អាជីវករខ្មែរនៅផ្សាររុងក្លឿត្រូវបានភាគីថៃហាមលែងឱ្យលក់ទំនិញរំលោ.ភកម្មសិទ្ធិបញ្ញាទៀតហើយ
ខេត្ដបន្ទាយមានជ័យ ៖ ក្នុងជំនួបពិភាក្សារវាងអាជ្ញាធរខេត្តបន្ទាយមានជ័យ ជាមួយនាយឧត្តមសេនីយ៍ផ្កាយ៤ថៃ នៅបន្ទាយទាហានឈុតខ្មៅ
ខេត្ដបន្ទាយមានជ័យ ៖ ក្នុងជំនួបពិភាក្សារវាងអាជ្ញាធរខេត្តបន្ទាយមានជ័យ ជាមួយនាយឧត្តមសេនីយ៍ផ្កាយ៤ថៃ នៅបន្ទាយទាហានឈុតខ្មៅ
ខេត្ដបន្ទាយមានជ័យ ៖ ក្នុងជំនួបពិភាក្សារវាងអាជ្ញាធរខេត្តបន្ទាយមានជ័យ ជាមួយនាយឧត្តមសេនីយ៍ផ្កាយ៤ថៃ នៅបន្ទាយទាហានឈុតខ្មៅ ជាប់ច្រកទ្វារអន្តរជាតិខ្លងលឹក ឈមនឹងទឹកដីកម្ពុជាច្រកទ្វារអន្តរជាតិប៉ោយប៉ែត នាព្រឹកថ្ងៃទី៨ ខែមីនា ជាលទ្ធផលសុំឲ្យអាជីវករខ្មែរ នៅផ្សាររុងកឿបើកតូបលក់ដូរដូចដើម ប៉ុន្ដែហាមលក់ទំនិញរំលោភកម្មសិទ្ធិបញ្ញា ។
ភាគីកម្ពុជា ដឹកនាំដោយលោក សួន បវរ អភិបាលខេត្ត អមដោយមន្ត្រីនិងសមត្ថកិច្ចតំណាងស្ថាប័នពាក់ព័ន្ធក្នុងខេត្ត និងមន្ដ្រីច្រកទ្វារអន្តរជាតិប៉ោយប៉ែត ។ ចំណែកភាគីថៃដឹកនាំដោយនាយឧត្តមសេនីយ៍ ប៊ុនឈូ កើតឆូតអនុប្រធានមជ្ឈមណ្ឌលសន្តិសុខជាតិថៃ ។
ក្នុងជំនួបប្រជុំដ៏ខ្លីនៅក្នុងបន្ទាយទាហានឈុតខ្មៅថៃ លោកនាយឧត្តមសេនីយ៍ ប៊ុនឈូ កើតឆូត មានប្រសាសន៍ថា តាមពិតរឿងទំនិញរំលោភកម្មសិទ្ធិបញ្ញា ខាងថៃមិនមែនអនុវត្តច្បាប់តឹងរ៉ឺងតែនៅតាមបន្ទាត់ព្រំដែនទេ ពោលគឺធ្វើឡើងទូទាំងប្រទេសថៃតែម្តង ព្រោះថាថៃបានចុះសន្ធិសញ្ញាជាមួយពិភពលោក ហើយក៏រងបណ្តឹងពីប្រទេសជាច្រើនផងដែរ ដូចជាអាមេរិក បារាំង និងប្រទេសមួយចំនួនទៀត ។
លោកនាយឧត្តមសេនីយ៍រូបនេះបន្តថា កម្ពុជានិងថៃមានចំណងមិត្តភាពជាប្រទេសជិតខាងជាយូរលង់មកហើយ ដូច្នេះរាល់បញ្ហាត្រូវរួមគ្នាដោះស្រាយ និងធ្វើយ៉ាងណាកុំឲ្យមានផលប៉ះពាល់ដល់អាជីវករដែលប្រកបរបររកស៊ីនៅតាមបន្ទាត់ព្រំដែន ។
ក្រោយជំនួបប្រជុំ ភាគីទាំង២បានធ្វើដំណើរតាមគ្រឿងយន្តតូចៗប្រើអាគុយចូលទៅផ្សាររុងក្លឿ ចំណុចដំបូលខៀវ ដើម្បីពិនិត្យមើលនិងជួបសំណេះសំណាលជាមួយអាជីវករខ្មែរនៅទីនោះ ។ ដើម្បីកុំឲ្យខាតបង់ប្រាក់ចំណូលគ្រួសារ ឬថ្លៃបង់តូប លោកនាយឧត្តមសេនីយ៍ថៃ បានប្រាប់អាជីវករឲ្យបើកតូបលក់ដូរឡើងវិញ ប៉ុន្តែត្រូវលក់តែទំនិញទាំងឡាយណាដែលគេមិនហាមឃាត់ គឺទំនិញស្របច្បាប់ ។
