មន្ត្រីនគរបាលរាជធានីភ្នំពេញ បំភ្លឺ ករណីប៉ូលិសចរាចរណ៍ ផាកពិន័យនារី០៣នាក់ មិនឲ្យបណ្ណ
រាជធានីភ្នំពេញ ៖ បន្ទាប់ពីបានឃើញគណនី TikTok មួយដែលមានឈ្មោះថា Leng Barang បានសរសេរបង្ហោះក្នុងបណ្តាញសង្គម TikTok កាលពីថ្ងៃទី០១…
រាជធានីភ្នំពេញ ៖ បន្ទាប់ពីបានឃើញគណនី TikTok មួយដែលមានឈ្មោះថា Leng Barang បានសរសេរបង្ហោះក្នុងបណ្តាញសង្គម TikTok កាលពីថ្ងៃទី០១ ខែតុលា ឆ្នាំ២០២២ មានខ្លឹមសារថា “ជឿហើយខ្មែរអាចធ្វើបានមែនវីដេអូនេះផ្ងើជូនអ្នកអត់លុយហើយចង់ជិះម៉ូតូបែទៅបង់រំលស់ម៉ូតូពីក្រុមហ៊ុនអត់ផ្លាកលេខសមត្ថកិច្ចមិនអនុគ្រោះទេ នេះហើយពាក្យស្លោកដែលថា (កាត់បន្ថយភាពក្រីក្រ) គឺកាត់អ្នកក្រឲ្យស្លាប់អស់ទុកតែអ្នកមាន” ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅថ្ងៃទី០៤ តុលា ២០២២ បានបដិសេធចំពោះការចុះផ្សាយខុសពីការពិត ។
ចំពោះករណីខាងលើនេះ ស្នងការដ្ឋាននគរបាលរាជធានីភ្នំពេញ សូមធ្វើការបកស្រាយបំភ្លឺថា ជាក់ស្តែងកាលពីខែកញ្ញា ឆ្នាំ២០២២ មន្ត្រីចរាចរណ៍ និងកម្លាំងអន្តរាគមន៍ នៃអធិការដ្ឋាននគរបាលខណ្ឌដង្កោ បានដាក់គោលដៅរឹតបន្តឹងច្បាប់ចរាចរណ៍ផ្លូវគោក ត្រង់ចំណុចស្ពានទឹកថ្លា ផ្លូវជាតិលេខ៣ សង្កាត់ក្រាំងពង្រ ខណ្ឌដង្កោ ប្រហែលជាម៉ោង០៩និង០០នាទី ក៏មានបុរសម្នាក់បានបើកម៉ូតូម៉ាកហុងដាសេ១២៥ ពណ៌ខ្មៅ គ្មានផ្លាកលេខឆ្លងកាត់គោលដៅ ក៏សមត្ថកិច្ចហៅឲ្យឈប់ ដើម្បីធ្វើការត្រួតពិនិត្យរកឯកសារផ្សេងៗ រួចមិនបានធ្វើការផាកពិន័យនោះទេ គ្រាន់តែធ្វើការណែនាំអប់រំហើយឲ្យបន្តដំណើរទៅមុខទៀត ប៉ុន្តែបុរសម្នាក់នោះ មិនទាន់បានទៅភ្លាមនោះទេ ហើយក៏មាននារី ចំនួន០៣នាក់ ជិះម៉ូតូម៉ាកហុងដា១២៥ ពណ៌ខ្មៅ ពាក់មួកសុវត្ថិភាពចំនួន០២នាក់ គ្មានពាក់មួកសុវត្ថិភាពម្នាក់ ក៏មន្ត្រីចរាចរណ៍ហៅឲ្យឈប់ដើម្បីធ្វើការផាកពិន័យតាមច្បាប់ ។
ក្រោយពីសមត្ថកិច្ច សរសេរបណ្ណផាកពិន័យផ្តិតមេដៃរួច នារី០៣នាក់នោះ មិនមានលុយបង់ផាកពិន័យទេ ក៏សមត្ថកិច្ចឲ្យបន្តដំណើរទៀត ដោយមិនបានធ្វើការបង់ផាកពិន័យឡើយ គឺត្រឹមធ្វើការណែនាំអប់រំ ពេលនារី០៣នាក់ នោះដើរចេញពីគោលដៅ ស្រាប់តែបុរសខាងលើ បានលួចថតវីដេអូពីសកម្មភាព រួចប្រាប់នារីទាំង០៣នាក់ ឲ្យទាមទារយកបណ្ណផាកពិន័យពីសមត្ថកិច្ចដដែលៗ ដោយមិនបានដឹងថា នារី០៣នាក់នោះ សមត្ថកិច្ចមិនបានធ្វើការផាកពិន័យនោះទេ ។
សូមបញ្ជាក់បន្ថែមដល់ការឡាយរបស់បុគ្គលជាម្ចាស់ផេក វិទ្យុប្រជាជនភ្នំពេញ ឲ្យបានដឹងច្បាស់ថា ការអនុវត្តច្បាប់ចរាចរណ៍ មិនមែនត្រឹមតែមន្ត្រីចរាចរណ៍ទេ គឺមានក្រុមការងារចំរុះរួមមានទាំងមន្ត្រីចរាចរណ៍ និងកម្លាំងអន្តរាគមន៍ ដើម្បីជួយអន្តរាគមន៍នៅពេលប៉ាតុភាពកើតឡើង ឬក្រុមល្មើសជិះរត់គេចគឺកម្លាំងចំរុះនឹងធ្វើការដេញឃាត់ដើម្បីអនុត្តតាមនីតិវិធីច្បាប់។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បញ្ជាក់ថាសូមមើលឲ្យច្បាស់ថា អ្នកដែលអង្គុយសរសេរបណ្ណផាកពិន័យនៅទីតាំងនោះ គឺមន្ត្រីចរាចរណ៍ ដូចឃើញក្នុងរូបភាពនេះស្រាប់ ៕
ចែករំលែកព័តមាននេះ