ខេត្តត្បូងឃ្មុំ ៖ «កងកម្លាំងនគរបាលជាតិគឺមានភារកិច្ចការពាររាជរដ្ឋាភិបាលកម្ពុជា ដែលប្រសូតចេញពីការបោះឆ្នោតនោះ ហើយប្រសិនបើមានក្រុមជនអគតិមួយចំនួន
ខេត្តត្បូងឃ្មុំ ៖ «កងកម្លាំងនគរបាលជាតិគឺមានភារកិច្ចការពាររាជរដ្ឋាភិបាលកម្ពុជា ដែលប្រសូតចេញពីការបោះឆ្នោតនោះ ហើយប្រសិនបើមានក្រុមជនអគតិមួយចំនួន ដែលតែងតែយាយីធ្វើឲ្យប្រទេសជាតិមានការលំបាក និងប៉ះពាល់ដល់ជីវភាពរបស់ប្រជាជន កងកម្លាំងនគរបាលក៏ត្រូវចេញប្រតិបត្តិការទប់ស្កាត់និងបង្ក្រាប» នេះជាប្រសាសន៍របស់លោក ឧត្តមសេនីយ៍ឯក មួន សារ៉ន អគ្គស្នងការរងនគរបាលជាតិថ្លែងក្នុងពិធិបិទវគ្គបណ្តុះបណ្តាល ជំនាញអន្តរាគមន៍ពិសេស១២០នាក់ ដែលបានធ្វើឡើងនៅព្រឹកថ្ងៃទី៣ មីនា ២០១៧ ក្នុងបរិវេណសាលាខេត្តត្បូងឃ្មុំ ក្រោយពីបានហ្វឹកហាត់៤៥ថ្ងៃនោះ។
លោក គន់ សុភា អភិបាលរងខេត្តបានថ្លែងឲ្យដឹងថា ឆ្លងតាមរយៈនៃវគ្គបំប៉ននេះ អ្វីដែលសំខាន់នោះគឺទទួលបានលទ្ធផលល្អប្រសើរ គួរឲ្យកត់សម្គាល់។ ជាពិសេសទទួលបាននូវធនធានមនុស្សដែលមានសមត្ថភាពក្នុងការបំពេញការងារក្នុងអង្គភាពចំណុះឲ្យស្នងការនគរបាលខេត្តត្បូងឃ្មុំ និងជាកម្លាំងចលករដ៏មានសារសំខាន់ រួមចំណែកក្នុងការបម្រើប្រទេសជាតិ និងប្រជាពលរដ្ឋគ្រប់មជ្ឈដ្ឋាន។ រូបលោកមានសុទិដ្ឋិនិយមថា សិក្ខាកាមដែលត្រូវបានធ្វើការបំប៉នរួចហើយ រួមទាំងមន្ត្រីនគរបាលដទៃទៀតនឹងបន្តយកចិត្តទុកដាក់ប្រើប្រាស់ចំណេះដឹង និងជំនាញដែលមានស្រាប់ ដើម្បីបុព្វហេតុដ៏ធំធេងរបស់ប្រទេសជាតិមាតុភូមិ ចូលរួមឲ្យកាន់តែមានសកម្មផុលផុសក្នុងការអនុវត្តន៍ គោលនយោបាយភូមិឃុំមានសុវត្ថិភាពការអនុវត្តន៍ច្បាប់ចរាចរណ៍ផ្លូវគោក និងជាពិសេសការបង្ក្រាបបទល្មើសគ្រឿងញៀន ល្បែងស៊ីសងខុសច្បាប់គ្រប់ប្រភេទ។
