ជនជាតិវៀតណាម និងខ្មែរឥស្លាម ដាក់សម្រាស់ពេញក្នុងទន្លេ គ្មានអ្នកទប់ស្កាត់ឬបង្ក្រាប
ខេត្តកណ្ដាល ៖ បទល្មើសនេសាទដាក់សម្រាស់ធំៗ ដោយជនជាតិវៀតណាម និងខ្មែរឥស្លាម កើតមានច្រើនណាស់ រាប់សិបកន្លែងនៅក្នុងទន្លេបាសាក់
ខេត្តកណ្ដាល ៖ បទល្មើសនេសាទដាក់សម្រាស់ធំៗ ដោយជនជាតិវៀតណាម និងខ្មែរឥស្លាម កើតមានច្រើនណាស់ រាប់សិបកន្លែងនៅក្នុងទន្លេបាសាក់ ចាប់ពីតាខ្មៅដល់ស្រុកកោះធំ តាំងពីរដូវទឹកសម្រកមកដល់ពេលនេះ មិនមានជំនាញជលផលទប់ស្កាត់បង្ក្រាបហាមឃាត់ឡើយ។ បទល្មើសនេសាទដាក់សម្រាស់នេះ ជាការចាប់មេត្រីផ្ដាច់ពូជ នៅក្នុងទន្លេនាំឲ្យវិនាសហិនហោចធនធានមច្ឆជាតិ។ ទន្ទឹមនេះដែរ មន្ត្រីជំនាញជលផលដេកលក់ឈឹង សង្ស័យត្រូវថ្នាំសណ្ដំ របស់អ្នកប្រព្រឹត្តអស់ហើយ។
តាមការមើលឃើញជាក់ស្ដែង នៅក្នុងទន្លេបាសាក់ពេលនេះ ចាប់ពីក្រុងតាខ្មៅទៅដល់ព្រំដែនជ្រៃធំ ស្រុកកោះធំ មានសម្រាស់ធំៗ ស្អេកស្កះ ច្រើនរាប់រយកន្លែង ស្ទើរពេញផ្ទៃទន្លេ ដែលគេដឹងថាសម្រាស់ទាំងនោះ ប្រើមែកឈើដាក់ពន្លិចទឹក និងដោតបង្គោលឫស្សី ជុំវិញដើមត្រកៀត រឺកំប្លោកនៅពីលើ ដែលភាគច្រើនមានវៀតណាម និងខ្មែរឥស្លាមជាអ្នកដាក់។ ការប្រព្រឹត្តបទល្មើសនេសាទដាក់សម្រាស់ទាំងនេះទៅបាននោះត្រូវបានគេដឹងថា មុននឹងដាក់គេរត់ការទាក់ទងជាមួយមន្ត្រី ជំនាញជលផលនៅតាមស្រុករួចរាល់អស់ហើយ ទើបអាចដាក់សម្រាស់បានច្រើនកន្លែងស្អេកស្កះធំៗបែបនេះ ទៅបាន។
ចំណុចដែលមានសម្រាស់ច្រើនជាប់គ្នារដឹកគឺមាននៅកន្លន្លែងទឹកជ្រៅ ដូចជាខាងលិចកោះគ ចុងកោះគ រហូតដល់ក្បាលកោះខ្សាច់ទន្លាចុងកោះ និងនៅចុងកោះថ្មីក្នុងទឹកដីស្រុកស្អាង មានសម្រាស់មិនក្រោម១០០កន្លែងទេ។ ចំណែកក្នុងទឹកដីស្រុកកោះធំវិញក៏មានសម្រាស់ច្រើនមិនតិចជាងស្រុកស្អាងដែរគឺ នៅកន្លែងមានទឹកជ្រៅ មានសម្រាស់ជាប់គ្នាមិនដាច់បន្តរហូតដល់ព្រំដែនជ្រៃធំ។ តាមប្រភពឲ្យដឹងថា គេដាក់សម្រាស់ ដោយប្រើនុយ ឬចំណី ដែលទាក់ទាញត្រីមកស៊ី ទើគេកៀរយកត្រីទាំងតូច ធំ គ្រប់ប្រភេទ។
ហើយមកដល់ពេលនេះ សកម្មភាពកៀសម្រាស់ចាប់ត្រីបានចាប់ផ្ដើមហើយ។ បន្ទាប់ពីកៀរយកត្រីក៏ដាក់ទៅវិញអត់មានជំនាញ និងអាជ្ញាធរហាមឃាត់ទេ ពូជត្រីក្នុងទន្លេអាចនឹងវិនាសហិនហោចមិនខាន ស្របពេលដែលនៅតាមក្នុងបឹងអតីត ឡូត៍នេសាទ កើតមានបទល្មើសនេសាទខុសច្បាប់ជាច្រើន គ្មានអ្នកបង្ក្រាបដែរនោះ។ ទាក់ទងនឹងបទល្មើសនេសាទនេះ អ្នកយកព័ត៌មានបានទំនាក់ទំនងតាមរយៈទូរសព្ទ័ និងសារអេឡិចត្រូនិកទៅលោក វិត ធារិទ្ធ នាយខណ្ឌរដ្ឋបាលជលផលកណ្ដាល ដើម្បីសុំការបំភ្លឺពន្យល់ ប៉ុន្តែលោកមិនឆ្លើយតបទេ។
បើទោះជាបែបណាក្ដី ប្រជាពលរដ្ឋសំណូមពរដល់មន្ត្រីជំនាញជលផល និងអាជ្ញាធរមានវិធានការទប់ស្កាត់ ព្រមទាំងបង្ក្រាបបទល្មើសនេសាទគ្រប់ប្រភេទបន្ទាន់ផង មុននឹងធនធានមច្ឆជាតិផុតពូជ ដោយសារការប្រើឧបករណ៍នេសាទខុសច្បាប់៕
ចែករំលែកព័តមាននេះ