រាជធានីភ្នំពេញ ៖ ពាណិជ្ជករជនជាតិចិនម្នាក់ត្រូវបានបញ្ជូនមកកាន់សាលាដំបូងរាជធានីភ្នំពេញនាថ្ងៃទី៩ មីនា ដើម្បីកាត់ទោសពីបទ.ឆបោកប្រាក់ចំនួន២០លានយន់ពីក្រុមហ៊ុនចិនមួយនៅប្រទេសចិន
រាជធានីភ្នំពេញ ៖ ពាណិជ្ជករជនជាតិចិនម្នាក់ត្រូវបានបញ្ជូនមកកាន់សាលាដំបូងរាជធានីភ្នំពេញនាថ្ងៃទី៩ មីនា ដើម្បីកាត់ទោសពីបទ.ឆបោកប្រាក់ចំនួន២០លានយន់ពីក្រុមហ៊ុនចិនមួយនៅប្រទេសចិន ។ ជនជាប់ចោទឈ្មោះ HU WEI MING ភេទប្រុស អាយុ៤៣ឆ្នាំ ជាប្រធានក្រុមហ៊ុន ញូអេស៊ែអ៊ីនវេសមិន នៅកម្ពុជា និងជាម្ចាស់ភាគហ៊ុនអ៊ូថាយនៅប្រទេសចិន ។ សវនាការដែលដឹកនាំដោយលោកចៅក្រម សេង លៀង ជាចៅក្រមជំនុំជំរះនៅពេញមួយថ្ងៃទី ៩ មីនា បានចោទលោក HU WEI MING ពីបទ.ឆបោកប្រាក់ប្រព្រឹត្តកាលពីខែកញ្ញា ឆ្នាំ ២០១៣នៅប្រទេសចិនដែលមានទឹកប្រាក់ដើមចំនួន២០លានយន់ពីក្រុមហ៊ុនយូរ មិញហ័រ ។
ប្រឈមមុខបទចោទប្រកាន់នេះ លោក HU WEI MING បានឆ្លើយដោយមានអ្នកបកប្រែភាសារក្នុងសវនាការថា នៅអំឡុងខែកញ្ញា ឆ្នាំ ២០១៣ ក្រុមហ៊ុនអ៊ូថាយនៅប្រទេសចិនមានវិបត្តិខ្វះថវិកាក៏បានខ្ចីចងការប្រាក់ពីក្រុមហ៊ុន យូរមិញហ័រ ដោយមានគណនេយ្យករក្រុមហ៊ុនជាអ្នកមកបំពេញបែបបទក្នុងការខ្ចីចងការប្រាក់រវាងក្រុមហ៊ុន និងក្រុមហ៊ុន មិនមែនក្នុងនាមបុគ្គលទេ ។ ហើយចំពោះការសង ឬបង់ការប្រាក់យ៉ាងណានោះលោកមិនដឹងទេ ដោយសារខ្លួនគេគ្រាន់តែជាម្ចាស់ភាគហ៊ុនមួយប៉ុណ្ណោះ ។ ជនជាប់ចោទបានឆ្លើយទៀតថា នៅអំឡុងឆ្នាំ ២០១២ លោកបានចូសញ្ជាតិខ្មែរ និងបានទទួលអត្តសញ្ញាណប័ណ្ណសញ្ជាតិខ្មែរ ហើយបានទិញដីនៅផ្លូវជាតិលេខ១ ដើម្បីកសាងកំពង់ផែស្ងួតមួយសំរាប់វិនិយោគ ហើយចំពោះវិវាទនៅប្រទេសចិនខ្លួនមិនដឹងទេ ។
ចំណែកដើមបណ្ដឹងលោក យូរមិញហ័រ បានបញ្ជាក់នៅក្នុងបណ្ដឹងថា នៅអំឡុងឆ្នាំ២០១៣ លោក HU WEI MING បានបបួលខ្លួនមករកស៊ីនៅប្រទេសកម្ពុជា ហើយតាមរយៈមិត្តភក្តិ លោក យូរ មិញហ័រ បានទំលាក់ដើមទុនចំនួន២០លានយន់មកឱ្យលោក HU WEI MING ដើម្បីចូលហ៊ុនគ្នាធ្វើការរកស៊ីតាមរយៈគណនេយ្យករ ដោយ HU WEI MING សន្យាដាក់ដី និងផ្ទះនៅប្រទេសចិនក្នុងតម្លៃ៧លានយន់ ។ ក្នុងពាក្យបណ្ដឹងរបស់លោក យូរមីញហ័រ បានទាមទារសំណង២០លានយន់ និងជំងឺចិត្ត៥លាន៩សែនយន់ ព្រមទាំងសុំឱ្យតុលាការផ្ដន្ទាទោសលោក HU WEI MING តាមច្បាប់ ។
ទោះបីជនត្រូវចោទបានប្រកែកដោះសារបែបណា ប៉ុន្តែតំណាងអយ្យការបានធ្វើសេចក្ដីសន្និដ្ផានតម្កល់ទុកបទចោទឱ្យនៅជាធរមាន និងសុំឱ្យចៅក្រមផ្ដន្ទាទោសតាមច្បាប់ ។ ចៅក្រមជំនុំជំរះបានសម្រេចលើកពេលប្រកាសសាលក្រមនៅថ្ងៃទី២៤ មីនា ខាងមុខនេះ ៕
ចែករំលែកព័តមាននេះ