ភ្នំពេញ៖ សហភាពសហព័ន្ធយុវជនកម្ពុជា (ស.ស.យ.ក.) បានប្រកាសថា ស.ស.យ.ក.  នឹងរៀប​ចំ​កម្មវិធី   «សមាធិរលឹកដួងព្រះវិញ្ញាណក្ខន្ធ» នៅថ្ងៃទី១៥  ខែតុលា ឆ្នាំ២០២២ នៅសួនច្បារខាងមុខ​ព្រះបរមរាជវាំង ដែលគ្រោងនឹងប្រព្រឹត្តទៅ នៅ​ថ្ងៃសៅរ៍ ទី១៥ ខែ​តុលា ឆ្នាំ​២០២២ វេលាម៉ោង ៥រសៀល នៅ​សួនច្បារខាងមុខ​ព្រះបរមរាជវាំង។

​​សេចក្តីប្រកាស លើកឡើងថា កម្មវិធី «សមាធិ​រម្លឹក​ដួងព្រះវិញ្ញាណក្ខន្ធ​» ត្រូវបានរៀបចំឡើង ក្នុងគោលបំណង៖ ១-ចូលរួមរម្លឹក​គម្រប់ខួប ១០ព្រះវស្សានៃការយាង​សោយព្រះទិវង្គត​របស់​ព្រះករុណា ប្រះមហាវីរក្សត្រ ព្រះបរមរតនកោដ្ឋ ២-បង្ហាញពីទឹកចិត្ត និងស្មារតី​នៃការចង​ចាំ​ចំពោះព្រះរាជបណ្តាំដ៏ថ្លៃថ្លា និងពោលពេញដោយ​អត្ថន័យ​ទូន្មាន ដែល​បានឆ្លាក់លើផ្ទាំង​សិលា ដែល​ជាព្រះរាជឱង្ការរបស់​ព្រះករុណា ព្រះមហាវីរក្សត្រ ព្រះបរមរតនកោដ្ឋ ដែលបានឆ្លាក់លើ​ផ្ទាំងសិលា​នៅសួនច្បារ ព្រះរាជបណ្តាំ និង៣-រម្លឹក​ពីគំរូវីរភាព និងការ​សម្តែងនូវ​មនោសញ្ចេត​នា​កតញ្ញូកតវេទីប្រកបដោយ​ការគោរពដ៏ខ្ពង់ខ្ពស់​ថ្វាយព្រះមហាករុណាទិគុណដ៏ប្រសើរ​ថ្លៃថ្លា ប្រកបដោយ​សេចក្តី​នឹករលឹក​សោកស្តាយ​រកអ្វីប្រៀបផ្ទឹម​ពុំបាន ជាមួយ​នឹង​សេចក្តីអំណរព្រះរាជ​គុណជាអនេក​អន័គ្ឃគ្មានថ្ងៃបំភ្លេចបាន​។

សេចក្តីប្រកាស បន្ថែមថា កម្មវិធី​សមាធិរម្លឹក​ដួង​ព្រះវិញ្ញាណក្ខន្ធ ជាកម្មវិធី ដែល​មានព្រះសង្ឃ និងពុទ្ធបរិស័ទ និមន្ត​ និងអញ្ជើញចូលរួម​ពីគ្រប់ទិសទី ដើម្បីថ្វាយគ្រឿង​សក្ការៈ និងធ្វើ​សមាធិ​សូត្រ​សត្តប្បករុណាភិធម្មបង្សុកូលឧទ្ទិសមហាព្រះរាជ​កុសលថ្វាយដួង​ព្រះវិញ្ញាណក្ខន្ធ ព្រះបរមរតនកោដ្ឋ សូមព្រះវិញ្ញាណក្ខន្ធ​ព្រះអង្គ បាន​យាងគង់​ប្រថាប់ សោយសុខ ក្នុងព្រះបរមសុគតិ​ភពនាឋានព្រះបរមសុខដ៏ខ្ពង់ខ្ពស់​៕