រាជធានីភ្នំពេញ ៖ កាលពីវេលាម៉ោង៩និង៣០នាទីព្រឹកថ្ងៃទី៦ ខែមីនា ឆ្នាំ២០១៧ នៅខាងមុខរដ្ឋសភាជាតិមនុស្សប្រុស -ស្រីជាង១០០នាក់ ដែលជាបណ្តាញសហជីពស្ត្រីតំណាងសហជីព និងសមាជិកដែលជាកម្មករធ្វើការនៅចម្រុះលើវិស័យការងាររួមមាន
រាជធានីភ្នំពេញ ៖ កាលពីវេលាម៉ោង៩និង៣០នាទីព្រឹកថ្ងៃទី៦ ខែមីនា ឆ្នាំ២០១៧ នៅខាងមុខរដ្ឋសភាជាតិមនុស្សប្រុស -ស្រីជាង១០០នាក់ ដែលជាបណ្តាញសហជីពស្ត្រីតំណាងសហជីព និងសមាជិកដែលជាកម្មករធ្វើការនៅចម្រុះលើវិស័យការងាររួមមាន ឧស្សាហកម្មកាត់ដេរ និងវាយនភ័ណ្ឌ សណ្ឋាគារ និងសេវាកម្មទេសចរណ៍ កាស៊ីណូ វិស័យសំណង់ សេវាសន្តិសុខ ផ្នែកស្រាបៀរ ម៉ាស្សា និងកម្មករធ្វើការតាមផ្ទះ បានលើកគ្នាមកក្នុងគោលបំណងស្នើសុំការគាំទ្រ និងជម្រុញរាជរដ្ឋាភិបាលផ្តល់សច្ចាប័នលើអនុសញ្ញាអង្គការអន្តរជាតិការងារ (ILO) លេខ១៨៣ស្តីពី «ការការពារមាតុភាព» និងលេខ១៨៩ស្តីពី «ការងារសមរម្យសម្រាប់អ្នកធ្វើការងារផ្ទះ» នៅក្នុងពេលឆាប់ៗនេះ ។
ដោយយោងទៅតាមខ្លឹមសារញត្តិបានរៀបរាប់ថា យើងខ្ញុំទាំងអស់គ្នាជាបណ្តាញសហជីពស្ត្រី តំណាងសហជីព និង សមាជិកដែលជាកម្មករធ្វើការនៅចម្រុះវិស័យការងាររួមមានឧស្សាហកម្មកាត់ដេរ និងវាយនភ័ណ្ឌ សណ្ឋាគារ និងសេវាទេសចរណ៍ កាស៊ីណូ វិស័យសំណង់ សេវាសន្តិសុខ ផ្នែកស្រាបៀរ ម៉ាស្សា និងកម្មករធ្វើការងារផ្ទះសូមគោរពជូនសម្តេចអគ្គមហាពញាចក្រី ហេង សំរិន ប្រធានរដ្ឋសភានីតិកាលទី៥ ៖
កម្មវត្ថុ ៖ ស្នើសុំការគាំទ្រ និងជម្រុញរាជរដ្ឋាភិបាលផ្តល់សច្ចាប័នលើអនុសញ្ញាអង្គការអន្តរជាតិខាងការងារ (ILO) លេខ ១៨៣ស្តីពី «ការការពារមាតុភាព» និងលេខ១៨៩ស្តីពី«ការងារសមរម្យសម្រាប់អ្នកធ្វើការងារផ្ទះ»នៅក្នុងពេលឆាប់ៗនេះ ។ សេចក្តីដូចជម្រាបជូននៅក្នុងកម្មវត្ថុខាងលើយើងខ្ញុំមានកិត្តយសសូមជម្រាបជូនសម្តេចមេត្តាជ្រាបថា ជារៀងរាល់ឆ្នាំ បងប្អូនកម្មករនិយោជិតនៅចម្រុះវិស័យតែងតែតាមទារដល់រាជរដ្ឋាភិបាល ផ្តល់សច្ចាប័នលើអនុសញ្ញា ILO លេខ១៨៣ និងលេខ១៨៩ ពីលើការទាមទារដទៃទៀតក្នុងការជម្រុញឱ្យមានការធានាដល់សុខភាព មាតា និងទារក សម្រាប់ស្ត្រីនៅក្នុងវិស័យការងារ និងលើកម្ពស់កម្មករធ្វើការងារផ្ទះ ។ ព្រោះពួកគាត់ក៏ជាមនុស្ស