រាជធានីភ្នំពេញ ៖ កាលពីរសៀលថ្ងៃទី១៧ ធ្នូ នៅអគ្គនាយកដ្ឋានរដ្ឋាករទឹកស្វយ័តរាជធានីភ្នំពេញ មានរៀបចំពិធីប្រកាសអគ្គនាយកដ្ឋានរដ្ឋាករទឹកស្វយ័តរាជធានីភ្នំពេញ ជាកន្លែងធ្វើការគ្មានផ្សែងបារី ក្រោមអធិបតីភាពលោកសែម ប៊ុនហេង អគ្គនាយករងនៃអគ្គនាយកដ្ឋានរដ្ឋាករទឹកស្វយ័តរាជធានីភ្នំពេញ លោកកែវ សុវណ្ណារិទ្ធ អគ្គនាយករងនៃអគ្គនាយកដ្ឋានរដ្ឋាករទឹកស្វយ័តរាជធានីភ្នំពេញ និងលោកម៉ាក ស្វីសូ នាយកអង្គការជំនួយអភិវឌ្ឍន៍អាត់វែនទិស្ទកម្ពុជា (អង្គការអាដ្រា) ប្រចាំកម្ពុជា។
ចូលរួមក្នុងពិធីនេះដែររួមមាន មន្ត្រីរាជការក្នុងអគ្គនាយកដ្ឋានរដ្ឋាករទឹកស្វយ័តរាជធានីភ្នំពេញចំនួន១២០នាក់ ។ ពិធីនេះត្រូវបានរៀបចំធ្វើឡើងដោយអគ្គនាយកដ្ឋានរដ្ឋាករទឹកស្វយ័តរាជធានីភ្នំពេញ សហការជាមួយអង្គការជំនួយអភិវឌ្ឍន៍អាត់វែនទិស្ទកម្ពុជា (អង្គការអាដ្រាកម្ពុជា) ក្រោមជំនួយឧបត្ថម្ភថវិកាពីភ្នាក់ងារអភិវឌ្ឍន៍អន្តរជាតិកាណាដា (CIDA) ក្នុងគោលបំណងដើម្បីពង្រឹងបន្ថែមទៀតលើសេចក្តីកំណត់ស្តីពីការហាមជក់បារីក្នុងបរិវេណរដ្ឋាករទឹកស្វយ័តរាជធានីភ្នំពេញ និងអនុវត្តតាមមាត្រា៨ នៃអនុសញ្ញាត្រួតពិនិត្យថ្នាំជក់ដែលរាជរដ្ឋាភិបាលបានផ្តល់សច្ចាប័ននាថ្ងៃទី១៥ ខែវិច្ឆិកា ឆ្នាំ២០០៥ ។
ម្យ៉ាងវិញទៀតតំបន់ធ្វើការគ្មានផ្សែងបារីជាប្រយោជន៍យ៉ាងសំខាន់ក្នុងការជួយលើកកំពស់សុខុមាលភាពលោក លោកស្រី ដែលជាមន្ត្រីរាជការបំរើការងារនៅក្នុងអគ្គនាយកដ្ឋានរដ្ឋាករទឹកផងដែរ ។ បន្ថែមលើសពីនេះទៀតក៏ដូចជាចូលរួមគាំទ្រដល់រាជរដ្ឋាភិបាលកម្ពុជា ជំរុញឱ្យមានការអនុម័តច្បាប់ត្រួតពិនិត្យថ្នាំជក់នៅកម្ពុជា ឱ្យបានឆាប់រហ័ស ដើម្បីជាប្រយោជន៍ដល់សុខុមាលភាពសាធារណជន សេដ្ឋកិច្ចជាតិ និងបរិស្ថាន ៕
ចែករំលែកព័តមាននេះ