ខេត្តស្វាយរៀង ៖ អគ្គីភ័យបានឆាបឆេះយ៉ាងខ្លាំងនៅក្នុងបន្ទប់ច្រៀងខារ៉ាអូខេមួយ និងបានធ្វើឱ្យមានការភ្ញាក់ផ្អើលពេញហាង រហូតដល់ម្ចាស់ហាងទូរសព្ទ័ហៅរថយន្តពន្លត់អគ្គីភ័យពីស្នងការខេត្តមកជួយសង្គ្រោះ
ខេត្តស្វាយរៀង ៖ អគ្គីភ័យបានឆាបឆេះយ៉ាងខ្លាំងនៅក្នុងបន្ទប់ច្រៀងខារ៉ាអូខេមួយ និងបានធ្វើឱ្យមានការភ្ញាក់ផ្អើលពេញហាង រហូតដល់ម្ចាស់ហាងទូរសព្ទ័ហៅរថយន្តពន្លត់អគ្គីភ័យពីស្នងការខេត្តមកជួយសង្គ្រោះ និងធ្វើឱ្យភ្ញាក់ផ្អើលដល់អ្នកស្រុកនាំគ្នារត់ទៅចោមរោមមើលយ៉ាងកកកុញ ។ ហេតុការណ៌អគ្គីភ័យនេះបានកើតឡើងកាលពីវេលាម៉ោង៥និង៣០នាទីល្ងាច ថ្ងៃទី៨ មីនា នៅក្នុងបន្ទប់ខារ៉ាអូខេលេខ៤៤៤ ដែលស្ថិតក្នុងភូមិគោកក្តោល ឃុំគ្រោលគោ ស្រុកស្វាយជ្រំ ។
តាមការឱ្យដឹងពីនារីខារ៉ាអូខេក្នុងហាងខាងលើបានឱ្យដឹងថា មុនពេលកើតហេតុមានភ្ញៀវ៤ទៅ៥នាក់បានចូលទៅច្រៀងក្នុងបន្ទប់លេខ៤៤៤នោះ ក្រោយពីច្រៀងចប់គិតលុយចេញអស់បានមួយសន្ទុះ ស្រាប់តែមានភ្លើងឆាបឆេះចេញពីក្រោមសាឡុងក្នុងបន្ទប់ហើយអណ្តាតភ្លើងបានឆេះក្រហមច្រាលពេញបន្ទប់ និងមានផ្សែងបាញ់ចេញមកក្រៅទើបធ្វើឱ្យមានការភ្ញាក់ផ្អើលពេញហាង ហើយភ្លាមៗនោះម្ចាស់ហាងក៏បានទូរសព្ទ័ហៅឡានទឹកពីស្នងការខេត្តមកជួយពន្លត់ ចំណែកមនុស្សនៅក្នុងហាងម្នាក់ៗបានរត់រកទឹក អ្នកខ្លះនាំគ្នាអូសយកសាឡុងដែលភ្លើងឆេះចេញមកក្រៅ និងយកបំពង់ផ្សែងពន្លត់អគ្គីភ័យមកបាញ់ពន្លត់អស់៣បំពង់ទើបពន្លត់ភ្លើងបាន ហើយពេលភ្លើងត្រូវពន្លត់បានហើយនោះទើបឡានទឹកមកដល់ ។
ទោះជាយ៉ាងណាក៏ដោយហេតុការណ៌នេះត្រូវបានគេសន្និដ្ឋានថា បណ្តាលមកពីភ្ញៀវដែលចូលច្រៀងខារ៉ាអូខេនោះជក់បារីរួចបោះកន្ទុយបារីចូលក្រោមសាឡុង ហើយគ្មានអ្នកណាដឹង ទើបធ្វើឱ្យភ្លើងឆាបឆេះទៅជាអគ្គីភ័យបែបនេះ តែសំណាងហើយដែលហាងនេះមានបំពង់ពន្លត់អគ្គីភ័យ និងបានបាញ់ពន្លត់ឱ្យរលត់ទាន់ពេលវេលាកុំអីអាសន្នធំហើយ ។ ហេតុការណ៌នេះមិនបានបណ្តាលឱ្យនរណាម្នាក់រងរបួសនោះទេត្រឹមតែធ្វើឱ្យខូចខាតទ្រព្យសម្បត្តិក្នុងងប៉ុណ្ណោះ ៕
ចែករំលែកព័តមាននេះ