រាជធានីភ្នំពេញ ៖ នាងកម្មការិនីរោងចក្រកាត់ដេរម្នាក់បានទៅកាន់ប៉ុស្ដិ៍នគរបាលចោមចៅសុំឲ្យជួយពន្លឿនការដោះស្រាយជូននាងឲ្យបានឆាប់ ដោយនាងបានអះអាងថា ត្រូវបានប្ដីក្បត់ចិត្តចុះចោលទៅមានស្រីថ្មី
រាជធានីភ្នំពេញ ៖ នាងកម្មការិនីរោងចក្រកាត់ដេរម្នាក់បានទៅកាន់ប៉ុស្ដិ៍នគរបាលចោមចៅសុំឲ្យជួយពន្លឿនការដោះស្រាយជូននាងឲ្យបានឆាប់ ដោយនាងបានអះអាងថា ត្រូវបានប្ដីក្បត់ចិត្តចុះចោលទៅមានស្រីថ្មី ហើយបានប្រើហិង្សាវាយធ្វើបាបបង្ខំឲ្យនាងផ្ដិតមេដៃលែងលះគ្នារាល់ថ្ងៃថែមទៀត ដើម្បីបានទៅរៀបការជាមួយស្រីថ្មីនោះ ។ ប៉ុន្តែនាងមិនព្រមលែងហើយអ្វីដែលនាងទទួលរងការឈឺចាប់លើសលប់ បំផុតនោះគឺខឹងនាងមិនព្រមលែង ស្រាប់តែប្ដីបានដឹកស្រីស្នេហ៍របស់ខ្លួនឲ្យទៅរករឿងវាយធ្វើបាបនាងដល់ផ្ទះទៀតផង ។
ប៉ុន្តែក្រោយពេលនាងដាក់ពាក្យបណ្ដឹងរួចរាល់នគរបាលក៏ចាត់ការឲ្យដែរដោយបានធ្វើលិខិតអញ្ជើញ បុរសជាប្ដីរបស់នាងរួមជាមួយស្រីស្នេហ៍របស់គេឲ្យចូលខ្លួនទៅធ្វើការដោះស្រាយគ្នាដែរ ប៉ុន្តែពួកគេមិនចូលខ្លួនទាល់តែសោះទើបពេលនៅវេលាព្រឹកថ្ងៃទី៦ មីនា នាងបានបន្តទៅកាន់ប៉ុស្ដិ៍នគរបាលសុំឲ្យជួយពន្លឿនការដោះ ស្រាយជូននាងឲ្យបានឆាប់ ។ ដោយស្ត្រីដែលប្តីធ្វើហិង្សាឱ្យផ្តិតមេដៃលែងលះរូបនោះឈ្មោះ ងឹម សុខគា អាយុ២៨ឆ្នាំ ជាកម្មការិនីរោងចក្រកាត់ដេរ មានស្រុកកំណើតនៅ ក្នុងភូមិលាងស្រាយ ឃុំតាភេម ស្រុកត្រាំកក់ ខេត្តតាកែវ និងស្នាក់នៅក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ និងបុរសជាប្ដីឈ្មោះ ម៉ង់ គា អាយុ២៨ឆ្នាំ ជាអ្នករត់ម៉ូតូឌុបស្នាក់នៅជាមួយគ្នា ។
ស្ត្រីដែលប្តីប្រើហិង្សាសុំលែងលះបាននិយាយថា នាងបានរៀបការជាមួយបុរសជាប្ដីនោះច្រើនឆ្នាំមកហើយ និងបានកូនប្រុសម្នាក់ហើយនាងធ្វើជាកម្មការិនីរោងចក្រកាត់ដេរ ចំណែកប្ដីជាអ្នករត់ម៉ូតូឌុប ហើយប៉ុន្មានខែចុងក្រោយនេះលោកប្ដីបានចុះចោលរូបនាង និងកូនទៅមានស្រីថ្មីទៀតដោយគ្មានអាល័យ ។ មិនតែប៉ុណ្ណោះចាប់តាំងតែពីពេលមានស្រីថ្មីមកលោកប្ដីតែងតែរករឿងប្រើហិង្សា និងបង្ខំឲ្យនាងផ្ដិតមេដៃលែងលះគ្នាដើម្បីបានទៅរៀបការជាមួយស្រីថ្មីនោះពេញមុខពេញមាត់ថែមទៀត ប៉ុន្តែនាងមិនព្រមឡើយ ទើបប្តីដឹកស្រីថ្មីឲ្យទៅរករឿងវាយនាងដល់បន្ទប់ផ្ទះជួលតែម្ដង ។
ប្រភពដដែលបានបន្តថា ដោយសារតែបែបនេះទើបនាងអត់ទ្រាំលែងបានហើយក៏បានទៅដាក់ពាក្យ បណ្ដឹងសុំឲ្យនគរបាលប៉ុស្ដិ៍ចោមចៅជួយអន្តរាគមន៏ ព្រោះនាងបារម្ភពីសុវត្ថិភាពផ្ទាល់ខ្លួនហើយក៏ចងនិយាយគ្នាឲ្យបានដឹងច្បាស់ផងដែរ ។ ប៉ុន្តែក្រោយពេលទទួលពាក្យបណ្ដឹងនាងហើយនគរបាលបានធ្វើលិខិតអញ្ជើញដើម្បីឲ្យប្ដី និងស្រីស្នេហ៏ដែលប្រើហិង្សាលើរូបនាងនោះចូលខ្លួនដោះស្រាយគ្នាបែរជាប្តីមិនហ៊ានចូលខ្លួនទៅឡើយ ហើយចេះតែទៅរករឿងនាងជាបន្តបន្ទាប់គួរឲ្យខ្លាចខ្លាំងណាស់ទើបពេលនេះនាងធ្វើដំណើរទៅកាន់ប៉ុស្ដិ៍នគរបាលសុំឲ្យពន្លឿនការដោះស្រាយថែមទៀត ៕
ចែករំលែកព័តមាននេះ