ខេត្តកំពង់ធំ ៖ ដោយមានការតាមដានពីស្ថានភាពទឹកជំនន់ស្ទឹងសែន តាមស្ថានីយវាស់កម្ពស់ទឹកស្ទឹងសែន ចំនួន ០៣កន្លែង រយៈពេល១០ថ្ងៃកន្លងមកចាប់ពីថ្ងៃទី២៥ ខែកញ្ញា ដល់ថ្ងៃទី៤ ខែតុលា…
ខេត្តកំពង់ធំ ៖ ដោយមានការតាមដានពីស្ថានភាពទឹកជំនន់ស្ទឹងសែន តាមស្ថានីយវាស់កម្ពស់ទឹកស្ទឹងសែន ចំនួន ០៣កន្លែង រយៈពេល១០ថ្ងៃកន្លងមកចាប់ពីថ្ងៃទី២៥ ខែកញ្ញា ដល់ថ្ងៃទី៤ ខែតុលា ឆ្នាំ២០២២នេះ ពិនិត្យឃើញថា កម្ពស់ទឹកស្ទឹងកើនឡើងជាលំដាប់ មានដូចជា ៖ នៅស្ថានីយទំនប់ទឹករក្សាទឹកកើនកំពស់ ០,៨២ម នៅស្ថានីយស្រុកសណ្តាន់ ទឹកកើនឡើង ០,៦២ម និងនៅស្ថានីយកំពង់ធំ ទឹកកើនឡើង ០,៥០ម ។
បើតាមក្រសួងធនធានទឹក និងឧតុនិយម បានអោយដឹងថា ស្ថានភាពទឹកជំនន់ស្ទឹងសែន នៅតែបន្តការកើនឡើងទៀតនៅឡើយ ជាក់ស្តែងនៅថ្ងៃទី៤ ខែតុលា ឆ្នាំ២០២២ វេលាម៉ោង១២ថ្ងៃត្រង់នេះ កម្ពស់ទឹកនៅស្ថានីយវាស់កម្ពស់ទឹកស្ទឹងសែនកំពង់ធំ ឡើងដល់១៤,០០ម៉ែត្រហើយ ដែលជាកម្ពស់ប្រកាសឲ្យមានការប្រុងប្រយ័ត្នកម្រិតខ្ពស់ និងយោងតាមការចុះពិនិត្យស្ថានភាពទឹកជំនន់ នៅក្នុងក្រុងស្ទឹងសែន (ទីរួមខេត្តកំពង់ធំ) ឃើញថា ៖ ផ្លូវគ្រួសក្រហម និងផ្លូវក្រាលកៅស៊ូមួយចំនួន នៅឯជាយក្រុង ទឹកជំនន់ បានឡើងជន់លិចនៅលើកំណាត់ផ្លូវខ្លះៗហើយ ហើយទឹកក៏ចាប់ផ្តើមហូរចូលក្នុងក្រុងជាបណ្តើរៗដែរ (តាមលូ-ស្ពាននិងកាត់ផ្លូវ) ដែលស្ថានភាព បែបនេះនឹងអាចជន់លិចក្រុងជាបណ្តើរៗ ។
ដោយឃើញបែបនេះ មន្ទីរធនធានទឹក និងឧតុនិយមខេត្តកំពង់ធំ បានចេញលិខិតប្រកាសឲ្យមានការប្រុងប្រយ័ត្ន កម្រិតខ្ពស់នៅកម្ពស់ទឹកស្ទឹងសែនកំពង់ធំ ១៤,០០ម៉ែត្រសិន មុននឹងចេញលិខិតប្រកាសអាសន្ន ជាគ្រាចុងក្រោយ នៅពេលដែលកំពស់ទឹកនៅស្ថានីយវាស់កំពស់ទឹកស្ទឹងសែនកំពង់ធំឡើងដល់១៤,៣០ម៉ែត្រ ៕
ចែករំលែកព័តមាននេះ