាមួយប្ដី ស្រលាញ់គោរពប្ដី គិតពីប្ដីគ្រប់វិនាទីមិនដែលវៀចវេឡើយ ប៉ុន្តែមិនដឹងថា យ៉ាងម៉េចទេ ទើបលោកប្ដីចេះតែរករឿងមិនឈប់ ប្ដីនាងតែងតែផឹកស្ទើររាល់ថ្ងៃ ហើយឲ្យតែពេលផឹកស្រវឹងម្ដងៗ បានវាយធ្វើបាបនាង ជាបន្តបន្ទាប់។
ដោយឡែកនៅម៉ោងជាង៨យប់ ថ្ងៃទី៩ មីនា បន្ទាប់ពីត្រឡប់មកពីផឹកស៊ីវិញ លោកប្តីបានប្រើហិង្សាមកលើរូបនាង ដោយបានវាយដំនាងឥតមេត្តា បណ្តាលឱ្យពកក្បាល និងជាំមុខ ជា ពិសេសម្រាមដៃខាងឆ្វេងរបស់នាង១មានសភាពហើមជាំថែមទៀតផង។ ដោយសារលំបាកទាំងផ្លូវកាយ និងផ្លូវចិត្ត ម្យ៉ាងទៀតពេលនេះនាងមានផ្ទៃពោះមួយខែទៅហើយ លោកប្ដីមិនគិតពីសុវត្ថិភាពនាង និងកូនទៀត ហើយដោយសារខ្លាចមានគ្រោះថ្នាក់ដល់ខ្លួន ហើយនាងក៏ទ្រាំលែងបានផងនោះ ទើបសម្រេចចិត្តមកប្តឹងឲ្យនគរបាលជួយហៅប្តីដើម្បីធ្វើការអប់រំ និងធ្វើកិច្ចសន្យាឈប់ឱ្យប្រព្រឹតអំពើហិង្សាមកលើរូបនាងតទៅទៀត។
ក្រោយពេលទទួលបានពាក្យបណ្ដឹងរបស់ស្ត្រីខាងលើ នគរបាលប៉ុស្ដិ៍ចោមចៅសន្យាថា នឹងហៅបុរសជាប្ដីនោះទៅធ្វើការសាកសួរ និងធ្វើកិច្ចសន្យាឲ្យគេបញ្ឈប់ហិង្សាទៅលើស្ត្រីជាប្រពន្ធតទៅទៀត៕
ចែករំលែកព័តមាននេះ