ខេត្តកំពង់ស្ពឺ ៖ ពិតជាគួរឱ្យអាសូរដល់លោកយាយណាស់មានអាយុ៧០ឆ្នាំទៅហើយបែរជារស់នៅប្រកបរបរចិញ្ចឹមជីវិតខ្លួន និងចៅដោយការដើររអេតចាយក្រោមកំដៅថ្ងៃដ៏សែនក្តៅមិនដូចមនុស្សចាស់ដទៃដែលមានកូនចិញ្ចឹមបីបាច់ថែរក្សាផ្តល់ជំរក និងរស់នៅគ្រាជីវិតចុងក្រោយ
ខេត្តកំពង់ស្ពឺ ៖ ពិតជាគួរឱ្យអាសូរដល់លោកយាយណាស់មានអាយុ៧០ឆ្នាំទៅហើយបែរជារស់នៅប្រកបរបរចិញ្ចឹមជីវិតខ្លួន និងចៅដោយការដើររអេតចាយក្រោមកំដៅថ្ងៃដ៏សែនក្តៅមិនដូចមនុស្សចាស់ដទៃដែលមានកូនចិញ្ចឹមបីបាច់ថែរក្សាផ្តល់ជំរក និងរស់នៅគ្រាជីវិតចុងក្រោយ ។ ជួបជាមួយអ្នកយកព័ត៌មានកោះសន្តិភាពនៅផ្សារត្រពាំងអំពិល ឃុំត្រពាំងគង ស្រុកសំរោងទង ខេត្តពង់ស្ពឺ លោកយាយ មីន អាយុ៧០ឆ្នាំបានរៀបរាប់ថា លោកយាយមានទីលំនៅភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្តាល ។
លោកយាយបានបន្តរៀបរាប់ថា គ្រួសារលោកយាយបានស្លាប់ចោលរាប់ឆ្នាំមកហើយដោយបន្សល់ទុកកូនប្រុសម្នាក់រស់នៅជាមួយលោកយាយ ហើយនៅឆ្នាំ២០០០គេមានប្រពន្ឋបង្កើតបានកូនប្រុសម្នាក់រហូតកូនអាយុ៥ឆ្នាំ រួចកូនលោកយាយក៏នាំប្រពន្ឋទៅរកស៊ីនៅជាយដែនដោយទុកកូនប្រុសឱ្យរស់នៅជាមួយលោកយាយចិញ្ចឹមរហូតមកដល់សព្វថ្ងៃ ។ លោកយាយបន្តថា តាំងពីកូនប្រុសលោកយាយនាំប្រពន្ធចេញទៅ បន្ទុករ៉ាប់រងចៅត្រូវធ្លាក់មកលើលោកយាយទាំងស្រុង ដោយសារតែជីវភាពខ្វះខាតណាមួយវ័យក៏កាន់តែជរាផងនោះ លោកយាយមិនអាចប្រកបការងារចិញ្ចឹមជីវិតអ្វីបានឡើយគឺមានតែជ្រើសរើសយករបរដើររើសអេតចាយនេះដើម្បីចិញ្ចឹមចៅ ។
ចំពោះប្រាក់កម្រៃបានមកក្នុង១ថ្ងៃត្រឹម៥.០០០រៀលទៅ៧.០០០រៀលតែប៉ុណ្ណោះ ប្រាក់ទាំងនេះលោកយាយត្រូវយកទៅទិញអង្ក និងម្ហូប ហើយនៅសល់បន្តិចបន្តួចទុកឱ្យចៅទៅរៀន ។ មានថ្ងៃខ្លះរើសអត់បានត្រូវនាំចៅដេកអត់បាយក៏មានដែរ ហើយពេលខ្លះក៏បានអ្នកជិតខាងចិត្តល្អយកបាយជូនម្តងម្កាលដែរទើបមានកម្លាំងដើររើសអេតចាយបន្តរកប្រាក់មកចិញ្ចឹមជីវិតលោកយាយ និងចៅ ។
លោកយាយ មីន បានរៀបរាប់ទៀតថា រាល់ថ្ងៃលោកយាយអាណិតចៅប្រុសខ្លាំងណាស់ ព្រោះតែចង់ជួយលោកយាយពេលសម្រាកពីការរៀនសូត្រគេក៏ដើររើសអេតចាយដើម្បីយកលុយមកជួយជីវភាពដែរ ។ ជាងនេះទៅទៀកលោកយាយបានផ្តាំទៅកូនប្រុស បើកូនបានឃើញកាសែតចុះផ្សាយហើយសូមនាំប្រពន្ធវិលមកផ្ទះវិញផង ព្រោះផ្ទះដែលរស់នៅសព្វថ្ងៃនេះជញ្ជាំង និងដំបូលធ្លុះធ្លាយអស់ហើយនៅខែវស្សាវិញទឹកលិចគ្មានកន្លែងដេកឡើយ ព្រោះតែផ្ទះគេជុំវិញបាននាំគ្នាចាក់ដីព័ទ្ឋជុំវិញអស់ហើយ សូមកូនវិលវិញឱ្យម្តាយបានឃើញមុខគ្រាជីវិតចុងក្រោយផង ព្រោះម្តាយរស់មិនបានយូរទៀយទេ ។
លោកយាយ មីន បានលើកម្រាមដៃដប់សំពះដល់អស់លោកសប្បុរសទាំងឡាយមេត្តាជួយឧបត្ថម្ភស្បៀងអាហារដល់លោកយាយបានហូបឆ្ងាញ់ខ្លះផង ព្រោះលោកយាយមិនដែលមានរបស់ហូបឆ្ងាញ់ឡើយ ។ ដោយក្តីអាណិតអាសូរអ្នកយកព័ត៌មានកោះសន្តិភាពប្រចាំខេត្តកំពង់ស្ពឺបានជូននូវទឹកសុទ្ឋមួយដប គោជល់១កំប៉ុង និងប្រាក់ចំនួន៥០.០០០រៀលដល់លោកយាយទុកគ្រាន់ដោះស្រាយបញ្ហាចំពោះមុខផងដែរ ៕
ចែករំលែកព័តមាននេះ