ដឹកគល់ឈើទម្លាក់ទុកនៅជិតព្រំដែនបម្រុងលោតឆត្រឆ្លងដែនទៅវៀតណាម(វីដេអូ)
- ស្វាយរៀង
រថយន្ត១គ្រឿង ពាក់ផ្លាកលេខ កណ្តាល ៣A-៣២៨១៥ ដឹកដើមចាមរី (អំពិលបារាំង-អ្នកស្រុកខ្លះហៅចន្ទគិរី) ចំនួន៨គល់ ដែលមានមុខកាត់
ខេត្តស្វាយរៀង ៖ រថយន្ត១គ្រឿង ពាក់ផ្លាកលេខ កណ្តាល ៣A-៣២៨១៥ ដឹកដើមចាមរី (អំពិលបារាំង-អ្នកស្រុកខ្លះហៅចន្ទគិរី) ចំនួន៨គល់ ដែលមានមុខកាត់ ខ្លះ៦តឹក ខ្លះ១ម៉ែត្រប្រវែង២ម៉ែត្រ មកទម្លាក់ទុកនៅលើចិញ្ចើមថ្នល់ចំណុចភូមិជៀសឫស្សី ឃុំកំពង់ចម្លង ស្រុកស្វាយជ្រំ ជិតប៉ុស្តិ៍ព្រំដែនយ៉ាំដូង និងប៉ុស្តិ៍ព្រំដែនជៀសឫស្សី ដែលសង្ស័យបម្រុងឆ្លងដែនទៅប្រទេសវៀតណាម ។
ករណីនេះ បានកើតឡើងកាលពីវេលាម៉ោងប្រមាណ៣និង១០នាទីរសៀលថ្ងៃទី៣០ ខែកញ្ញា ឆ្នាំ២០២២ កន្លងទៅ នៅជិតខ្លោងទ្វារវត្តជៀសឫស្សី ភូមិជៀសឫស្សី ឃុំកំពង់ចម្លង ស្រុកស្វាយ
ជ្រំ ។
ប្រជាពលរដ្ឋនិយាយថា កន្លងមកមានក្រុមឈ្មួញដើរប្រមូលទិញដើមឈើធំៗមានដើមចន្ទគិរីជាដើម ដឹកទៅលក់នៅប្រទេសវៀតណាម ។ ដោយឡែក នៅរសៀលថ្ងៃនោះ ពេលរថយន្តដឹកមកដល់ចំណុចផ្លូវបំបែកខាងកើតខ្លោងទ្វារវត្តជៀសឫស្សី ដោយឃើញមានក្រុមអ្នកយកព័ត៌មានបើករថយន្តតាមមកពីក្រោយ ក៏ឈប់រថយន្តរួចស្ទូចទម្លាក់ឈើចុះ រួចបើករថយន្តចូលទៅពួននៅក្នុងភូមិជិតព្រំដែននោះ ។ លុះរហូតដល់ម៉ោងប្រមាណ៥និង៣០នាទីល្ងាចថ្ងៃដដែល ស្រាប់តែចេញមកស្ទូចយកកំណាត់ឈើដាក់លើរថយន្តវិញ ហើយបើកឆ្ពោះទៅក្រុងស្វាយរៀងវិញបាត់ស្រមោល ។
បុរសម្នាក់ដែលទំនងជាអ្នកទិញ-លក់គល់ឈើនេះ បានចេញមុខមកប្រាប់អ្នកសារព័ត៌មានថា គល់អំពិលបារាំងនេះគេប្រមូលទិញពីអ្នកស្រុកស្វាយជ្រំ និងតាមវត្តនានាក្នុងខេត្ត ដឹកទៅកែច្នៃធ្វើតុ ទូ លក់ នៅរាជធានីភ្នំពេញ ។ ប៉ុន្តែនៅពេលអ្នកយកព័ត៌មានយើងសួរនាំបញ្ជាក់ទីតាំង ស្រាប់តែបុរសនោះជិះម៉ូតូគេចចេញទៅលែងនិយាយអ្វីតទៅទៀត ។
កន្លងមក គេឃើញរថយន្តដឹកដើមចន្ទគិរី ចេញពីម្តុំកៀនស្វាយ ខេត្តស្វាយរៀង ឆ្ពោះមកខេត្តស្វាយរៀង រួចទម្លាក់នៅជិតព្រំដែន។ បន្ទាប់មក គេឃើញពួកឈ្មួញវៀតណាមមកទិញឆ្លងដែនទៅប្រទេសវៀតណាម តែគេមិនដែលឃើញដឹកដើមឈើទៅខេត្តស្វាយរៀងហើយបន្តត្រឡប់ទៅរាជធានីភ្នំពេញទេ ។
បច្ចុប្បន្ន គេតែងឃើញឈ្មួញដឹកដើមឈើធំៗ មានដើមឈើប្រណីត ដើមអំពិល និងគល់ឈើ ឆ្លងដែនទៅប្រទេសវៀតណាមនាពេលយប់ ដែលសង្ស័យជាការនាំឈើឆ្លងដែនដោយខុសច្បាប់ ៕
ចែករំលែកព័តមាននេះ