រាជធានីភ្នំពេញ ៖ បុរសម្នាក់ត្រូវបានមិត្តភក្តិរួមតុផឹកស៊ីជាមួយគ្នាម្នាក់កាប់ឱ្យរងរបួសធ្ងន់បន្ទាប់ពីផឹកស៊ីស្រវឹងធ្លាក់ភ្នែកនិយាយឌឺដងដាក់ បង្កឱ្យមានការភ្ញាក់ផ្អើលកាលពីវេលាម៉ោង៧និង១០នាទីយប់ ថ្ងៃទី៩ មីនា
រាជធានីភ្នំពេញ ៖ បុរសម្នាក់ត្រូវបានមិត្តភក្តិរួមតុផឹកស៊ីជាមួយគ្នាម្នាក់កាប់ឱ្យរងរបួសធ្ងន់បន្ទាប់ពីផឹកស៊ីស្រវឹងធ្លាក់ភ្នែកនិយាយឌឺដងដាក់ បង្កឱ្យមានការភ្ញាក់ផ្អើលកាលពីវេលាម៉ោង៧និង១០នាទីយប់ ថ្ងៃទី៩ មីនា ត្រង់ចំណុចតាមបណ្តោយផ្លូវ៣៧១ ក្នុងតូបផឹកស៊ីមួយកន្លែងក្បែរ និងក្លោងទ្វារវត្តពោធិ៍ញាណ ស្ថិតក្នុងភូមិឬស្សីទី៣ សង្កាត់ស្ទឹងមានជ័យ ខណ្ឌមានជ័យ ។ ជនបង្កហេតុមានឈ្មោះ លាង ឆៃ ភេទប្រុស អាយុ៣៤ឆ្នាំ ជាកម្មករលើកកញ្ចក់ ស្នាក់នៅផ្ទះជួល សង្កាត់បឹងទំពុន ខណ្ឌមានជ័យ មានស្រុកកំណើតនៅភូមិសឹង្ហ ឃុំសឹង្ហ ស្រុកសំរោង ។ ចំណែកឯជនរងគ្រោះមានឈ្មោះ នុត សុផាត ភេទប្រុស អាយុ៣៨ឆ្នាំ ជាកម្មករលើកកញ្ចក់ ស្នាក់នៅផ្ទះជួលក្នុងភូមិត្នោតជ្រុំ៣ សង្កាត់បឹងទំពុន ខណ្ឌមានជ័យ មានស្រុកកំណើតនៅស្រុកស្អាង ខេត្តកណ្តាល ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅវេលាម៉ោង៥និង៣០នាទីល្ងាចថ្ងៃដដែលគេឃើញជនបង្ក និងជនរងគ្រោះរួមទាំងបុរសពីនាក់ទៀតបានអង្គុយផឹកស៊ីជុំគ្នានៅចំណុចកើតហេតុខាងលើយ៉ាងសប្បាយរីករាយ ។ លុះពេលផឹកអស់ប្រមាណជា៧ទៅ៨លីត្របានស្រវឹងជោកអស់រៀងៗខ្លួន ហើយចាប់ផ្តើមនិយាយតឹងសរសៃ.កដាក់គ្នា លុះដល់វេលាកើតហេតុមិនដឹងថា ជនបង្ក និងជនរងគ្រោះបាននិយាយទាស់សម្តីគ្នារឿងអ្វីនោះទេ ស្រាប់តែជនបង្កបានដើរទៅផ្ទះជួលរបស់ខ្លួនមួយសន្ទុះរួចក៏ដើរត្រលប់មកវិញ ហើយបានសោយអាវដកកាំបិតចេញពីចង្កេះខោរួចដេញកាប់ប្រហារទៅលើជនរងគ្រោះជាច្រើនកាំបិតបណ្តាលឱ្យជនរងគ្រោះរងរបួសធ្ងន់ធ្ងរ ។ ចំណែកឯជនបង្កខំព្រឹងព្យាយាមរត់គេចតែត្រូវប្រជាពលរដ្ឋដែលឃើញហេតុការណ៍ចាប់ឃាត់ខ្លួនប្រគល់ឱ្យសមត្ថកិច្ចយកទៅសាកសួរ ។
បើតាមសម្តីពីបុរសដែលជាជនរងគ្រោះបានរៀបរាប់ឱ្យដឹងថា នៅមុនពេលកើតហេតុរូបគេបានអង្គុយផឹកស្រាជាមួយជនបង្ក និងមិត្តភក្តិរួមការងារពីនាក់ទៀត លុះដល់ស្រវឹងរៀងខ្លួនអស់ជនបង្កចាប់ផ្តើមនិយាយច្រើន និងនិយាយឌឺដងឱ្យបុរសម្នាក់ទៀតដែលអង្គុយផឹកស៊ីជាមួយគ្នា ហើយរូបគេខ្លាចមានរឿងក៏ដេញជនបង្កឱ្យត្រលប់ទៅវិញ ស្រាប់តែជនបង្កបានដើរទៅផ្ទះមួយសន្ទុះរួចក៏ដើរត្រឡប់មកវិញហើយដកកាំបិតកាប់មកលើរូបគាត់តែម្តងទៅ ។ បើតាមសម្តីពីបុរសដែលជាជនបង្កបានរៀបរាប់ឱ្យដឹងថា នៅមុនពេលកើតហេតុរូបគេបានដើរចេញពីធ្វើការបំណងត្រឡប់ទៅផ្ទះវិញ លុះដើរមកដល់ចំណុចកើតហេតុខាងលើក៏ជួបជនរងគ្រោះកំពុងអង្គុយផឹកស្រាជាបុរសពីរនាក់ទៀតដែលជានាក់រួមការងារជាមួយហើយក៏បានហៅរូបគេផឹក ។ លុះផឹកស្រវឹងអស់រៀងៗខ្លួនជនរងគ្រោះ និងបុរសពីរនាក់ទៀតនិយាយឌឺដងឱ្យរូបគេ ហើយក៏បានច្រាន និងវាយមកលើរូបគេបណ្តាលឱ្យគេផ្ទុះកំហឹងក៏ដើរទៅផ្ទះយកកាំបិតដេញកាប់ទៅលើជនរងគ្រោះតែមង្តទៅ ។
ក្រោយពេលកើតហេតុជនរងគ្រោះត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅគ្លីនិកឯកជន ។ ចំណែកឯជនបង្កសមត្ថកិច្ចនាំខ្លួនយកទៅសាកសួរនៅប៉ុស្តិ៍នគរដ្ឋបាលស្ទឹងមានជ័យដើម្បីរៀបចំសំណុំរឿង ចាត់ការទៅតាមនីតិវិធី ៕
ចែករំលែកព័តមាននេះ