រាជធានីភ្នំពេញ ៖ នៅថ្ងៃទី១១ មីនា រដ្ឋមន្ត្រីក្រសួងចំនួនពីរគឺរដ្ឋមន្ត្រីក្រសួងសុខាភិបាល និងរដ្ឋមន្ត្រីក្រសួងសង្គមកិច្ច ដោយមានការចូលរួមពីអភិបាលរាជធានី និងអភិបាលខេត្តកណ្តាល និងធ្វើពិធីបើកការដ្ឋានសាងសង់អគារមជ្ឈមណ្ឌលវិកលចរិត
រាជធានីភ្នំពេញ ៖ នៅថ្ងៃទី១១ មីនា រដ្ឋមន្ត្រីក្រសួងចំនួនពីរគឺរដ្ឋមន្ត្រីក្រសួងសុខាភិបាល និងរដ្ឋមន្ត្រីក្រសួងសង្គមកិច្ច ដោយមានការចូលរួមពីអភិបាលរាជធានី និងអភិបាលខេត្តកណ្តាល និងធ្វើពិធីបើកការដ្ឋានសាងសង់អគារមជ្ឈមណ្ឌលវិកលចរិត នៅក្នុងមជ្ឈមណ្ឌលកុមារកំព្រារ(បារាំង-ហុងគ្រី)ប្រសិនបើមិនមានការប្រែប្រូលអ្វីទេនោះ ដែលមានទីតាំងស្ថិតនៅកំពុងក្រទួត ស្រុកកណ្តាលស្ទឹង ខេត្តកណ្តាល ដើម្បីធ្វើការអប់រំ ព្យាបាល និងស្តារនីតិសម្បទាជនវិកលចរិត ។
លោក សន សុផល ប្រធានមន្ទីរសង្គមកិច្ចរាជធានីបានឲ្យដឹងថា រដ្ឋបាលរាជធានីបានត្រៀមថវិការប្រមាណ៥០ម៉ឺនដុល្លារសហរដ្ឋអាមេរិកដើម្បីចំណាយទៅលើការសាងសង់អគារមជ្ឈមណ្ឌលវិកលចរិត នៅក្នុងមជ្ឈមណ្ឌលកុមារកំព្រារ(បារាំង-ហុងគ្រី) លើផ្ទៃដីប្រមាណ៥ហិកតា ។ លោកបន្តថា អគារដែលត្រូវសាងសង់នៅចុងសប្តាហ៏នេះមានមួយអគារដែលមានទំហំ២០ម៉ែត្រគុណនឹង៤០ម៉ែត្រ កំពស់២ជាន់ អាចទទួលមនុស្សបានចាប់ពី៥០០នាក់ឡើងទៅ ដើម្បីធ្វើការអប់រំ ព្យាបាល និងស្តារនីតិសម្បទាជនវិកលចរិតឲ្យមានភាពប្រសើឡើង ។ លោកបានឲ្យដឹងទៀតថា រាជធានីភ្នំពេញមានជនវិកលចរិតប្រមាណជាង២០០នាក់ ដែលសព្វថ្ងៃកំពុងស្នាក់នៅមណ្ឌលសំចតព្រៃស្ពឺចំនួន១៨០នាក់ ក្នុងចំណោមជនអនាថាដែលស្នាក់នៅចំនួន៥០០នាក់ និងកំពុងធ្វើចរាចរអនាថា នៅតាមផ្លូវ និងទីសាធារណៈ ប្រមាណជាង២០នាក់ទៀត ដែលពួកគាត់មួយផ្នែកវិកលចរិកពីកំណើត និងមួយផ្នែកធំ វិកលចរិកដោយសារបែកថ្នាំ ។ លោកបានបញ្ជាក់ថា លោកពិតជាមានភាពសប្បាយរីករាយជាខ្លាំងនៅពេលដែលរាជរដ្ឋាភិបាលមានគម្រោងសាងសង់អគារសម្រាប់ជនវិកលចរិតនេះព្រោះនៅមណ្ឌលរបស់លោកមិនមានការទទួលសេវាព្យាបាលជនវិកលចរិតទេ គឺមានន័យថា អាចកាត់បន្ថយការលំបាកបានច្រើនសម្រាប់មណ្ឌលសំចតនៅពេលដែលមណ្ឌលព្យាបាលជនវិកលចរិតត្រូវបានសាងសង់រួច ។
