រាជធានីភ្នំពេញ ៖ នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរ ជាតិប្រយុទ្ធប្រឆាំង គ្រឿងញៀន បានធ្វើការរិះគន់ខ្លាំងៗ លើស្ថាប័នតុលាការ ដែលដំណើរការកាត់ក្ដីពាក់ព័ន្ធនឹងបទល្មើសគ្រឿងញៀន គឺមិនដូចអ្វីដែលច្បាប់បានចែង ព្រោះមិនឃើញមានជនល្មើសគ្រឿងញៀនណាម្នាក់ជាប់គុកមួយជីវិតសោះ ។
ហើយបើយោងតាមស្មារតីច្បាប់អត់មានកន្លែងណាបន្ធូរសោះ គ្រប់មាត្រា ប៉ុន្តែការរឹតបន្តឹង ដែលហៅថាទម្ងន់នោះ ក៏មិនសូវបានអនុវត្ត ជាពិសេសលើអ្នកដែលមានទ្រព្យសម្បត្តិ អត់មានអ្នកណាជាប់មួយជីវិតទេ ឃើញតែ១០ឆ្នាំ១៥ឆ្នាំ ក្រោម២០ឆ្នាំ ច្បាប់មើលទៅគេសរសេរច្បាស់ណាស់ វាគ្មានកន្លែងបន្ថយ ។
លោកនាយឧត្តមសេនីយ៍ កែ គឹមយាន បានលើកសៀវភៅច្បាប់មួយក្បាល ស្ដីពីការត្រួតពិនិត្យគ្រឿងញៀន និងបានបញ្ជាក់ថា ច្បាប់តឹង តែមនុស្សអ្នកកាត់បន្ធូរ ច្បាប់គេសរសេរតឹងមែនទែន យើងអត់មានច្បាប់ប្រហារជីវិតទេ តែច្បាប់ជាប់គុកមួយជីវិតនេះ ក៏មិនមែនធូរដែរ ព្រោះឃើញចាប់ក្នុង៥គីឡូក្រាម ៤គីឡូក្រាម ៣គីឡូក្រាម អត់ឃើញមានអ្នកណាជាប់គុកមួយជីវិតទេ ។ មេខ្លោងធំៗក្នុងស្រុក អត់មានជាប់មួយជីវិតសោះ ជាប់ត្រឹម៣ឆ្នាំចេញវិញ ។
បើតុលាការអនុវត្ត និងដោះស្រាយត្រឹមត្រូវដូចច្បាប់ចែង អ្នកដែលជាប់បទល្មើសគ្រឿងញៀនធ្ងន់ធ្ងរ ក្រោយកាត់ទោសហើយ ត្រូវតែរឹបអូសទាំងទ្រព្យសម្បត្តិ ដែលពាក់ព័ន្ធនឹងគ្រឿងញៀនទាំងអស់ មិនមែនដកហូតតែវត្ថុតាង ដូចរាល់ដងនោះទេ ។
រថ្លែងខាងលើនេះរបស់លោកនាយឧត្តមសេនីយ៍ កែ គឹមយ៉ាន នៅក្នុងឱកាសផ្សព្វផ្សាយផែនការយុទ្ធនាការប្រយុទ្ធប្រឆាំងគ្រឿងញៀន ដែលក្រសួងស្ថាប័ន រាជធានី-ខេត្ត គ្រឹះស្ថានឧត្តមសិក្សា តំណាងវិទ្យុ ទូរទស្សន៍ សមាគមសិល្បករខ្មែរ សមាគមមិត្តសិល្បៈស្ម័គ្រចិត្តជួយសង្គម សហភាពសហព័ន្ធយុវជនកម្ពុជា និយ័តករកម្ពុជា ក្រុមហុ៊នទូរស័ព្ទចល័ត សមាគមរោងចក្រកាត់ដេរកម្ពុជា សរុបប្រមាណជា៣៣៥នាក់ បានចូលរួមពិធីផ្សព្វផ្សាយផែនការសកម្មភាព និងការបណ្តុះបណ្តាលជនបង្គោល នៃគណៈកម្មការផ្សព្វផ្សាយអប់រំ ដែលរៀបចំនៅសាលប្រជុំទីស្តីការក្រសួងមហាផ្ទៃ ក្រោមអធិបតីភាពនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ។
លោកនាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងថា ក្រោយពីបានទទួលសេចក្តីសម្រេចលេខ០៨សរ ចុះថ្ងៃទី១ ខែកុម្ភៈ ឆ្នាំ២០១៧ របស់រាជរដ្ឋាភិបាលនិងអនុវត្តតាមការណែនាំដ៏ខ្ពង់ខ្ពស់របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានដឹកនាំយុទ្ធនាការប្រយុទ្ធប្រឆាំងគ្រឿងញៀនខុសច្បាប់ក្នុងពិធីផ្សព្វផ្សាយកាលពីថ្ងៃទី២ ខែកុម្ភៈ ឆ្នាំ២០១៧កន្លងទៅ ក្រុមការងារអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានខិតខំរៀបចំសេចក្តីព្រាងផែនការ សកម្មភាពផ្សព្វផ្សាយអប់រំ បង្ការ ការប្រើបំពានគ្រឿងញៀន ។
គួរកត់សម្គាល់ថា កាលពីថ្ងៃទី១៣ ធ្នូ ២០១៦កន្លងទៅប្រមុខរាជរដ្ឋាភិបាលសម្តេចតេជោ ហ៊ុន សែន បានដាក់ចេញផែនការស្តីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១ រយៈពេល៦ខែ (ចាប់ពីថ្ងៃទី១ ខែមករា ដល់ថ្ងៃទី៣០ ខែមិថុនា ឆ្នាំ២០១៧) ដើម្បីប្រយុទ្ធប្រឆាំងគ្រឿងញៀននៅកម្ពុជាឲ្យកាន់តែខ្លាំងក្លានិងទទួលបានលទ្ធផលល្អឡើងថែមទៀត ៕
ចែករំលែកព័តមាននេះ