រាជធានីភ្នំពេញ ៖ ប្ដីប្រពន្ធមួយគូជាគ្រួសារទីទ័លក្រមានមុខរបរដើរដកក្រអៅឈូកលក់រកប្រាក់ផ្គត់ផ្គង់ជីវភាពប្រចាំថ្ងៃនៅក្នុងគ្រួសារ ហើយចុងក្រោយនេះពួកគាត់បាននាំគ្នាចាកចេញពីផ្ទះទៅដកក្រអៅឈូកលក់ជាមួយគ្នា
រាជធានីភ្នំពេញ ៖ ប្ដីប្រពន្ធមួយគូជាគ្រួសារទីទ័លក្រមានមុខរបរដើរដកក្រអៅឈូកលក់រកប្រាក់ផ្គត់ផ្គង់ជីវភាពប្រចាំថ្ងៃនៅក្នុងគ្រួសារ ហើយចុងក្រោយនេះពួកគាត់បាននាំគ្នាចាកចេញពីផ្ទះទៅដកក្រអៅឈូកលក់ជាមួយគ្នា នៅតាមប្រឡាយមួយកន្លែងដែលមានឈូកដុះ និងជាទីកន្លែងដែលពួកគាត់ដកជាប្រចាំផងដែរ ។ លុះពេលទៅដល់ពួកគាត់មិនបានដកនៅជិតគ្នានោះឡើយគឺបានដើរដកនៅកន្លែងផ្សេងពីគ្នា ហើយក្រោយមកបន្ទាប់ពីបាត់មិនឃើញ និងមិនឮមាត់បុរសជាប្ដីនិយាយ ស្ត្រីជាប្រពន្ធមានការងឿងឆ្ងល់ក៏បានស្រែកហៅប៉ុន្តែមិនបានឮប្ដីឆ្លើយទាល់តែសោះ ភ្លាមៗនោះគាត់ក៏ឈប់ដកក្រអៅឈូកតទៅទៀត ហើយបានឡើងគោកតាមទៅរកនៅកន្លែងដែលប្ដីគាត់ដកក្រអៅឈូកនោះតែមិនឃើញទៀត ទើបគាត់មានការព្រួយបារម្ភកាន់តែខ្លាំងព្រោះកន្លងមក ប្ដីមិនដែលទៅណាមកណាមិនប្រាប់នោះឡើយ ខណៈនោះគាត់បានតាមរករយៈពេលប្រមាណជាង១ម៉ោងក្រោយមកទើបបានប្រទះឃើញប្ដីស្លាប់នៅក្នុងទឹកប្រឡាយបាត់ទៅហើយ ។
ហេតុការណ៏នោះបានកើតឡើងកាលពីវេលាម៉ោង១២និង២០នាទីថ្ងៃត្រង់ ថ្ងៃទី៦ ខែមីនា ឆ្នាំ២០១៧ នៅក្នុងប្រឡាយទឹកស្ថិតនៅក្នុងភូមិប្រកា សង្កាត់ព្រៃស ខណ្ឌដង្កោ ។ បុរសដែលស្លាប់នោះឈ្មោះ អ៊ុំ ផល្លា អាយុ៤៧ឆ្នាំ ដោយឡែកប្រពន្ធឈ្មោះ ចាន់ ម៉ុន អាយុ៥៣ឆ្នាំ មុខរបរដើរដកក្រអៅឈូកលក់ស្នាក់នៅផ្ទះជួលម្ដុំផ្សារទួលពង្រ ស្ថិតនៅក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ ។
ស្ត្រីជាប្រពន្ធបានឲ្យនគរបាលដឹងថា នៅមុនពេលកើតហេតុគាត់ និងប្ដីបាននាំគ្នាចាកចេញពីផ្ទះទៅកន្លែងកើតហេតុខាងលើដើម្បីដកក្រអៅឈូកលក់ ព្រោះនេះគឺជាមុខរបរប្រចាំថ្ងៃរបស់ពួកគាត់ដើម្បីរកប្រាក់ផ្គត់ផ្គងជីវភាពគ្រួសារហើយកន្លងមកជួនកាលដកនៅក្បែរគ្នា និងជួនកាលឃ្លាតឆ្ងាយពីគ្នាតែបន្តិចប៉ុណ្ណោះមិនសូវហ៊ានស្ថិតនៅឆ្ងាយពីគ្នាទេ ព្រោះពួកគាត់សុទ្ធតែចាស់ៗគ្រប់គ្នាទៅហើយដែរខ្លាចក្រែងមានបញ្ហាអ្វីកើតឡើងមិនអាចជួយគ្នាទៅវិញទៅមកបាន ។ ប៉ុន្តែដោយឡែកព្រឹកថ្ងៃកើតហេតុក្រោយពេលទៅដល់ទីតាំងដកក្រអៅឈូកនោះពួកគាត់បានដើរដកបែកគ្នាដោយគាត់ដកនៅកន្លែងផ្សេង ចំណែកប្ដីដកនៅកន្លែងផ្សេងខណៈនោះបានខំប្រឹងធ្វើការរៀងៗខ្លួនរហូតដល់វេលាម៉ោងជាង១០ព្រឹកថ្ងៃដដែលនោះ ទើបនឹកឃើញប្ដីព្រោះខុសប្លែកពីរាល់ថ្ងៃដោយបាត់មិនឮមាត់ប្ដីនិយាយ គាត់ក៏បានស្រែកហៅប៉ុន្តែមិនបានឮប្ដីឆ្លើយនោះឡើយទើបគាត់ឈប់ដក និងបានឡើងគោកតាមទៅរកប្ដីនៅកន្លែងដែលប្ដីគាត់ដកក្រអៅឈូកនោះតែពេលទៅដល់រកមិនឃើញសោះ ។
ខណៈនោះគាត់មានការព្រួយបារម្ភយ៉ាងខ្លាំង និងបានតាមរកប្ដីតែម្នាក់ឯងអស់រយៈពេលជិត២ម៉ោងរហូតដល់ម៉ោង១២និង២០នាទីថ្ងៃត្រង់ ទើបប្រទះឃើញប្ដីស្លាប់នៅក្នុងទឹកប្រឡាយបាត់ទៅហើយដែលបានធ្វើឲ្យគាត់មានអារម្មណ៏ក្ដុកក្ដួលយ៉ាងខ្លាំងស្ទើរសន្លប់បាត់ស្មារតីទៅហើយ ។ បន្ទាប់មកគាត់បានស្រែកប្រាប់អ្នកជិតខាងឲ្យជួយ និងបានប្ដឹងឲ្យនគរបាលប៉ុស្ដិ៍ព្រៃសទៅពិនិត្យមើល ។
បើតាមប្រភពពីនគរបាលបានឲ្យដឹងថា ក្រោយពេលទទួលបានដំណឹងនោះភ្លាមកម្លាំងបានរាយការណ៏ជូនទៅកាន់នគរបាលផ្នែកព្រហ្មទណ្ឌខណ្ឌដង្កោដើម្បីចុះធ្វើការពិនិត្យ និងកសាងឯកសារហើយតាមការពិនិត្យជាក់ស្ដែងគឺជនរងគ្រោះស្លាប់ដោយសារខ្យល់គធ្លាក់ទឹកលង់ស្លាប់បន្ទាប់មកបានប្រគល់សពឲ្យប្រពន្ធនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