និងដូចជាកម្មករធ្វើការងារនៅក្នុងប្រពន្ធផ្លូវការដែរ គឺគួរតែត្រូវបានឱ្យតម្លៃ និងមានសិទ្ធស្មើរភាពគ្នាក្នុងការចូលរួមអភិវឌ្ឍសេដ្ឋកិច្ចគ្រួសារ និងសង្គមដូចៗគ្នា ស្របតាមគោលការណ៍ជាមូលដ្ឋានរបស់សេចក្តីថ្លែងការណ៍ជាសកលស្តីពីសិទ្ធមនុស្ស និងអនុសញ្ញាអន្តរជាតិខាងការងារ ។ ខ្លឹមសារញត្តិបានបន្តទៀតថា សម្តេចជាទីគោរពទាក់ទងនឹងការផ្តល់សច្ចាប័នលើអនុសញ្ញា ILO លេខ១៨៣ មិនត្រឹមតែធ្វើឱ្យប្រសើរឡើងដល់ស្ថានភាពស្ត្រីនៅក្នុងវិស័យការងារប៉ុណ្ណោះទេ ប៉ុន្តែថែមទាំងជួយផ្តល់ការការពារពិសេសដល់ការបញ្ឈប់ស្ត្រីពីការងារពេលមាមផ្ទៃពោះ និងក្រោយពេលសម្រាលកូន ជួយឱ្យស្ត្រីមានសុខភាពល្អសម្រាប់ស្ត្រី និងបុត្ររបស់ខ្លួនដែលលជាអនាគតរបស់ប្រទេសជាតិយើង និងពេលស្ត្រីចូលបម្រើការការងារវិញធ្វើឱ្យស្ត្រីមានសុខភាពមាំទាំធ្វើការងារជូនសហគ្រាសគ្រឹះស្ថានប្រកបដោយផលិតភាពផងដែរ ។ ចំពោះការផ្តល់សច្ចាប័នលើអនុសញ្ញា ILO លេខ១៨៩ គឺមានន័យថា ជាការបោះជំហានចាក់ស្តែងក្នុងការលើកកម្ពស់ស្ថានភាពស្ត្រីឱ្យទទួលបានភាពស្មើរគ្នា ព្រោះកម្មករធ្វើការងារផ្ទះមួយភាគធំគឺជាស្ត្រីដែលធ្វើការផ្ទះជំនួសស្ត្រីដទៃទៀតដែលមានសម្ថភាពធ្វើការងារខាងក្រៅផ្ទះ សម្រាប់បំពេញតម្រូវការការរីកចំរើនផ្នែកសេដ្ឋកិច្ចគ្រួសារ និងការអភិវឌ្ឍសង្គមដែលការជាប់ទាក់ទងគ្នានេះ គឺកម្មករធ្វើការងារផ្ទះគួរតែទទួលបានការឱ្យតម្លៃ និងសិទ្ធស្មើរគ្នាដូចកម្មករដទៃទៀតនៅក្នុងវិស័យការងារផ្លូវការ ។
សេចក្តីដូចបានជម្រាបជូនខាងលើ និងក៏ដូចដែលសម្តេចបានជ្រាបអំពីស្ថានភាពដ៏ប្រឈមរបស់ស្ត្រីនៅក្នុងវិស័យការងារកន្លងមករួចហើយ ដូច្នេះហើយសូមសម្តេចមេត្តាជួយគាំទ្រការស្នើរសុំនេះ និងជួយជម្រុញរាជរដ្ឋាភិបាលផ្តល់សច្ចាប័នលើអនុសញ្ញាទាំងពីរនេះនៅក្នុងពេលឆាប់ៗខាងមុខនេះដោយក្តីអនុគ្រោះ ។ ក្នុងការដាក់ញត្តិសុំការអន្តរាគមន៍នេះដែររដ្ឋសភាជាតិក៏បានអនុញ្ញាតិឱ្យស្ត្រីដែលជាតំណាងចំនួន៥នាក់ ចូលទៅផងដែរទើបធ្វើការរំសាយ និងបន្តយកញាត្តិចំនួនមួយច្បាប់ទៀតទៅដាក់ជូនខុទ្ទការល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាជាបន្តទៅទៀតផងដែរ ៕
ចែករំលែកព័តមាននេះ