ផ្លូវល្បឿនលឿន ភ្នំពេញ-ព្រះសីហនុ មានច្រក-ចេញ ៨កន្លែង តើនៅឯណាខ្លះ?
- ភ្នំពេញ
ភ្នំពេញ៖ ផ្លូវល្បឿនលឿន ភ្នំពេញ-ក្រុងព្រះសីហនុ ដាក់ឱ្យប្រើប្រាស់សាកល្បងដោយឥតគិតថ្លៃ រយៈពេល ១ខែ ពីថ្ងៃទី១ ដល់ថ្ងៃទី៣១ ខែតុលា ឆ្នាំ២០២២…
ភ្នំពេញ៖ ផ្លូវល្បឿនលឿន ភ្នំពេញ-ក្រុងព្រះសីហនុ ដាក់ឱ្យប្រើប្រាស់សាកល្បងដោយឥតគិតថ្លៃ រយៈពេល ១ខែ ពីថ្ងៃទី១ ដល់ថ្ងៃទី៣១ ខែតុលា ឆ្នាំ២០២២…
ភ្នំពេញ៖ ផ្លូវល្បឿនលឿន ភ្នំពេញ-ក្រុងព្រះសីហនុ ដាក់ឱ្យប្រើប្រាស់សាកល្បងដោយឥតគិតថ្លៃ រយៈពេល ១ខែ ពីថ្ងៃទី១ ដល់ថ្ងៃទី៣១ ខែតុលា ឆ្នាំ២០២២ នឹងបើកឱ្យយានយន្តចាប់ផ្តើមចរាចរណ៍ចេញ-ចូល នៅថ្ងៃទី១ ខែតុលា ឆ្នាំ២០២២ ចាប់ពីម៉ោង ៧ព្រឹកតទៅ នៅគ្រប់ទីតាំងច្រកចេញ-ចូលទាំងអស់។ ផ្លូវល្បឿនលឿននេះ មានច្រកចេញចូល ចំនួន ៨កន្លែង។
សេចក្តីប្រកាស លើកឡើងថា ច្រកចេញ-ចូលផ្លូវល្បឿនលឿន ទាំង ៨កន្លែង រួមមាន៖ ច្រកទី១ ភ្នំពេញ ( ផ្លូវកប់ស្រូវ ) គីឡូម៉ែត្រ៣។ ច្រកទី២ កំពង់ស្ពឺកើត គីឡូម៉ែត្រ ២៦។ ច្រកទី៣ កំពង់ស្ពឺលិច គីឡូម៉ែត្រ៤៣។ ច្រកទី៤ ត្រែងត្រយឹង គីឡូម៉ែត្រ ៧៦។ ច្រកទី៥ កំពង់សិលា គីឡូម៉ែត្រ ១១៤។ ច្រកទី៦ ស្រែអំបិល គីឡូម៉ែត្រ ១៣៥។ ច្រកទី៧ ស្ទឹងហាវ គីឡូម៉ែត្រ ១៧២ និងច្រកទី៨ ព្រះសីហនុ គីឡូម៉ែត្រ ១៨២។
ក្នុងសេចក្តីប្រកាស នៅថ្ងៃទី២៩ ខែកញ្ញានេះ ក្រសួងសាធារណការ និងដឹកជញ្ជូន បានក្រើនរម្លឹកដល់សាធារណជនជាថ្មីម្តងទៀត សូមមេត្តា ចូលរួមគោរពច្បាប់ ស្តីពី ចរាចរណ៍ផ្លូវគោក បទបញ្ជា និងសេចក្តីណែនាំនានាឱ្យបានខ្ជាប់ខ្ជួន ដើម្បីថែរក្សាសណ្តាប់ធ្នាប់ សុវត្ថិភាព និងបង្ការគ្រោះថ្នាក់ជាយថាហេតុ ចំពោះការប្រើប្រាស់ផ្លូវល្បឿនលឿននេះ ដោយស្មារតីទទួលខុសត្រូវខ្ពស់។
សូមរម្លឹកថា ផ្លូវល្បឿនលឿនភ្នំពេញ-ព្រះសីហនុ វិនិយោគដោយក្រុមហ៊ុនចិន មានប្រវែង ១៨៧.០៥គីឡូម៉ែត្រ បានបើកការដ្ឋានសាងសង់ កាលពីថ្ងៃទី២២ ខែមីនា ឆ្នាំ២០១៩។ ក្រោយពីបើកឱ្យបើកបរសាកល្បង ១ខែពេញក្នុងខែតុលារួចហើយ ចាប់ពីថ្ងៃទី១ ខែវិច្ឆិកាតទៅ ក្រុមហ៊ុន នឹងយកថ្លៃធ្វើដំណើរឆ្លងកាត់ផ្លូវល្បឿនលឿននេះ ចាប់ពី ១២ដុល្លារ ដល់ ៦០ដុល្លារ តាមប្រភេទយានយន្ត។
ផ្លូវល្បឿនលឿនភ្នំពេញ-ព្រះសីហនុ ត្រូវបានក្រសួង កំណត់ល្បឿនបើកបរ ដូចខាងក្រោម៖ ល្បឿន ៦០-១២០ គ.ម ក្នុង ១ម៉ោង សម្រាប់រថយន្តគ្រួសារ ឬរថយន្តធុនស្រាល។ ល្បឿន ៦០-១០០គ.ម ក្នុង ១ម៉ោង សម្រាប់រថយន្តធុនធ្ងន់ មិនមានសណ្តោងសឺម៉ីរ៉ឺម៉ក ឬម៉ូតូ ដែលមានកម្លាំង 500cc/ 27kW ឡើងទៅ។ ល្បឿន ៦០-៨០គ.ម ក្នុង ១ម៉ោង សម្រាប់រថយន្តសណ្តោងសឺម៉ីរ៉ឺម៉ក ឬសណ្តោងយានដំណើរកំសាន្ត។
ក្រសួងសាធារណការ និងដឹកជញ្ជូន ក៏បានបញ្ជាក់ថា ករណីមានផ្លាកសញ្ញាកំណត់ល្បឿនអតិបរមា អ្នកបើកបរត្រូវអនុវត្តតាមជាកំហិត ជំនួសឱ្យគោលការណ៍ខាងលើ។ ករណីផ្លូវកោង ច្រកចូលចំហៀងទៅផ្លូវល្បឿនលឿន អ្នកបើកបរត្រូវបានកំណត់ឱ្យបើកបរត្រឹមតែ ៤០គ.ម ក្នុង ១ម៉ោងប៉ុណ្ណោះ រួចទើបត្រូវបង្កើនល្បឿនដល់ ៦០គ.ម ក្នុង ១ម៉ោង។ ដោយឡែក កន្លែងដែលចាំបាច់ ត្រូវបន្ថយល្បឿន ក៏ត្រូវបានដាក់នូវគំនូសរំញ័រ (Rumble Stripes) ដើម្បីដាស់តឿនដល់អ្នកបើកបរផងដែរ៕
ចែករំលែកព័តមាននេះ