លោកឧត្តមសេនីយ៍ឯក មួន សារ៉ន អគ្គស្នងការរងនគរបាលជាតិ មានប្រសាសន៍ឲ្យដឹងថានៅគ្រប់វេទិការសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តែងតែមានប្រសាសន៍ថាប្រទេសជាតិមានសន្តិភាព ទើបយើងទទួលបាននូវអ្វីៗទាំងអស់មកដល់សព្វថ្ងៃនេះ។ ខេត្តត្បូងឃ្មុំមានកម្លាំងអន្តរាគមន៍ចំនួន១២០នាក់ ដែលបានទទួលការបំប៉នមានចំណេះដឹងបានល្អ ប្រសិនណាបើខេត្តត្បូងឃ្មុំមានហេតុការណ៍ណាមួយកើតឡើងនោះ កម្លាំងទាំងនេះនឹងចេញអន្តរាគមម៍ ក្រោមកិច្ចសហការជាមួយនឹងកម្លាំងស្នងការដ្ឋាននគរបាលខេត្តកំពង់ចាម ព្រៃវែង ក្រចេះ និងស្វាយរៀងធ្វើយ៉ាងណាប្រឹងប្រែងឲ្យអស់ពីលទ្ធភាព ក្នុងករណីចាំបាច់គឺមានកម្លាំងរបស់ថ្នាក់ជាតិចុះមកជួយ។
សូមឲ្យខេត្តផ្សេងៗដែលនៅជាប់នឹងខេត្តត្បូងឃ្មុំ ត្រូវតែចាប់ផ្តើមបើកវគ្គបំប៉ននេះឲ្យបានព្រមៗគ្នា ហើយបន្ទាប់មករូបលោកនឹងរៀបចំធ្វើសមយុទ្ធរួមគ្នា ដើម្បីពង្រឹងកម្លាំងនគរបាលឲ្យកាន់តែរឹងមាំ។ លោកឧត្តមសេនីយ៍ទោ បែន រ័ត្ន ស្នងការនគរបាលខេត្តមានប្រសាសន៍ឲ្យដឹងដែរថា កងកម្លាំងអន្តរាគមន៍ពិសេសដែលត្រូវបានបិទវគ្គនៅថ្ងៃនេះមានចំនួន១២០នាក់ទទួលបានជោគជ័យរួមទាំងមានកម្លាំងគួបផ្សេងមានកងរាជអាវុធហត្ថសរុបចំនួន៥០០នាក់ ។
រូបលោកពិតជាមានមោទនភាពដោយឧត្តមសេនីយ៍ឯក មួន សារ៉ន អគ្គស្នងការរងនគរបាលជាតិ បានផ្តល់នូវសម្ភារច្រើនលើសពីសេចក្តីប្រាថ្នាដែលរូបលោកចង់បានទៅទៀត។ សិក្ខាកាមទាំងនេះត្រូវបានដាក់ពង្រាយទៅតាមប៉ុស្តិ៍រដ្ឋបាលនីមួយៗតាមបណ្តាស្រុកក្រុងទាំង៧ រាល់ករណីរឿងដែលបានកើតឡើងជាបឋមនោះ ពួកគេត្រូវតែមានមុខមុនគេបង្អស់ គោលការណ៍សំខាន់ទី១ ត្រូវតែការពារនៅកន្លែងកើតហេតុគ្រប់រឿង មានដូចជាគ្រោះថ្នាក់ចរាចរណ៍ គ្រោះធម្មជាតិបាក់ច្រាំងទន្លេ និងរឿងផ្សេងទៀត។ល។
ដើម្បីជួយដល់ប្រជាពលរដ្ឋដែលទទួលរងគ្រោះ វគ្គទី២ បានកំពុងបង្រៀនបានចំនួន១០ថ្ងៃហើយ និងមានវគ្គបន្តបន្ទាប់ទៀត។ ដោយទទួលបានការណែនាំពីអគ្គស្នងការនគរបាលជាតិនោះ គឺប្រតិបត្តិការត្រីកោណដែលរូបលោកចង់បានបំផុតដែលជាយុទ្ធវិធីល្អ ព្រោះថាបើត្បូងឃ្មុំមានហេតុការណ៍កើតឡើងគឺ កំពង់ចាម ក្រចេះនិងព្រៃវែង ត្រូវចេញមកជួយអន្តរាគមន៍គ្នាទៅវិញទៅមក៕
ចែករំលែកព័តមាននេះ