ក្នុងជំនួបមួយនៅអគារស្នាក់ការច្រកទ្វារអន្តរជាតិប៉ោយប៉ែត ក្រោយវិលត្រឡប់ពីប្រទេសថៃ លោកអភិបាលខេត្ត សួន បវរ មានប្រសាសន៍ថា ជំនួបពិភាក្សាជាមួយភាគីថៃថ្ងៃនេះ ជាលទ្ធផលគឺប្រកបដោយមនោសញ្ចេតនា ។ លោកថា ប្រទេសថៃគេមានការយោគយល់ច្រេីន ប៉ុន្តែអាចរងសម្ពាធពីបរទេសរឿងទំនិញរំលោភកម្មសិទ្ធិបញ្ញានោះ ដូច្នេះរាល់ទំនិញល្មើសច្បាប់គេមិនអនុញ្ញាតឲ្យលក់លើទឹកដីគេជាដាច់ខាត ។
លោកអភិបាលខេត្ត បន្តថា ដើម្បីបញ្ចៀសបញ្ហាគឺត្រូវកសាងផ្សារមួយនៅលើទឹកដីកម្ពុជាជាប់បន្ទាត់ព្រំដែន ហើយនាំគ្នាដឹកទំនិញដែលថៃហាមឃាត់យកត្រឡប់មកលក់នៅផ្សារខ្មែរវិញ ។ ជាមួយគ្នានេះ លោកស្នើសុំឲ្យអាជ្ញាធរ និងសមត្ថកិច្ចក្រុងប៉ោយប៉ែត ធ្វេីយ៉ាងណាផ្សព្វផ្សាយឲ្យទូលំទូលាយរឿងទំនិញរំលោភកម្មសិទ្ធិបញ្ញាដែលថៃហាមឃាត់នោះ ដើម្បីឲ្យអាជីវករខ្មែរគ្រប់គ្នាបានដឹង និងមិនត្រូវនាំចូលទៅលក់នៅទឹកដីរបស់ថៃទៀតឡើយ ។
លោកអភិបាលខេត្ត បន្តទៀតថា មុនបញ្ជូនទំនិញទាំងនោះត្រឡប់មកវិញ ត្រូវបង្កើតគណៈកម្មការមួយដើម្បីត្រួតពិនិត្យ ក្រែងមានជនឆ្លៀតឱកាសនាំទំនិញផ្សេងៗគេចពន្ធ ឬខុសច្បាប់ចូល ។
អាជ្ញាធរថៃផ្សព្វផ្សាយឱ្យអាជីវករខ្មែរធ្វើប័ណ្ណស្នាក់នៅក្នុងផ្សាររុងក្លឿ
ខេត្តបន្ទាយមានជ័យ ៖ អាជីវករខ្មែរជាង២០០នាក់ដែលលក់ដូរនៅផ្សាររុងក្លឿ ប្រទេសថៃ នៅថ្ងៃទី៤ ខែមីនា ត្រូវបានអាជ្ញាធរថៃធ្វើការត្រូតពិនិត្យសុពលភាពលិខិតឆ្លងដែន និងកំណត់ឱ្យធ្វើប័ណ្ណស៊ីជម្ពូទាំងអស់គ្នា ទើបឱ្យស្នាក់នៅបាន ។
អាជីវខ្មែរនៅផ្សាររុងក្លឿ បានប្រាប់ឱ្យដឹងថា អាជ្ញាធរថៃបានហៅអាជីវករខ្មែរជាង២០០នាក់ ទៅធ្វើការត្រួតពិនិត្យសុពលភាពលិខិតឆ្លងដែន ឬប័ណ្ណឆ្លងដែន បើអាជីវករឬកម្មករណាប្រើលិខិតឆ្លងដែន ឬប័ណ្ណឆ្លងដែនផុតកំណត់ គឺមិនឱ្យស្នាក់នៅក្នុងផ្សាររុងក្លឿទេ ។
អាជីវករដដែលបញ្ជាក់ថា នៅពេលធ្វើការត្រួតពិនិត្យលិខិតឆ្លងដែននោះ អាជ្ញាធរថៃបានណែនាំឱ្យអាជីវករ និងកម្មករខ្មែរដែលស្នាក់នៅផ្សាររុងក្លឿ តម្រូវឱ្យធ្វើប័ណ្ណពណ៌ស៊ីជម្ពូទើបឱ្យស្នាក់នៅបាន ដោយភាគីថៃប្រាប់ថានេះគឺជាការផ្តល់ដំណឹងជាមុន តែមិនទាន់បានកំណត់ឱ្យធ្វើនៅថ្ងៃណានោះទេ ។
