ខេត្តបន្ទាយមានជ័យ ៖ ស្ត្រីស្រស់ស្អាតជាជនជាតិចិនម្នាក់មិនព្រមទៅណា សុខចិត្តដើរយំទៅមកនៅមាត់ច្រកទ្វារ ហើយតវ៉ាសុំឲ្យសមត្ថកិច្ចជំនាញពាក់ព័ន្ធជួយស្រាវជ្រាវរក
ខេត្តបន្ទាយមានជ័យ ៖ ស្ត្រីជាជនជាតិចិនម្នាក់ដើរយំនៅច្រកទ្វារអន្តរជាតិប៉ោយប៉ែត ក្រោយបាត់ទូរស័ព្ទដៃមួយគ្រឿង ហើយតវ៉ាសុំឲ្យសមត្ថកិច្ចជំនាញពាក់ព័ន្ធជួយស្រាវជ្រាវរកជនសង្ស័យរហូតម៉ោងជិត3 ទើបព្រមបន្តដំណើរទៅខេត្តសៀមរាបទាំងខឹងសម្បា។
ប្រភពបន្តថា ស្ត្រីជនជាតិចិននោះឈ្មោះ Ly Ya អាយុ33ឆ្នាំ បានឆ្លងព្រំដែនពីថៃមកកម្ពុជាតាំងពីម៉ោង8ព្រឹក ថ្ងៃទី6 ខែមីនា ឆ្នាំ2017 ក្នុងគោលដៅទៅកម្សាន្តនៅខេត្តសៀមរាប។ ភ្ញៀវចិនរូបនេះអះអាងថា ខ្លួនបានបាត់ទូរស័ព្ទម៉ាក iPhone 6s ពណ៌ផ្កាឈូក 01គ្រឿង ដោយអះអាងទៀតថា បានបាត់នៅច្រកទ្វារអន្តរជាតិប៉ោយប៉ែតខ្លងលឹក។
សមត្ថកិច្ច និងអ្នកនាំភ្ញៀវនិយាយថា ភ្ញៀវចិនខាងលើបាត់ទូរស័ព្ទតាំងពីម៉ោង8ព្រឹក ប៉ុន្តែមិនព្រមទៅណា សុខចិត្តដើរយំទៅមកនៅមាត់ច្រកទ្វារ បន្ទាប់មកក៏ដាក់ពាក្យបណ្តឹងឲ្យប៉ូលិសក្រសួងទេសចរណ៍ ជួយស្រាវជ្រាវរកជនសង្ស័យ។
នៅរសៀលថ្ងៃដដែលស្ត្រីជនជាតិចិនបានឲ្យសមត្ថកិច្ចហៅជនសង្ស័យជាបុរសម្នាក់ដែលជូននាងឆ្លងព្រំដែនពីថៃមកសួរនាំ ប៉ុន្តែបុរសនោះបានបដិសេធន៍ថា មិនបានលួច ឬយកទូរស័ព្ទរបស់ភ្ញៀវឡើយ។ មុនការបន្តដំណើរទៅខេត្តសៀមរាប នាងទាមទារឯកសារពាក្យបណ្តឹង1ច្បាប់ ហើយចង់ឆ្លងទៅដីថៃឲ្យគេឆែកកាមេរ៉ា លុះសមត្ថកិច្ចប្រាប់ថា បើចង់ឆ្លងទៅវិញត្រូវបំពេញឯកសារ (វីសារ) ទៅពីកម្ពុជា ស្រាប់តែនាងសុខចិត្តបន្តដំណើរទៅសៀមរាបវិញតែម្តង។
ប៉ូលិសទេចរណ៍ក្រសួងប្រចាំនៅមាត់ច្រកទ្វារអន្តរជាតិប៉ោយប៉ែតនិយាយថា ការពិតទូរស័ព្ទរបស់ភ្ញៀវចិននោះមិនដឹងថា បាត់នៅដីថៃ ឬខាងខ្មែរនោះទេ ខណៈនាងថា បាត់ពេលកំពុងបំពេញហ្វមនៅទីតាំងចត្តាឡីស័ក ឯមន្ត្រីចត្តាឡីស័កប្រាប់ថា មិនឃើញស្ត្រីចិននោះកាន់ទូរស័ព្ទទេ។ យ៉ាងណាក៏ប៉ូលិសក្រសួងទេសចរណ៍ អះអាងថា នឹងធ្វើការស្រាវជ្រាវរកមុខសញ្ញាជនសង្ស័យបន្ត។
គួរបញ្ជាក់ថា កន្លងទៅថ្មីៗនេះ (ចុងខែកុម្ភៈ 2017) ភ្ញៀវរុស្សី2នាក់ប្តីប្រពន្ធបានជួបករណីចាញ់បោកអ្នកនាំភ្ញៀវជជុះម្នាក់ បោកយកអស់ប្រាក់60ដុល្លារ ដោយសន្យាថា យកប្រាក់នោះទៅរត់ការធ្វើទិដ្ឋាការខ្មែរខាងដីថៃឲ្យ ទីបំផុតខណៈភ្ញៀវទាំ2ចូលដល់កម្ពុជា បែរជាលិខិតឆ្លងដែនមិនទាន់ធ្វើទិដ្ឋាការ ត្រូវចំណាយប្រាក់ម្តងទៀត មុនបន្តដំណើរទៅខេត្តសៀមរាប។ ជនសង្ស័យដែលឆបោកប្រាក់60ដុល្លារខាងលើ ត្រូវសមត្ថកិច្ចថៃចាប់ខ្លួនបានក្រោយភ្ញៀវរុស្សី2នាក់ប្តីប្រពន្ធដាក់ពាក្យបណ្តឹ។ សង្ឃឹមថា ករណីថ្មីមួយទៀតនេះ សមត្ថកិច្ចកម្ពុជា-ថៃនឹងសហការគ្នាចាប់ជនសង្ស័យ ដើម្បីយកទូរស័ព្ទជូនជនរងគ្រោះវិញ ក្រោយនាងត្រឡ់ពីដើរកម្សាន្តនៅខេត្តសៀមរាប៕
ចែករំលែកព័តមាននេះ