ហួសចិត្តមេព្រៃសុំរួមសហការឆែកឆេរឃ្លាំងឈើ មន្ត្រីប៉ូលិស-អាវុធហត្ថខ្លះយកឈើតាមទំនើងចិត្ត
ខេត្តកំពង់ស្ពឺ ៖ សមត្ថកិច្ចចម្រុះបានចុះឆែកផ្ទះ៣កន្លែង ដែលសង្ស័យថាបានលាក់ឈើប្រណីតប្រភេទធ្នង់ជាច្រើនម៉ែត្រគូប ។ ប្រតិបត្តិការនេះ
ខេត្តកំពង់ស្ពឺ ៖ សមត្ថកិច្ចចម្រុះបានចុះឆែកផ្ទះ៣កន្លែង ដែលសង្ស័យថាបានលាក់ឈើប្រណីតប្រភេទធ្នង់ជាច្រើនម៉ែត្រគូប ។ ប្រតិបត្តិការនេះ ធ្វើឡើងក្រោមការបញ្ជាពីលោកអភិបាលខេត្ត ដោយមានការសំរបសំរួលពីតំណាងអយ្យការអមសាលាដំបូងខេត្តផងដែរ ។ ក្នុងពេលចុះឆែកឆេរដោយសារតែអស់លោកខាងអាវុធហត្ថ និងនគរបាលធ្វើខ្លួនមិនស័ក្តិសមជាសមត្ថកិច្ច បានរងនូវការរិះគន់ផងដែរពីសំណាក់ប្រជាពលរដ្ឋ ព្រោះតែអស់លោកទាំងនោះជញ្ជូនយកឈើតាមអំពើចិត្ត ដោយគ្មានការអៀនខ្មាសបន្តិចណាទាល់តែសោះ ។
លោក ប៊ុន សម្បត្តិ នាយផ្នែករដ្ឋបាលព្រៃឈើបសេដ្ឋបានឱ្យដឹងថា ក្រោមការណែនាំពីលោក វ៉ី សំណាង អភិបាលខេត្តឱ្យយកចិត្តទុកដាក់ តាមដានរាល់ការដឹកជញ្ជូនឈើរបស់ក្រុមឈ្មួញ រូបលោកបានធ្វើការស្រាវជ្រាវរហូតឈានដល់ការបង្ក្រាបនេះ ។ លោក នាយផ្នែកបន្តថា ទាំងនេះក៏ដោយសារតែមានសេចក្តីរាយការណ៍ពីពលរដ្ឋល្អផងដែរ ទើបកម្លាំងរបស់លោកសម្រេចការងារនេះ បានដោយជោគជ័យ ។
បច្ចុប្បន្នឈើទាំងនេះសមត្ថកិច្ចរបស់លោកបាននឹងប្រមូលយកមករក្សាទុនៅផ្នែករដ្ឋបាលព្រៃឈើបសេដ្ឋ រង់ចាំធ្វើការវាស់វែងរាប់ចំនួនឈើពិតប្រាកដ ។
លោកវរសេនីយ៍ត្រី មួន លាង នាយរងការិយាល័យសន្តិសុខ ស្នងការដ្ឋាននគរបាលខេត្តបានប្រាប់ថា ម្ចាស់ផ្ទះលាក់ឈើប្រណិតនេះឈ្មោះ ងួន ចាន់ថា ភេទប្រុស អាយុ៣៨ឆ្នាំ និងប្រពន្ឋឈ្មោះ នួន ជឿន អាយុ២៥ឆ្នាំ ជាផ្ទះដែលសមត្ថកិច្ចឆែកនៅព្រឹកថ្ងៃទី៣ មីនា ស្ថិតក្នុងភូមិកណ្តាល ឃុំមហាសាំង ស្រុកភ្នំស្រួច ។ នៅមិនទាន់ដឹងចំនួនពិតប្រាកដនៅឡើយទេដោយពេលនេះសមត្ថកិច្ចកំពុងធ្វើការត្រួតពិនិត្យ ។
មហាជនបាននិយាយរិះគន់ ទៅលើអស់លោកអាវុធហត្ថខេត្ត ក៏ដូចជានគរបាលសេដ្ឋកិច្ចខេត្ត ព្រោះតែអស់លោកទាំងនោះធ្វើខ្លួនមិនស័ក្តិសមជាសមត្ថកិច្ច ដែលបង្ក្រាបបទល្មើសព្រៃឈើឡើយ ។ មូលហេតុដែលមានការរិះគន់នេះដោយសារតែអស់លោកទាំងនោះបានប្រមូលយកឈើទៅដាក់តាមរថយន្តរៀងៗខ្លួន ហើយដឹកយកចេញពីកន្លែងបង្ក្រាបទៅបាត់អស់ ដែលការដឹកនេះត្រូវបានដឹងថា មិនមែនដឹកយកទៅដាក់កន្លែងមេព្រៃឡើយ គឺដឹកយកទៅធ្វើជាកម្មសិទ្ធិរបស់ខ្លួនទៅវិញ ។
ពលរដ្ឋសំណូមពរទៅដល់លោកឧត្តមសេនីយ៍ត្រី សម សាមួន ស្នងការនគរបាលខេត្តក៏ដូចជាលោកឧត្តមសេនីយ៍ត្រី ជូ សារុនមេបញ្ជាការកងរាជអាវុធហត្ថខេត្ត មេត្តាពិនិត្យមើលភាពអសកម្ម របៀបត្រីងៀតឆ្លៀតពងរបស់កូនចៅក្រោមឱវាទផង បើធ្វើបែបនេះមិនសមជាសមត្ថកិច្ចដែលបង្ក្រាបបទល្មើសនោះទេ ជាងនេះទៅទៀត ក៏គួរណាស់តែមានការខ្មាសអៀនចំពោះមេព្រៃផង ដែលគេខំហៅឱ្យមកសហការក្នុងការបង្ក្រាប មិនមែនហៅឱ្យមកប្រមូលយកឈើបទល្មើសបែបនេះឡើយ ។
ពាក់ព័ន្ឋនឹងការជញ្ជូនយកឈើពីសំណាក់នគរបាលសេដ្ឋកិច្ចខេត្ត និងកងរាជអាវុធហត្ងខេត្តនិងស្រុកផងដែរ លោក ប៑ុន សម្បត្តិ បាននិយាយថាលោកពិតជាមិនយល់ ចំពោះសកម្មភាពរបស់អស់លោកទាំងនោះឡើយ ។ រឿងនេះលោកមិនស្តីបន្ទោសដល់អស់លោក ដែលជញ្ជូនយកឈើខុសគោលការណ៍នេះទេ តែពួកគាត់ជាសមត្ថកិច្ចទាំងនោះហាក់បីដូចជាមិនយកចិត្តទុកដាក់ស្តាប់តាមឡើយ ៕
ចែករំលែកព័តមាននេះ