កន្លងមក អាជីវករខ្មែរចូលទៅលក់ដូរនៅផ្សាររុងក្លឿ គឺទៅព្រឹកវិលល្ងាចដោយទិញសំបុត្រចូលម្នាក់១.០០០រៀល ។ ក្រោយមក រាជរដ្ឋាភិបាលកម្ពុជាបានកំណត់ឱ្យបញ្ឈប់ការលក់សំបុត្រ ចាប់ពីថ្ងៃទី១១ ខែមករា ឆ្នាំ២០១៧ ដោយចែកសំបុត្រឲ្យមិនគិតថ្លៃ ។
ចំណែកអាជីវករដែលស្នាក់នៅក្នុងផ្សាររុងក្លឿ គឺតម្រូវឱ្យមានប័ណ្ណឆ្លងដែនទើបអាចស្នាក់នៅបាន ដែលប័ណ្ណឆ្លងដែននេះមានសុពលភាព២ឆ្នាំ តម្លៃធ្វើចំនួន២៥.០០០រៀល ដែលកំណត់រយៈពេល៧ថ្ងៃ និងបន្តម្តងអស់ចំនួន៥.០០០រៀល ។
នៅព្រឹកថ្ងៃទី៤ ខែមីនា អាជ្ញាធរថៃបានហៅអាជីវករខ្មែរជាង២០០នាក់ធ្វើការត្រួតពិនិត្យលិខិតឆ្លងដែន ហើយណែនាំឱ្យធ្វើប័ណ្ណស៊ីជម្ពូ ដោយក្នុងម្នាក់តម្រូវឱ្យបង់លុយចំនួន១.៣០០បាត មានសុពលភាព៣ខែត្រូវធ្វើម្តងទៀត ទើបអាចឱ្យអាជីវករខ្មែរស្នាក់នៅក្នុងផ្សារបាន តែមិនទាន់កំណត់ថ្ងៃឱ្យធ្វើនៅឡើយទេ ។
ក្រុមអាជីវករខ្មែរបានបញ្ជាក់ថា នៅផ្សាររុងក្លឿរបស់ថៃ ជាប់ច្រកទ្វារអន្តរជាតិប៉ោយប៉ែត មានអាជីវករខ្មែរលក់ដូរប្រមាណ៩០ភាគរយ ដោយជួលតូបលក់ដូរមានតម្លៃខ្ពស់គឺក្នុង១តូប១ខែជាង២ម៉ឺនបាត ។ ឯអាជីវករនិងកម្មករដែលស្នាក់នៅដេកចាំតូបមានជិត១.០០០នាក់ ភាគច្រើនជាកម្មករចាំតូបឱ្យគេ និងជាង១.០០០នាក់ត្រឡប់ចូលដីខ្មែរវិញនៅវេលាល្ងាច ។
ក្រុមអាជីវករខ្មែរបានបញ្ជាក់ថា នៅដើមឆ្នាំ២០១៧នេះ អាជ្ញាធរថៃបានរឹតបន្តឹងអាជីវករខ្មែរលក់ដូរនៅផ្សាររុងក្លឿដូចជា ចាប់ទំនិញនិងចាប់អាជីវករខ្មែរមួយចំនួនដោយចោទថា រំលោភកម្មសិទ្ធិបញ្ញា ។ រីឯអាជីវករខ្មែរនាំត្រីចូលទៅលក់នៅផ្សារថៃនេះ កំណត់ឱ្យបង់១គីឡូក្រាម១២បាត ហើយពេលនេះក៏បានកំណត់ឱ្យធ្វើប័ណ្ណពណ៌ស៊ីជម្ពូទៀត ទើបឱ្យស្នាក់នៅក្នុងផ្សាររុងក្លឿបាន ។
លោក វួច អូន ប្រធានគណៈកម្មាធិការច្រកទ្វារអន្តរជាតិប៉ោយប៉ែត បានប្រាប់ថា ថ្មីៗនេះ លោកបានដឹងព័ត៌មានថា អាជ្ញាធរថៃបានហៅអាជីវករខ្មែរទៅអប់រំណែនាំប្រាប់ពីទំនិញដែលប៉ះពាល់ និងរំលោភកម្មសិទ្ធិបញ្ញាត្រូវបញ្ឈប់ឱ្យលក់ដូរក្នុងផ្សាររុងក្លឿ ។ បើមានត្រូវនាំចូលមកខ្មែរវិញ ហើយបើនៅបន្តលក់គេនឹងអនុវត្តតាមច្បាប់ ។ កន្លងមក ភាគីថៃបានណែនាំឱ្យប្រជាពលរដ្ឋកម្ពុជាធ្វើការនៅប្រទេសថៃតាមបន្ទាត់ព្រំដែនធ្វើប័ណ្ណពណ៌ស៊ីជម្ពូទើបស្នាក់នៅធ្វើការងារលើទឹកដីគេបាន ៕
ចែករំលែកព័តមាននេះ