មិនយកភាស៊ីទេ ប៉ុន្តែដេញឱ្យទៅលក់កន្លែងអត់ !
ខេត្តស្វាយរៀង ៖ ក្រុមអ្នកយកភាស៊ីផ្សារ បានដើរប្រកាសមេក្រូតាមផ្សារក្នុងក្រុងស្វាយរៀង នៅវេលាម៉ោង៨ព្រឹក ថ្ងៃទី៤ មីនា ឆ្នាំ២០១៧ ថា
ខេត្តស្វាយរៀង ៖ ក្រុមអ្នកយកភាស៊ីផ្សារ បានដើរប្រកាសមេក្រូតាមផ្សារក្នុងក្រុងស្វាយរៀង នៅវេលាម៉ោង៨ព្រឹក ថ្ងៃទី៤ មីនា ឆ្នាំ២០១៧ ថា សូមឲ្យប្រជាពលរដ្ឋដែលលក់ដូរ កញ្ច្រែង កញ្ជើ ល្អី ទាំងអស់ ទៅលក់កន្លែងថ្មីដែលអាជ្ញាធរខេត្តបានរៀបចំកន្លែងឲ្យលក់ដូរនៅចំណុចទីតាំងផ្ទះរបស់លោក ស្រី ពៅ នៅខាងលិចផ្សារវាលយន្ត ភូមិវាលយន្ត សង្កាត់ស្វាយរៀង ក្រុងស្វាយរៀង គឺអាជ្ញាធរមិនយកថ្លៃភាស៊ីទេ។ អាជ្ញាធរខេត្តនឹងរៀបចំទីតាំងផ្សារសម្រាប់អ្នកលក់ដូរតាមកញ្ច្រែង កញ្ជើ ល្អីនេះ ចាប់ដំណើរការនៅថ្ងៃច័ន្ច ទី៦ មីនា២០១៧ ខាងមុខនេះតទៅ !
ទាក់ទិនករណីអ្នកយកភាស៊ីផ្សារប្រកាស់មេក្រូនេះដែរ លោកយាយ ផាង ស្រឹង អាយុ៧២ឆ្នាំ ដែលលក់បន្លែកញ្ច្រែងល្អី នៅផ្សារក្រមួន ភូមិរោងបន្លែ សង្កាត់ស្វាយរៀង បានសំណូមពរថា រូបគាត់ចាស់ហើយរស់នៅម្នាក់ឯងនៅសង្កាត់គយត្របែក រកស៊ីបេះបន្លែលក់ និងទិញបន្លែអ្នកស្រុកបន្តិចបន្តួចបន្ថែមលក់គ្រាន់ចិញ្ចឹមជីវិតប្រចាំថ្ងៃ បើឲ្យគាត់ទៅលក់នៅផ្សាររៀបចំថ្មី គាត់មិនអាចទៅបានទេ ឆ្ងាយទួលបន្លែដើរមិនដល់ទេ ទម្រាំដល់ផុតពេលលក់ ឬអាចដួលតាមផ្លូវ សុំលក់ផ្សារក្រមួននេះ មានម៉ូយគេអាណិតមកជួយទិញរាល់ថ្ងៃ ។
ស្ត្រីម្នាក់ឈ្មោះ ពេជ សាវ៉ាន់ អាយុ៥២ឆ្នាំ នៅភូមិគយត្របែក សង្កាត់គយត្របែក ដែលលក់នៅផ្សារក្រមួន បានសំណូមពរសុំឲ្យអាជ្ញាធរអនុញ្ញាតិរៀបចំកន្លែងឲ្យពួកគាត់លក់កន្លែងក្នុងផ្សារក្រមួននេះដដែល ជិតផ្ទះ ហើយបើទៅលក់នៅ កន្លែងថ្មីដាច់ម៉ូយ និងដាច់បាយកូនស្លាប់មិនខាន ដូច្នេះបើអ្នកយកភាស៊ីមិនអនុគ្រោះ គាត់សុខចិត្តបង់ថ្លៃភាស៊ី សូមកុំឲ្យយកថ្លៃភាស៊ីខ្ពស់ពេកយក១០០ ឬ២០០រៀលបានហើយ ពួកគាត់លក់បានតែមួយព្រឹកទេ ម៉ោង១០•០០ឬ១០និង៣០នាទីព្រឹក អស់មនុស្សមកផ្សារហើយ។
បើតាមប្រជាពលរដ្ឋដែលជាអ្នកលក់បន្លែ លក់ត្រី លក់ផ្លែឈើកញ្ច្រែង កញ្ជើ ល្អី ក្នុងផ្សារក្រមួនទាំងអស់ បានឲ្យដឹងថា ពួកគាត់មិនអាចប្តូរទីតាំងចាស់ដែលពួកគាត់ធ្លាប់លក់ដូរជាង១០ឆ្នាំមកហើយបានទេ ទីមួយគឺម៉ូយដែលមានផ្ទះនៅជុំវិញផ្សារក្រមួននេះ គេស្គាល់ជាម៉ូយទិញរាល់ថ្ងៃ បើទៅលក់នៅផ្សារវាលយន្ត គឺឆ្ងាយផ្ទះគម្លាតចម្ងាយប្រមាណ១គីឡូម៉ែត្រ ភ្ញៀវច្បាស់ជាមិនទីតាមជួយទិញទេ ហើយផ្សារវាលយន្តមានជនជាតិវៀតណាមគេយកបន្លែ ផ្លែឈើ និងត្រីមកលក់ផ្ទាល់ ដូច្នេះពួកគាត់មិនអាចដាក់លក់ប្រកួតប្រជែងឈ្នះគេទេ។
ក្រុមអ្នកលក់កញ្ច្រែង កញ្ជើ ល្អី បន្តទៀតថា ទោះបីអ្នកយកភាស៊ី ឬសមត្ថកិច្ចអាជ្ញាធរប្រកាសដេញពួកគាត់យ៉ាងណាក៏ដោយ ក៏ពួកគាត់មិនផ្លាស់ប្តូរកន្លែងចាស់ទៅលក់កន្លែងថ្មីឡើយ ។
ចែករំលែកព័តមាននេះ