ភ្នំពេញ៖ ក្រសួងប្រៃសណីយ៍ និងទូរគមនាគមន៍ បានប្រកាសដាក់ឱ្យដំណើរការកម្មវិធ្មីថ្មីមួយឈ្មោះថា MPTC Speed Test ដើម្បីវាស់ស្ទង់គុណភាពសេវាទូរសព្ទ និងល្បឿនអ៊ីនធឺណែត។
តាមសេចក្តីប្រកាស កម្មវិធី MPTC Speed Test នេះ មានមុខងារចម្បងសម្រាប់វាស់ស្ទង់កម្រិតសេវាទូរសព្ទ និងដំណើរការអ៊ីនធឺណិត នៅគ្រប់ទីកន្លែង និងគ្រប់ពេលវេលា។ លើសពីនេះទៀត ក្នុងករណី ដែលការវាស់ស្ទង់នេះ បានបង្ហាញលទ្ធផលថា គុណភាបសេវាទូរសព្ទ និងអ៊ីនធឺណេត មានភាពមិនប្រក្រតី ឬស្ថិតនៅកម្រិតមួយមិនអាចប្រើប្រាស់បាន អ្នកប្រើប្រាស់អាចរាយការណ៍មកនិយ័តករទូរគមនាគមន៍កម្ពុជា តាមរយៈទូរសព្ទ Hotline 6789 ឬផ្ញើសារមកកាន់អ៊ីម៉ែល qos@trc.gov.kh ដើម្បីប្តឹងតវ៉ា និងស្វែងរកដំណោះស្រាយ។
ក្រសួងប្រៃសណីយ៍ និងទូរគមនាគមន៍ បានប្រកាសអំពាវនាវជាថ្មីម្តងទៀត ដល់សាធារណជនទាំងអស់ ចូលរួមទាញយក ( Download ) កម្មវិធីនេះ មកប្រើប្រាស់ដោយឥតគិតថ្លៃ ចាប់ពីពេលនេះតទៅ ដោយគ្រាន់តែវាយពាក្យថា «MPTC Speed Test» លើ App Store និង Play Store ឬស្កេន QR Code ខាងក្រោម ជាការស្រេច។
សូមរម្លឹកថា ក្រសួងប្រៃសណីយ និងទូរគមនាគមន៍ បានកំណត់ឱសានវាទឱ្យក្រុមហ៊ុនផ្តល់សេវាទូរសព្ទ និងអ៊ិនធឺណេត ធ្វើឱ្យប្រសើរឡើងនូវសេវារបស់ខ្លួន ត្រឹមខែតុលានេះ ខណៈដែលប៉ុន្មានខែចុងក្រោយនេះ សេវាទូរសព្ទគ្រប់ប្រភេទ រួមទាំងសេវាអ៊ិនថឺណេតខ្សោយ ដើរយឺត ហើយបើនៅផ្ទះល្វែង និងបុរីនានា គឺទូរសព្ទគ្រប់ប្រព័ន្ធ មិនមានសេវាតែម្តង។
យ៉ាងណាក៏ដោយ មកដល់ថ្ងៃទី៣០កញ្ញានេះ សេវាទូរសព្ទគ្រប់ប្រព័ន្ធ នៅមិនទាន់បានប្រសើរនៅឡើយទេ៕
ចែករំលែកព័តមាននេះ