ខេត្ដស្វាយរៀង ៖ ឈ្មួញវៀតណាមបានចូលមកប្រមូលទិញស្រូវដាក់ទូកដឹកទៅប្រទេសគេតាមប្រឡាយជាប់ច្រកទ្វារព្រំដែនអន្តរជាតិព្រៃវល្លិក្នុងមួយថ្ងៃៗរាប់សិបតោន ក៏ប៉ុន្តែក្រុមប្រជាកសិករនៅតែត្អូញត្អែរថាតម្លៃស្រូវថោក គឺឈ្មួញទិញពីប្រជាកសិករផ្ទាល់ក្នុង១គីឡូក្រាមតម្លៃ៧៥០រៀលប៉ុណ្ណោះ រីឯឈ្មួញដឹកមកដល់ព្រំដែនលក់ឲ្យឈ្មួញវៀតណាម១គីឡូក្រាមតម្លៃ៨៧០រៀល គឺគេយកចំណេញលើខ្នងប្រជាកសិករជាអ្នកផលិតស្រូវច្រើនគរគោក ។
ទាក់ទិនករណីប្រជាកសិករត្អូញត្អែរនេះដែរ អាជីវករជាឈ្មួញកណ្តាលម្នាក់បានប្រាប់ឲ្យដឹងថា គាត់ជាឈ្មួញកណ្តាលទី២ ដែលជាអ្នកប្រមូលទិញស្រូវនៅភូមិព្រៃវល្លិ ឃុំថ្មី ស្រុកកំពង់រោទ៍ ដើម្បីលក់បន្តឲ្យទៅឈ្មួញវៀតណាម ។ ប្រភពដដែលបន្តទៀតថា មានឈ្មួញមួយក្រុមជាអ្នកដើរប្រមូលទិញស្រូវពីប្រជាកសិករផ្ទាល់ គឺស្រូវអីុអែរ៥៤ ឬហៅថា អីុអែរណាំខុងបូង ទិញពីកសិករក្នុង១គីឡូក្រាមតម្លៃ៧៥០រៀល ហើយបានដឹកតាមរថយន្តយកមកលក់ឲ្យពួកគាត់ជាឈ្មួញកណ្តាលទី២ទិញចូលក្នុងមួយគីឡូក្រាមតម្លៃ៨៥០រៀល រួចលក់ចេញឲ្យទៅឈ្មួញវៀតណាមបន្ត ក្នុង១គីឡូក្រាមតម្លៃ៨៧០រៀល និងត្រូវចំណាយឲ្យកម្មករលីសែងដាក់ទូកក្នុងមួយតោនតម្លៃ៧.០០០រៀលទៀត ។
ប្រភពដដែលបន្តទៀតថា ឈ្មួញវៀតណាមឡើងមកទិញចាប់តាំងពីថ្ងៃទី១៤ កុម្ភៈ រីឯអាជីវករដែលដើរប្រមូលទិញស្រូវពីខេត្តបន្ទាយមានជ័យ បាត់ដំបង ពោធិ៍សាត់ កំពង់ធំ និងខេត្តកំពង់ចាម បានយកមកលក់នៅខេត្តស្វាយរៀង ហើយក្នុងខេត្តស្វាយរៀង មានច្រកព្រំដែនចំនួន៣ដែលវៀតណាមចូលមកទិញស្រូវ គឺច្រករបៀងដូងក្នុងស្រុករមាសហែក ច្រករបៀងក្រសាំងជ្រំ ក្នុងស្រុកស្វាយជ្រំ ច្រកប្រឡាយទាហានដែលនៅជាប់ច្រកទ្វារព្រំដែនអន្តរជាតិព្រៃវល្លិ ក្នុងឃុំថ្មីស្រុកកំពង់រោទ៍ ។
ប្រភពបានបន្តថា នៅច្រកប្រឡាយទាហាននេះ គឺមានឈ្មួញកណ្តាល៥ឃ្លាំងជាអ្នកប្រមូលទិញស្រូវយកមកលក់បន្តទៅឲ្យវៀតណាម ។ ដូច្នេះមូលហេតុដែលអាជីវករទិញស្រូវផ្ទាល់ពីប្រជាកសិករឲ្យតម្លៃទាបមកពី៖
១-កត្តាផ្លូវលំបាក ខកខានយូរថ្ងៃស្រូវខូចគុណភាព
២-ចំណាយលើការដឹកជញ្ជូនខ្ពស់ពេក
៣-បង់ឲ្យសមត្ថកិច្ចតាមផ្លូវច្រើនកន្លែង (រថយន្តចំណុះ១៥តោនត្រូវដឹក២៥តោនបើរថយន្តធុនធំដឹកដល់៣០តោន) ត្រូវបង់ឲ្យសមត្ថកិច្ចយាមតាមដងផ្លូវក្នុងមួយកន្លែងចំណាយ២ម៉ឺនរៀល ទៅ៣ម៉ឺនរៀល និងកន្លែងជញ្ជីងគឺ៥ម៉ឺនរៀលសរុបត្រូវចំណាយបង់តាមផ្លូវអស់ប្រាក់ចំនួន៨មឺុនរៀលទៅ១សែនរៀល ។
តាមប្រភពបានបង្ហើបថា បើដឹកត្រឹមត្រូវតាមចំណុះតោនក៏នៅតែមិនអាចគេចផុតពីសមត្ថកិច្ច សុំថ្លៃបាយព ថ្លៃកាហ្វេមួយម៉ឺនពីរម៉ឺនមួយកន្លែងដដែល ដូច្នេះទើបត្រូវបង្ខំដឹកលើសទម្ងន់កំណត់ដើម្បីយកប្រាក់បង់ថ្លៃផ្លូវ ។ ចំណែកទូកវៀតណាមដែលចូលមកទិញស្រូវក៏ត្រូវបង់ប្រាក់ឲ្យខាងសមត្ថកិច្ចវៀតណាមផង និងសមត្ថកិច្ចខ្មែរផងដែរ និងបញ្ហាមួយទៀតក្រុមហ៊ុនអង្ករខាងវៀតណាមនាំចេញមិនបានទេនៅពេលនេះ ។
កត្តាទាំងអស់នេះហើយដែលនាំឲ្យឈ្មួញប្រមូលទិញស្រូវពីប្រជាកសិករផ្ទាល់មានតម្លៃថោកដោយសាតែការចំណាយលើការដឹកជញ្ជូន និងបង់តាមផ្លូវ តែអ្នកខាតបង់ពិតប្រាកដគឺប្រជាកសិករគេទិញក្នុងតម្លៃទាប ។ ក្រុមអាជីវករបានសំណូមពរដល់រាជរដ្ឋាភិបាលមេត្តា លុបបំបាត់នូវកុងត្រូលជជុះ ដើម្បីឱ្យក្រុមអាជីវករទិញស្រូវពីប្រជាកសិករផ្ទាល់មានតម្លៃខ្ពស់ដល់៨០០រៀលទៅ៨២០រៀលក្នុង១គីឡូក្រាម ៕
ចែករំលែកព័តមាននេះ