មន្ត្រីអាមេរិកគាំទ្រតៃវ៉ាន់ឱ្យចូលរួមអង្គការអាកាសចរណ៍ស៊ីវិលអន្តរជាតិ តែចិនរិះគន់
តៃវ៉ាន់ ៖ រដ្ឋមន្ត្រីដឹកជញ្ជូនអាមេរិកលោក Pete Buttigieg បានអំពាវនាវកាលពីថ្ងៃអង្គារ ទី ២៧ កញ្ញា
តៃវ៉ាន់ ៖ រដ្ឋមន្ត្រីដឹកជញ្ជូនអាមេរិកលោក Pete Buttigieg បានអំពាវនាវកាលពីថ្ងៃអង្គារ ទី ២៧ កញ្ញាម្សិលមិញដើម្បីអនុញ្ញាតិឱ្យតៃវ៉ាន់ចូលក្នុងស្ថាប័នអង្គការសហប្រជាជាតិដែលគ្រប់គ្រងអាកាសចរណ៍ស៊ីវិល ប៉ុន្តែការអំពាវនាវរបស់លោករងការរិះគន់យ៉ាងខ្លាំងពីរដ្ឋាភិបាលចិន។
«យើងជឿជាក់ថា គ្រប់ភាគីពាក់ព័ន្ធសំខាន់ៗរបស់អាកាសចរណ៍ស៊ីវិលអន្តរជាតិ ជាពិសេសអ្នកដែលគ្រប់គ្រងដែនអាកាសសំខាន់ៗដូចជាតៃវ៉ាន់ គួរតែមានឱកាសចូលរួមយ៉ាងមានអត្ថន័យក្នុងការងាររបស់អង្គការអាកាសចរណ៍ស៊ីវិលអន្តរជាតិ (ICAO)»។ នេះជាការថ្លែងរបស់លោក នៅឯសន្និបាតរបស់អង្គការអាកាសចរណ៍ស៊ីវិលអន្តរជាតិ។
តំណាងរដ្ឋាភិបាលចិននៅ ICAO បានឆ្លើយតបវិញថា «មតិរបស់អាមេរិកបានព្យាយាមបង្កើតប្រទេសចិនជាពីរគឺ ចិនមួយ និងតៃវ៉ាន់មួយ ដែលវាផ្ទុយទៅនឹងធម្មនុញ្ញរបស់អង្គការសហប្រជាជាតិ»។
កាលពីដើមខែនេះ រដ្ឋមន្ត្រីដឹកជញ្ជូន និងគមនាគមន៍តៃវ៉ាន់ លោក Wang Kwo-tsai បានអំពាវនាវឱ្យពិភពលោកគាំទ្រការចូលរួមរបស់តៃវ៉ាន់ក្នុងអង្គការអាកាសចរណ៍ស៊ីវិលអន្តរជាតិ។
លោកថ្លែងថា តំបន់ព័ត៌មានហោះហើរតៃប៉ិរបស់តៃវ៉ាន់គឺជាផ្នែកមួយនៃបណ្តាញតំបន់របស់អង្គការអាកាសចរណ៍ស៊ីវិលអន្តរជាតិ ហើយរដ្ឋបាលអាកាសចរណ៍ស៊ីវិលតៃវ៉ាន់គឺជាអង្គភាពតែមួយគត់ដែលត្រួតពិនិត្យ និងទទួលខុសត្រូវចំពោះការគ្រប់គ្រងចរាចរណ៍ផ្លូវអាកាសប្រកបដោយសុវត្ថិភាពនៅទូទាំងតំបន់៕ (យោងតាមប្រភព៖ Reuters)
ចែករំលែកព័តមាននេះ