ភ្នំពេញ៖ កូនប្រុស​ពៅរបស់​លោក គង់ គាំ គឺលោក គង់ ម៉ូនីកា ប្រធានគណបក្ស​ឆន្ទៈខ្មែរ រួមទាំង​អ្នកជំនិត ២នាក់ទៀត ត្រូវបានបញ្ចប់មុខតំណែង​ពីឧត្តមក្រុមប្រឹក្សាពិគ្រោះ និងផ្តល់យោបល់​ហើយ។ ការសម្រេចបញ្ចប់​មុខតំណែងនេះ ត្រូវបាន​ធ្វើឡើង តាមរយៈព្រះរាជសារ​របស់ព្រះមហាក្សត្រ ចុះថ្ងៃទី៤ ខែតុលា ឆ្នាំ២០២២​ គឺតែមួយថ្ងៃប៉ុណ្ណោះ បន្ទាប់ពី​គណបក្សឆន្ទៈខ្មែរ បានសម្រេច​​មិនឈរឈ្មោះ​ ចូលរួម​ការបោះឆ្នោត នៅឆ្នាំ២០២៣ ហើយបានប្រកាស​រួបរួម​ជាមួយ​គណបក្សភ្លើងទៀន។​

សូមរម្លឹកថា លោក គង់ ម៉ូនីកា កូនប្រុសពៅរបស់​លោក គង់ គាំ បានបង្កើតគណបក្ស​ឆន្ទៈខ្មែរ នៅក្រោយ​តុលាការកំពូល បានសម្រេចរំលាយ​គណបក្ស​សង្គ្រោះជាតិ នាថ្ងៃទី១៦ ខែវិច្ឆិកា ឆ្នាំ២០១៧​។ ក្រោយមក លោក គង់ គាំ និងកូនប្រុស​ម្នាក់ទៀត គឺលោក គង់ បូរ៉ា បានចូលរួម​​ជាមួយ​លោក គង់ ម៉ូនីកា ក្នុងគណបក្សឆន្ទៈខ្មែរ ក្រោយពី​ស្នើសុំ​សិទ្ធិ​ធ្វើនយោបាយឡើងវិញ។​

លោក គង់ ម៉ូនីកា ប្រធានគណបក្ស​ឆន្ទៈខ្មែរ បានចូលរួម​ក្នុងការបោះឆ្នោតជាតិ នៅឆ្នាំ២០១៨ ជាមួយ​នឹងគណបក្ស​នយោបាយ ១៩ផ្សេងទៀត។ ប៉ុន្តែលទ្ធផល មានតែគណបក្ស​ប្រជាជនកម្ពុជា តែមួយប៉ុណ្ណោះ បានជាប់ឆ្នោត ទទួលបានអាសនៈរដ្ឋសភា ទាំង ១២៥អាសនៈ។

នៅថ្ងៃទី៦ ខែកញ្ញា ឆ្នាំ២០១៨ ព្រះករុណា ព្រះមហាក្សត្រ បានចេញព្រះរាជក្រឹត្យ តែងតាំង​សមាសភាព​ឧត្តមក្រុមប្រឹក្សា​ពិគ្រោះ និងផ្តល់យោបល់ ដែល​មកពីគណបក្សនយោបាយ ចំនួន ១៦​គណបក្ស ខណៈដែលគណបក្ស ៤ផ្សេងទៀត ដែលចូលរួម​ការបោះឆ្នោត ឆ្នាំ២០១៨ បានសម្រេច​មិនចូលរួមក្នុងឧត្តមក្រុមប្រឹក្សាពិគ្រោះ និងផ្តល់​យោបល់​​ឡើយ​។

រាជរដ្ឋាភិបាល បានសម្រេច​ផ្តល់​តួនាទី​ដល់​តំណាង​គណបក្សនយោបាយនិមួយៗ ដែលចូលរួមក្នុងឧត្តមក្រុមប្រឹក្សាពិគ្រោះ និងផ្តល់យោបល់ ​ចំនួន ​២​រូប គឺមាន​​ប្រធាន​គណបក្ស​នី​មួយៗ ជា​ប្រធាន​ប្រតិភូ មាន​ឋានៈ​ស្មើ​ទេសរដ្ឋមន្ត្រី ហើយ​អនុប្រធាន​គណបក្ស ជា​អនុប្រធាន​ប្រតិភូ  មាន​ឋានៈ​ស្មើ​រដ្ឋមន្ត្រី​។ ពួកគេ​ ទទួលបាន​ប្រាក់ខែពី​រដ្ឋាភិបាល ដូច​​ចែង​ក្នុង​ច្បាប់​។ ចំពោះ​ប្រធាន​ប្រតិភូ មិន​ត្រឹមតែ​មាន​ឋានៈ​ស្មើ​ទេសរដ្ឋមន្ត្រី​ទេ តែ​ថែមទាំង​ក្លាយជា​ទីប្រឹក្សា​របស់រាជ​​រដ្ឋាភិបាលថែម​​ទៀតផង​៕