ចំណែកលោក ប៉ា សុជាតិវង្ស អភិបាលរាជធានីភ្នំពេញនៅក្នុងពិធីបើកការដ្ឋានសាងសង់មន្ទីរពេទ្យបង្អែកដូនពេញ កាលពីពេលថ្មីៗនេះមានប្រសាសន៏ថា បច្ចុប្បន្នមានជនអនាថា និងជនវិកលចរិតដោយសារប្រើប្រាស់គ្រឿងញៀន ដើរត្រាច់ចរសុំទាននៅតាមភ្លើងស្តុប និងដងផ្លូវសាធារណៈច្រើនដែលបញ្ហាទាំងនេះបានធ្វើឲ្យប៉ះពាល់ដល់វប្បធម៌ កេរ្តិ៍ឈ្មោះ និងកិត្តិយសមុខមាត់សង្គមខ្លាំងណាស់ ។ លោកបន្តថា ដើម្បីរួមគ្នាទប់ស្កាត់ និងលប់បំបាត់ក៏ដូចជារួមគ្នាជួយអ្នកទាំងនោះរដ្ឋបាលរាជធានី ក្រសួងសង្គមកិច្ច និងផ្នែកពាក់ព័ន្ធនឹងបង្កើតឲ្យមានមណ្ឌលវិកលចរឹត ឬពេទ្យឆ្កួតជាបន្ទាន់មួយនៅខេត្តកណ្តាល ដើម្បីប្រមូលអ្នកទាំងអស់នោះយកទៅអប់រំ បណ្តុះបណ្តាល និងស្តារនិតិសម្បទាជូនពួកគេឲ្យត្រឡប់ទៅរស់នៅសហគមន៏វិញ ។
លោក ប៉ា សុជាតិវង្ស មានប្រសាសន៏ទៀតថា ការប្រមូលជនអនាថា និងអ្នកជាប់គ្រឿងញៀនបានកើនឡើងច្រើនគ្រាន់តែមណ្ឌលឱកាសខ្ញុំ មានជាង២ពាន់នាក់រកកន្លែងដាក់មិនបានផង ចំណែកមណ្ឌលព្រៃស្ពឺមានជិត២០០នាក់ និងកំពុងចុះប្រមូលជាប្រចាំរបស់អាជ្ញាធរ និងមន្ត្រីសង្គមកិច្ច ។ លោកបន្តថា ដើម្បីស្តារឲ្យប្រសើរឡើងរដ្ឋបាលរាជធានី និងក្រសួងសង្គមកិច្ច នឹងសាងសង់ពេទ្យឆ្កួត ឬមណ្ឌលវិកលចរិតតែម្តងសម្រាប់ព្យាបាលស្តារនីតិសម្បទាជូនពួកគេ ។
គួររំលឹកថា ក្នុងសម័យសង្គមរាស្ត្រនិយមបានបង្កើតពេទ្យឆ្កួតដែរនៅក្រុងតាខ្មៅ ចំណែកសម័យនេះជាលើកទី២ត្រូវបានរដ្ឋបាលរាជធានីបង្កើតឲ្យមានមជ្ឈមមណ្ឌលវិកលចរឹក ឬពេទ្យឆ្កួត នៅមជ្ឈមណ្ឌលកុមារកំព្រារ(បារាំង-ហុងគ្រី)ដែលមានទីតាំងស្ថិតនៅកំពុងក្រទួត ស្រុកកណ្តាលស្ទឹង ខេត្តកណ្តាល ដើម្បីធ្វើការអប់រំ ព្យាបាល និងស្តារនីតិសម្បទាដល់ជនវិកលចរិតឲ្យមានភាពប្រសើឡើង ៕
ចែករំលែកព័តមាននេះ